Exodus 26 - Iñupiatun Mumiksat Uqalugiksuat

Tupiq Atanġum Irvia

¹ “Iḷulliḷiqsaġiksi Tupiq nayuqtauviga quliniñ aviktaniñ ukił̣haaġiksuaniñ piḷiaguruamik suŋauraaqtaamik, tigluuraaqtaamik, suli kaviqsuamik imnaim mitquanik. Qupaglugu miquġlugich cherubim-nik.

² Atilugich aktilaaŋich, akimiaġutaiḷatun (14) isagniġum avvaŋisun taktigilugich suli malġugnik isagniġum avvaŋiktun iraqtutigilugu.

³ Miquutilugich tallimauruat atautchimun atautchiigusaġlugich, tainnasuli igḷuiŋich tallimauruat.

⁴ Niviŋŋaviḷiqsuġlugich suŋauraaqtaamik ukił̣haamik siñaagun siḷalliata aviktallaam atautchiigullaaruagni.

⁵ Niviŋŋaviḷiqsuġlugu malġukipiaq qulinik (50) sivulliq aviktaq sivulliġmi; suli malġukipiaq qulinik (50) niviŋŋaviḷiqsuġlugu atisiḷugich aqulliġmi aviktami akilliġiiksiḷḷugich.

⁶ Kaviqsuamik manigmik malġukipiaq qulinik (50) naktirviḷiuġlusi kasuqtirrutiksraŋigñik malġuiguruak igḷugiik atausiŋŋuġlugu.

⁷ “Taluliuġlugu Tupiq qulit atausiuruanik (11) aviktanik ukił̣haaliamik nagrulgich mitquanniñ.

⁸ Aktilaaŋich atilugich, akimiatun (15) isagniġich avvaŋatitun taktigilugich suli malġuktun isagniġum avvaŋiktun siḷiktigilugich.

⁹ Miquutilugich tallimauruat atautchimun atautchiigusaġlugich, aasiiḷi itchaksrauruat iliŋisiguttauq. Qugluglugu itchaksraŋat qulaanun sivuġaata Tupqum.

¹⁰ Niviŋŋaviḷiġḷugu malġukipiaq qulinik (50) siñaagun aqulliq aviktaq atautchiiñi, aasii-suli malġukipiaq qulinik (50) niviŋŋavigñik siñaatigun igḷuiŋisa.

¹¹ Patukpagnik malġukipiaq qulinik (50) naktirviliuġlusi aasii iḷiḷugich niviŋŋavigñun kasuqtitchaġlugik malġuiguruak, atausiŋŋuqsaġlugu taluuruaq.

¹² Niviŋŋaġlugu iḷakuuruaq avvaq aviktaq tunuanun Tupqum.

¹³ Iḷakuuruaq avvaŋa isagniġum saniġallaaŋigñi taktilaaŋata niviŋaniaqtuq saniġaŋigñi Tupqum talusaġlugu.

¹⁴ “Malġuvsaagnik taluliuġlugu, atausiq aŋusallum imnaim amiŋanik kipitinŋaruamik kaviqsuamik suli igḷua qisigiksaamik, siḷalliġmun taluusaġlugu.

¹⁵ “Naparuanik avaluksraliuġlugu Tupiq acacia-m qiruanik.

¹⁶ Avaluksrallaa akimiatun (15) isigagniqtun taktigilugu suli iñuiññaq tallimat malġugnik (27) titiġniñik siḷiktigilugu,

¹⁷ malġugnik atiruagnik aniŋaruagnik, avaluksrat kasuutiyumiñaqsiḷugich atautchimun. Iluqaġmiŋ avaluksrat tamatkuniŋa paugaqaqtuksraurut.

¹⁸ Avaluksraliuġlusi iñuiññanik (20) kiluliñaaŋani

¹⁹ suli malġukipianik (40) qatiqtuanik manigñik tunŋaviḷiġlugich, malġuugnik alliḷillaalugich avaluksrallaa tigummisiksraŋigñik pauktaŋiksa.

²⁰ Iñuiññanik (20) avaluksraliuġlusi salliñaaŋanun Tupqum

²¹ suli malġukipianik (40) qatiqtuanik manigñik tunŋavigñik, malġuullaalugik avaluksrallaamun.

²² Tunuksraŋanun Tupqum sanmiruam uanmun, itchaksranik avaluksraliuġlusi,

²³ suli malġuugnik avaluksragnik kaŋiġalluŋiñun.

²⁴ Taapkua kaŋiġalluŋisa avaluksraŋich kasuutiŋaruksraurut natqani aasii kasuutiŋalutiŋ qulliqpiaŋanuaglaan. Malġuk avaluksrauruak kaŋiġalluliuġutauruak savaŋaruksrauruk tainna.

²⁵ Tavra tallimat piŋasuuniaqtut avaluksrat, akimiaq atausiuruanik (16) tunŋaviḷianik qatiqtuamik manigñik, malġuk ataaniillaalutiŋ avaluksrallaam.

²⁶ “Akimianik (15) sanniġutaliuġlugu acacia-m qiruaniñ, tallimanik avaluksranik katchiḷḷaaŋanun Tupqum,

²⁷ tallimanik avaluksranik akianun, suli tallimanik avaluksranik uaŋnaaġruum tuŋaaŋani, tunuani.

²⁸ Qitiqłiq sanniġutaq iḷiḷugu qitqannun avaluksrat, ittuksrauruq isuaniñ Tupqum allamun isuanun.

²⁹ Qaaliġḷugich avaluksrat kaviqsuamik manigmik suli niviŋŋaviḷiuġlusi aqvaluqtuanik kaviqsuamik manigmik tigummisiksraŋiñik sanniġutat, qaaliġḷugiḷḷu kaviqsuamik manigmik.

³⁰ Nappaġlugu Tupiq maliġilugich sivunniuġutit maniŋaratka iġġimi.

³¹ “Talukiyaaliuġlugu ukił̣haaġiksuamik suŋauraaqtuamik, tigluuraaqtuamik, suli kaviqsuamik imnait mitquŋiñik. Miquqtanik qupaglugu arriŋiñik cherubim-gich.

³² Niviŋŋaġlugu sisamanun napaqsranun acacia-m qiruanik, qaaliŋaruanun kaviqsuamik manigmik, niviŋŋaviliġḷugu, aasii iḷiḷugich sisamat tunŋaviich qatiqtuamik manigmik savaat.

³³ Inillaglugu talukiyaaq ataannun niksigaurat qiḷaŋani Tupqum, tunuanugluguasii talukiyaam Sivunniuġutim Kiguunniŋa imaqaqtuaq malġugnik uyaġagnik aglagviigñik. Talukiyaam avgusiġñiaġaa Salumaruaguruaq Ini Salumaniqtauruamiñ Inimiñ.

³⁴ Iḷiḷugu matuŋa Sivunniuġutim Kiguunniŋata.

³⁵ Siḷataani Salumaniqtauruam Inim niġġiviuraq uŋallam tuŋaanuglugu Tupqum suli naniqaġvik ikagnam tuŋaaŋanun sanmiruamun saniġaanun.

³⁶ “Paaŋanun Tupqum talukiyaaliuġlugu ukił̣haaġiksaamik suŋauraaqtuamik, tigluuraaqtuamik, suli kaviqsuamik imnaim mitquanik suli qupaŋaruanik miquqtanik.

³⁷ Taamna talukiyaaq tallimanik napaqsraliuġlugu acacia-m qiruanik, qaaliŋaruanik kaviqsuamik manigmik suli kaviqsuanik manigñik niviŋŋavigñik; tallimanik patukpagnik tunŋaviḷiuġlugich taapkua napaqutat.