Exodus 28 - Iñupiatun Mumiksat Uqalugiksuat

Annuġaaksraŋich Aŋaiyyuliqsiqpauruat

¹ “Qaitquuŋ aniqatin Aaron, iġñiŋiḷḷu Nadab, Abihu, Eleazar, Ithamar-lu. Ilaaguaġlugich Israel-gum kiŋuvaaŋiññiñ, savautiyumagaanŋa aŋaiyyuliqsiqpaulutiŋ.

² Aŋaiyyuliqsiqpaum annuġaaŋiñik annuġaaliuqsaġiñ aniqatin Aaron, qiksigirauyumiñaqsiḷugu qiñiyunaqulugulu.

³ Ququaqsaġitin iluqaisa sanaturualiuŋaratka Aaron annuġarriuqulugu, ilaaguaqtauniksraŋanun aŋaiyyuliqsiqpauniġmun savautisaġluŋa.

⁴ Satqagusiuqsaqtut, aŋaiyyuliqsiqpaum kiapiġutaaniglu, qaliġuamiglu, qupaktamik qaliġuuramiglu, niaquata nimmaaġutiksraŋaniglu, ukiłhaaġiksuamiglu tavsimik. Taapkuniŋa aŋaiyyuliqsiqpaich annuġaaŋiñik annuġaaliuqtuksraurut aniqatignun Aaron-mun suli iġñiŋiñun, savautiyumagaanŋa aŋaiyyuliqsiqpaulutiŋ.

⁵ Sanaturuat savaktit atuqtuksraurut suŋauraaqtuamik, tigluuraaqtuamik, suli kaviqsuamik imnaim mitquanik, ivaluqaġlutiŋ kaviqsuamik manigmik, suli ukił̣haaġiksuamik.

⁶ “Aŋaiyyuliqsiqpaum kiapiġutiliuqtuksraurut suŋauraaqtaamik, tigluuraaqtaamik, kaviqsuamik imnaim mitquanik, kaviqsuamik manigmik ivaluqaġlutiŋ suli ukił̣haaġiksuamik, qiñiyunaqsaŋaruamik qupagnik.

⁷ Malġugnik tuiqqaŋigñi ataruagnik kasullasiḷugik atallasiḷugik saniġaŋigñun.

⁸ Savalluataŋaruaq tavsi tainnasimiñ suli ukił̣haamiñ ataruksrauruq kiapiġunmun atausiusaġlugik aviktamiñ.

⁹ Malġugnik carnelian-nik uyaġaksraġusi aasii titiqtuutilugich atiŋich qulit malġuuruat (12) iġñiŋich Jacob,

¹⁰ aŋayukłiŋanniñ aglaan, itchaksrat atausimi uyaġagmiillugich suli itchaksrat igḷuani.

¹¹ Sanaturuam qiñiyunaqutiliuqtim titiqtuutiyumagaich malġuuruagnun uyaqqagnun atiŋich iġñiŋisa Jacob, aasii turviḷiġlugik uyaqqak kaviqsuamun manigmun.

¹² Iḷiḷugik tuiqqagutiŋigñun kiapiġutim pisigilugich qulit malġuuruat (12) maŋŋuġiraŋich Israel. Aaron-gum itqaksautaullayumagaich atiŋich tuiqqagmiñi, tainnamik Uvaŋa, Atanġuruaŋa, itqaumasuuyumagitka iñugiratka.

¹³ Kaviqsuamik manigmik turviḷiuġlusi,

¹⁴ suli malġugnik qivḷiignik kaviqsaamik manigmik piḷiagnik, qipitinŋaruak akłunaatun, aasii kasuqtillugik turviuruanun.

Satqagun

¹⁵ “Satqagusiuqsaqtusi Aŋaiyyuliqsiqpauruat Qaukłiŋannun atullaaraksraŋanik sivunniuġumik God-im pisuutaanik. Savaaguruksrauruq atiruamik ukił̣haamik kiapiġutitun suli atikavsaktuanik qupaglugu miquqtanik.

¹⁶ Kaŋiġalluaġiguni ittuksrauruq suli qugluŋaluni, quliŋŋuġutaiḷanik titiġniñik taktigiluni suli quliŋŋuġutaiḷanik titiġniñik siḷiktigiluni.

¹⁷ Iḷisiḷusi sisamanik tunulliġiiñik akisuruanik uyaġagnik tavruŋa; sivulliġmi saniġaqłiġiiksuani ruby-mik iḷisiḷusi, topaz-mik, suli garnet-mik;

¹⁸ tuglianni saniġaqłiġiiksuat, emerald-mik, sapphire-mik, suli diamond-mik;

¹⁹ piŋayuanni saniġaqłiġiiksuat, turquoise-mik, agate-mik, suli amethyst-mik;

²⁰ sisamaŋanni saniġaqłiġiiksuat, beryl-mik, carnelian-mik, suli jasper-mik. Taapkua attaviḷiġḷugich kaviqsuamik manigmik.

²¹ Taapkunani uyaġagni qulit malġuuruani (12) titiqtuutiŋaruksrauniaqtut atillaaŋich iġñiŋisa Jacob, nalunaiġutausaġlugich maŋŋuġiraŋich Israel.

²² Satqagun qivḷiḷiuġlugu kaviqsuamik manigiksuamik, qipitanik akłunaatun.

²³ Malġugnik tigummisiḷiġḷugik aqvaluqtuagnik kaviqsuamik manigmik aasii kasuqtillugich qulaaniittuanun kaŋiġalluŋigñun satqagutim,

²⁴ aasii kasuqtinmiḷugik malġuk qivḷik, kaviqsuamik manigmik piḷiak, malġuŋnun aqvaluqtuagnun tigummisignun.

²⁵ Allak aasii isuŋik kasuqtillugik qivḷiik malġuuruagnun, tainnaġlugik kasuqtinniaqtuk saaŋanun tuiqqagutiŋiksa kiapiġutim.

²⁶ Tavraasii aqvaluqtuagnik tigummisiḷiuġlusi malġugnik manigmiñ kaviqsuamiñ; aasii kasuqtillugik alliuruagnun kaŋiġalluŋigñun satqagutim iḷuata siñaanun saniġaanun kiapiġutim.

²⁷ Malġuvsaagnik aqvaluqtuagnik tigummisiḷiuvsaaġlusi kaviqsuamik manigmiñ aasii kasuqtillugik alliuruam sivuġaanun tuiqqagutiŋiksa, kiapiġutim, qaniŋagun kiluata suli qulaagun qiñiyunaqsaŋaruam tavsiata.

²⁸ Qiḷiutilugik qiḷiġviŋiññun satqagutim suli aqvaluqtuaŋigñun kiapiġutim suŋauraaqtaamun akłunauramun, satqagun inillalluataġumiñaqsiḷugu tavsiata qulaanun suli qasuraġaŋaiġḷuni.

²⁹ “Aaron isiġumi Salumaruamun Inimun, atuġniaġaa taamna satqagun titiqtuutiŋarualigaaq atiŋiñik maŋŋuuruat Israel-mun, tavraasii Uvaŋa, Atanġuruaŋa, itqaumasuuniaġitka iñugiratka.

³⁰ Iḷiḷugik Urim-lu Thummim-lu iḷuanun satqagutauruamun, Aaron-gum saagaġisigaik ullautiraġigumi Salumaruamun Nayuqtauvimñun. Taamna nalautittaġikpan atullaaraksraġigaa satqagun, kaŋiqsiḷugu sivunniutigillaayumagaa pisuutiga Israel-gum kiŋuvaaŋiññun.

Allat Aŋaiyyuliqsiqpauruat Annuġaaksraŋich

³¹ “Qaliġuaq iḷuaniinniaqtuaq kiapiġutim savaaguruksrauruq iluqani suŋauraaqtaamik imnaim mitquanik.

³² Nuiḷaqaqtuksrauruq niaquanun, taamna aasii nuiḷaq ukpirrusiġḷugu aligiitkutaġisaġlugu.

^33-34 Kiavaluisaaġlugu siñaagun ukpinniŋagun pomegranate-liqsuġlugu suŋauraaqtaanik, tigluuraaqtaanik, suli kaviqsaanik imnaim mitquanik, akunniliqsuġlugich qattauranik kaviqsuamik manigmik piḷianik.

³⁵ Aaron-gum annuġaaq atuqtaksraġiniaġaa aŋaiyyuliqsiqpauluni savagaġigumi. Ullautigumi nayuqtauvimñun Salumaruamun Inimun naakka anigumi tavraŋŋa, qattauraqtuaq tusaġnaġniaqtuq, aasii tuqutauniaŋitchuq.

³⁶ “Qiñiyunaqusiuġlugu kaviqsuamik manigiksaamik suli titiqtuutilugu ‘Ilaaguaqtauŋaruaq Ataniġmun.’

³⁷ Qiḷiutiluguasii sivuġaanun niaquata nimmaaġutaata suŋauraaqtaamik akłunaamik.

³⁸ Aaron-gum atuqtaksraġiniaġaa qaumiñi, tavraasii uvaŋa, Atanġuruaŋa, akuqtullaniaġitka iluqaisa aitchuutigiraŋich Israel-gum kiŋuvaaŋisa ilaaguaqtaġiraŋich uvamnun, iñuich unnii killukuaġaluaqpata aitchuiḷḷaġmiŋ.

³⁹ “Nuviqsraġlugu ukił̣haaġiksaamik Aaron-gum qaliġuuraksraŋa suli niaqumun nimmaaġutiliuġlugu ukił̣haaġiksaamik suli tavsialiuġlugu miquġlugu qiñiyunaqsaŋaruamik.

⁴⁰ “Qaliġuuraliuġlugich, tavsialiuġlugich, suli nasaugauranik Aaron iġñiŋiñun, qiksiginaqulugich suli qiññaġiqulugich.

⁴¹ Atipkaġlugich tamatkua annuġaat aapiyaġnun Aaron-mun iġñiŋiñullu. Aasii ilaaguaqtaġilugich suli nalunaiqsaġilugich uqsruqtaaġlugich olive uqsruanik, savautiyumagaanŋa aŋaiyyuliqsiqpaulutiŋ.

⁴² Ukiłhaaġiksuamik naitchuagnik kamikłuliuġlugich, tiġiksraġvianniñ qiqpaŋiññun aglaan, qiñiġnaŋitchumaut timiŋich.

⁴³ Aaron iġñiŋisalu atullaaraksraġiniaġaich Tupiġmukkumiŋ nayuqtauvimñun naakka ullautigumiŋ ikipkaivigmun aŋaiyyuliqsiqpauyyaġlutiŋ Salumaruami Inimi, tuqutauŋitchumaut nuisakpata timiŋich. Taamna tavra itchaġataġniaqtuaq maliġiraksraŋat Aaron-guvlu kiŋuniiŋisalu.