Exodus 3 - Iñupiatun Mumiksat Uqalugiksuat

God-im Ququaġmagu Moses

¹ Uvlut iḷaŋanni Moses qaunaksriḷḷaġmi imnaiŋiñiglu nagruliŋiñiglu aaparuaġmi Jethro-m, aŋaiyyuliqsiqpauruam Midian-mi, aullatiŋagaich niġrutit qaaŋiqł̣ugu nunagluktuaq aasii Sinai-mukłuni, God-im iġġiŋanun.

² Tavrani isaġulgata Atanġum niptaġvigiŋagaa ignikun qitqaniñ uqpium. Moses-gum tautukkaa uqpik ikualaruaq aglaan igniġum ikiŋiññiġaa.

³ “Uvvauna qanuq,” isumaruq. “Summan una uqpik ikualaruam ikiŋitpauŋ? Qalliḷaaġluŋa tautugiaġaqsigiga.”

⁴ Atanġum tautukkamiuŋ Moses qalliruaq, ququaġaa iḷuaniñ uqpium uqallakłuni, “Moses! Moses!” Kiugaa, “Ii, uvaniittuŋa.”

⁵ God uqallaktuq, “Qalliḷaavsaaġnak! Aluġutaiġiñ, qanukkii makitarutin salumaruami ilaaguaqtauŋaruami nunami.

⁶ God-iŋa aapakpich, maŋŋuġiraqpich, Abraham-gum, Isaac-gum, Jacob-guvlu.” Tavraasii Moses-gum talugaa kiiñani, qanukkii iqsivḷuni qiñiġniaġumiuŋ God-auruaq.

⁷ Tavraasii Ataniq uqallaktuq, “Qiñiŋagitka aŋalamaqłuktauruat iñugiratka Egypt-mi; tusaaŋagitka iiqtuaġutaat nagliksaaŋaiġukłutiŋ, iḷuñŋusuutigigitka nagliksaaġutiŋich,

⁸ aasii uvva qairuŋa atqaqłuŋa qiḷagmiñ annautisukługich Egypt-miuguruaniñ suli aullautisukługich Egypt-miñ inituruamun nunamun, nunalluatamun naurisuqtuamun, paŋmami ukua nayuqtaŋannun; Canaan-miut, Hit-miut, Amor-miut, Periz-miut, Hiv-miut, Jebus-miullu.

⁹ Tusaapiaŋagiga iiqtuaġutaat iñugiraġma, suli qiñiġitka Egypt-miut iñugiratka nagliksaaqtitaġimmatigik.

¹⁰ Ki, utiġiñ Egypt-mun. Aasii uqallautilugu Pharaoh aullaqtitqulugich iñutka Egypt-miñ.”

¹¹ Aglaan Moses uqallaktuq God-mun, “Uvaŋauvaŋa iñugruiññauruŋa. Qanuġluŋa Pharaoh-mugniaqpik aasii Israel-gum kiŋuvaaŋich aullautisuglugich Egypt-miñ?”

¹² God-im kiugaa, “Itqatiginiaġikpiñ, aasii qaġġisigupkich iñuich Egypt-miñ, nanġautiqaġniaqtutin uvamnun uumani iġġimi. Taamna nalupqinaiġutauniaqtuq uvamnun tiliŋatilaaġnik.”

¹³ Aglaan Moses kiugaa, “Israel-gum kiŋuvaaŋich ullakkupkich aasii uqallautilugich, ‘God-iŋata maŋŋuuvsi tiligaaŋa ilivsiññun,’ apiġiniaġaanŋa, ‘Kimik atiqaqpa?’ Qanuq aasii kiuniaqpik?”

¹⁴ God uqallaktuq, “Uvaŋa uvaŋauruŋa. Inna uqallautiruksraġigitin: ‘Ilaata Uvaŋauruam tiliŋagaaŋa ilivsiññun.’

¹⁵ Uqallautisaġitin Israel-gum kiŋuvaaŋich Uvaŋa, Atanġuruaŋa, God-iŋat maŋŋuuvsi, Abraham-gum, Isaac-gum, Jacob-guvlu, tiliŋaniḷutin iliŋiññun. Tavra taamna atiġa isuitchuamun; taaptumiŋa iluqaġmiŋ kiŋuvaaġiich taiguqtaksraġigaanŋa.

¹⁶ Aullaġlutin katitchaqtukkich aullarriŋich Israel aasii uqallautilugich uvaŋa, Atanġum, God-iŋata maŋŋuuŋisa, God-iŋa Abraham, Isaac, Jacob-guvlu, niptaġniḷuŋa iliŋnun. Uqallautilugiḷḷu ullaŋaniḷugich uvamnun suli tautuŋaniḷugich qanuq Egypt-miunun aŋalatchiqsilaaŋich.

¹⁷ Sivunniŋaruŋa aullautisukługich Egypt-miñ nagliksaaqtitauvianniñ, nunagiksuamun, naurisuqtuamullu nunaŋannun Canaan-miut, Hit-miut, Amor-miut, Periz-miut, Hiv-miut, Jebus-miullu.

¹⁸ “Iñugiraġma naalaġniñiaġaatin qanuq uqautigupkich. Tavra ullautiruksraurutin piqatigilugich aullarriŋich Israel Pharaoh-mun aasii uqallautilugu, ‘Ataniq, God-iŋat Hebrew-guruat, iḷitchuġipkaŋaruq uvaptinnun. Tavraasii aullaqtitchigut, piŋasuni uvluni iglauluta nunagluktuamun aitchuiyumaugut ikipkaiḷuta Ataniġmun, God-iptinnun.’

¹⁹ Iḷisimaruŋa Pharaoh-m aullaqtitchumiñaitkaasi nunurirauŋisuaġumi.

²⁰ Aglaan suaŋŋatiga atuġlugu tatavsaġniaġiga Egypt tatavrualatchiḷugich. Taamna pianikpan aullaqtinniaġaasi.

²¹ “Egypt-miut qiksigiliġniaġaasi, aullaġuvsi aullaŋitchumausi tainnaġruiññaq sumik tigumiaġaluaġnasi.

²² Israel-gum kiŋuvaaŋich aġnapayaaŋich ullautiyumaut Egypt-miunun siḷallimignun aġnanullu iñuuniaqtuanun iglumigni aasii annuġaaksritqulutiŋ qiñiyunaqsautiniglu kaviqsuaniglu qatiqtuaniglu manigñik piḷianik. Israel-gum kiŋuvaaŋich atipkaġniaġaich tamatkua iġñimignullu paniutimignullu aasii aullautiniaġaich umialgutiŋich Egypt-miut.”