Exodus 27 - Iñupiatun Mumiksat Uqalugiksuat

Ikipkaivik

¹ “Ikipkaiviḷiuqsaqtusi acacia-m qiruanik. Kaŋiġalluaġigḷugu, 7½ isigagniqtun taktigilugu, suli 7½ isigagniqtun iraqtutigilugu, aasii 4½ isigagniqtun qutchiksigilugu.

² Aniŋarualiuġlusi nagruktun ittuanik qaaŋannun sisamat kaŋiġalluŋisa. Aulaiḷamiñ savaagulutiŋ taputilugu ikipkaivik, aasii qaaqaqtuksrauruq iluqani patukpagmik.

³ Aġraqaġviliuġlugu uqsruulaaqtuanun aġranun, suli piksrugauranik, iḷuturuanik puggutauranik, kakiuranik, aġraliqutiniglu. Iluqaġmiŋ taapkua suġautaksraŋich savaagulutiŋ patukpagmik.

⁴ Uukłiqpiḷiuġlugu patukpagmik aasii iḷiḷugich sisamat patukpagmik tigumiaġunnat aqvaluqtaat kaŋiġalluŋiñun.

⁵ Iḷiḷugich aġraqaġviich ataanun siñaata ikipkaivium, qunmun avvaŋanuaglaaġumiñaqsiḷugu ikipkaivium.

⁶ Akigausiuġlugu qiruanik acacia-m, qaaliġḷugich patukpagmik,

⁷ aasii iḷiḷugich aqvaluqtuanun saniġallaaŋigñun ikipkaivium akigaqparruŋ.

⁸ Ikipkaiviḷiuqsaqtusi qirugnik iḷuŋa qattaġlugu, tuvraġlugu maniŋaraġa piraksraun iġġimi.

Siḷalliġuaŋa Tupqum Atanġum Nayuqtauviata

⁹ “Tupiq nayuqtauviga avaluliuqsaġiksi ukił̣haaġiksuanik talukiyaanik. Kiluliñaaŋani talukiyaaqaġniaqtuq taktigiruanik malġukipiaq qulinik (50) isagniġum avvaŋatitun,

¹⁰ iñuiññaniglu (20) napaqsranik patukpagmiñ piḷianik, iñuiññaniglu (20) tunŋavigñik patukpagmiñ piḷianik, naktirviiḷḷu, niviŋŋaviiḷḷu, qatiqtuanik manigmik piḷiat.

¹¹ Tainnasuli savaglugu salliñaaŋata tuŋaaniittuaq avalu.

¹² Ualiñaaŋa talukiyaaqaqtuksrauruq iñuiññat tallimanik (25) isagniġum avvaŋatitun taktigilugu, qulinik naparuaqaġluni suli qulinik tunŋavigñik.

¹³ Kivaliñaaŋani katchim, paaqaġviani siḷalliġuaguruaq avaluŋa iraqtutilaaqaqtuksrauruq iñuiññat tallimanik (25) isagniġum avvaŋisun.

^14-15 Saniġallaaŋigñi paaŋata 7½ isagniġum avvaŋatun talukiyaaqaqtuksrauruq, piŋasunik napaqsraqaġluni suli piŋasunik tunŋavigñik.

¹⁶ Paaŋa taamna talukiyaaqaqtuksrauruq taktigiluni qulit isagniġich avvaŋiññik ukił̣haaġiksuamik suŋauraaqtuamik, tigluuraaqtuamik, suli kaviqsuamik imnaim mitquanik, qupaŋalugu miquqtanik. Nappaviqaġniaqtuq sisamanik napaqsranik sisamauruani tunŋavigñi.

¹⁷ Iluqaġmiŋ napaqsrat avataani avaluuruam kasuqtinŋaruksraurut qatiqtuanik niviŋŋavigñik aasii naktirviŋich piḷiaguruksraurut qatiqtuamik manigmik suli tunŋaviŋich patukpagmik.

¹⁸ Avaluuruaq taktilaaqaqtuksrauruq malġukipiaq qulinik (50) isagniġum avvaŋatitun, iñuiññat tallimanik (25) isagniġum avvaŋatitun siḷiktigilutiŋ, suli malġuk avvaġmik isagniġum avvaŋatun qutchiksigilutiŋ. Talukiyaat savaaguruksraurut ukił̣haaġiksaamik suli tunŋaviich patukpaulutiŋ.

¹⁹ Suġautaksraŋich Tupqum iluqaisalu pauktuutiksraŋich Tupqum suli avaluksraŋata savaaguruksraurut patukpagmiñ.

Qaunakriñiksraq Naniqaġvigmik

²⁰ “Piraksrikkich Israel-gum kiŋuvaaŋich qaġġirritqulugich pigigñiqsramik olive uqsruanik nannimun, ikillayumagaat anaqatuaġaġikpan.

²¹ Aaron iġñiġutiiŋisalu inillaktaksraġigaat naniq, Tupqani nayuqtauvigma, siḷataanun talukiyaam sivuġaaniittuam Sivunniuġutim Kiguunniŋata. Tavrani takkumni ikumaruksrauruq anaqamiñqaŋa uvlaaġataqtillugu. Taamna piraksriun maliġuaġaksraġiġaat isuitchuamun Israel-gum kiŋuvaaŋisa.