Exodus 25 - Iñupiatun Mumiksat Uqalugiksuat

Aitchuutigiraksrat Ilaaguaqtauŋaruamun Tupiġmun

¹ Atanġum uqallautigaa Moses,

² “Uqautigisigitin Israel-gum kiŋuvaaŋich aitchuutiqaqulugich uvamnun. Akuqtuġlugich sunik kiñapayaaq aitchuutiqaġugniqpan.

³ Taapkua aitchuutauniaqtuat ukuaguruksraurut: kaviqsuaq manik, qatiqtuaq manik, suli patukpak;

⁴ ukił̣haaġiksuaq; suŋauraaqtaaq, tigluuraaqtaaq, suli kaviqsuaq imnaim mitqua; ukił̣haaq piḷiaguruaq nagruligum mitquŋiñik;

⁵ aŋusallum imnaim amiŋa kipitinŋaruaq kaviqsaamik; qisigiksaaq; acacia-m qirua;

⁶ uqsruksraŋannik nannich; avuuġutinik uqsruqtaaġunmun suli tivraġiksuanik avyuqtitautinun;

⁷ carnelian-nik suli uyaġagiksuanik iḷiraksranik aŋaiyyuliqsiqpaum kiapiġuŋanun satqagutaanullu.

⁸ Iñuich nappairuksraurut ilaaguaŋaniaqtuamik Tupiġmik uvamnun, iñuuyumauŋa akunġanni.

⁹ Savakkisigiksi suġautaksraŋiḷḷu tuvraġlugu sivunniuġutiga maniñiaqtaptun.

Sivunniuġutim Kiguunniŋa

¹⁰ “Kiguunniliuqsaqtusi acacia-m qiruanik, malġukipiaq tallimanik (45) titiġniñik takitigilugu, iñuiññaq tallimat malġugnik (27) titiġniñik siḷiktigilugu, suli iñuiññaq tallimat malġugnik (27) titiġniñik qutchiksigilugu.

¹¹ Qaaliġḷugu kaviqsuamik manigiksuamik iḷua qaaŋalu; aasii kaviqsuamik manigmik killiŋagun avaluliġḷugu.

¹² Sisamanik aqvaluqtuanik akigaunnaliuġlugu kaviqsuamik manigmiñ aasii atalugich sisamanun niuŋiñun, malġuullaalugik saniġallaaŋigñun akigautit.

¹³ Akigaunnaliuġlugu acacia-m qiruanik suli qaaliġḷugich kaviqsuamik manigmik,

¹⁴ aasii iḷuaqtił̣ł̣ugik akigaunnaŋigun saniġallaaŋigñi Kiguunniġum.

¹⁵ Akigaunnak piiqsuksrauŋitchuk nuvvisiŋaruak aqvaluqtuani tigummisini suli amuraksrauŋitchuk.

¹⁶ Tavraasii iḷiḷugik Kiguunniġmun malġuuk uyaqqak pitqurat agliusimaviŋik qaiññiaqtaka ilignun.

¹⁷ “Matualiuġlugu kaviqsuamik manigiksuamik, malġukipiaq tallimanik (45) titiġniñik taktigilugu suli iñuiññaq tallimat malġugnik (27) titiġniñik iraqtutigilugu.

¹⁸ Malġuugnik cherubim-liuġlusi kauŋaruamik kaviqsuamik manigmik,

¹⁹ isullaaŋigñun matuata iḷiḷugu. Savaglugik aulaiḷḷugu matuanun.

²⁰ Cherubim isaaġutiŋaniaġaik isaqqutik qulaagun matuata. Sanmisivlutik tuŋaanun matuata.

²¹ Iḷiḷugik malġuk uyaqqak aglaŋaruak iḷuanun Kiguunniġum aasii matua qaaŋanuglugu.

²² Kasuġniaġikpiñ tavrani, aasii qulaaniñ matum akunġakkun malġuuk cherubim, qaiññiaġitka iluqaisa pitquraksrirrutitka Israel-gum kiŋuvaaŋiññun.

Niġġiviuraq Irviksraŋa Punniġum Aitchuutauniaqtuam God-mun

²³ “Niġġiviḷiuqsaqtusi acacia-m qiruanik, iñuiññaq akimiaq atausimik (36) titiġniñik taktigilugu, akimiaq piŋasunik (18) titiġniñik iraqtutigilugu, suli iñuiññaq tallimat malġugnik (27) titiġniñik qutchiksigilugu.

²⁴ Qaaliġḷugu kaviqsuamik manigiksuamik suli kaviqsuamik manigmik killiŋagun avaluliġḷugu.

²⁵ Siñiġusiġḷugu piŋasunik titiġniñik siḷiktigiruamik avalulugu, aasii kaviqsuamik manigmik avataagun siñaaġusiġḷugu.

²⁶ Sisamanik akigaġviḷiuġlugu aqvaluqtuanik kaviqsuamik manigmik aasii iḷiḷugich sisamanun kaŋiġalluŋiñun, niuŋisa irvianun.

²⁷ Aqvaluqtuat tigummisauruat, akigaunnaŋaŋnun niġġiviuram, inillaktaksraurut qaniŋanun siñiġutaata.

²⁸ Akigaunnaliuġlusi acacia-m qiruanik aasii matulugich kaviqsuamik manigmik.

²⁹ Puggutauraliuġlusi, qallutinik, wine-qaġvigñik, iḷuturuaniglu puggutauranik wine-nun aitchuiviksranik. Iluqaġmiŋ taapkua piḷiaguruksraurut kaviqsuamik manigiksuamiñ.

³⁰ Niġġiviuraq inillaglugu sivuġaanun Sivunniuġutim Kiguunniŋata, suli ataramik niġġiviuramiittuksrauruq ilaaguaqtauruaq punniq aitchuutauruaq uvamnun.

Naparuaq Naniqaġvik

³¹ “Naparuamik naniqaġviḷiuqsaqtusi, kautaŋaruamik kaviqsuamik manigiksuamik, tunŋavialu naparuaŋalu; nauriaŋi iḷagilugich agmaaniŋaitchuat suli savaagulugu aulaiḷḷugu.

³² Itchaksrat qisiqsiutit saniġaŋiññiinniaqtut, piŋasuullaalugich saniġallaaŋigñi.

³³ Qisiqsiutillaat itchaksrauruat aasii piŋasunik qiñiyunaqutiqaġniaqtut, naurianik qiññaqaġlugich almond nauriaŋisun aŋmaaniŋaitchuatun akutuqpaktun.

³⁴ Naparuaŋa nannim sisamanik qiñiyunaqutiqaġniaqtuq naurianik almond nauriaŋisun, aŋmaaniŋaitchuanik suli nauriat akutuqpaŋiññiglu.

³⁵ Atausiuruksrauruq aŋmaaniŋaitchuaq nauriaq ataani piŋayuiguruat qisiqsiutit.

³⁶ Aŋmaaniŋaitchuallu nauriat, qisiqsiutillu, suli nannim napaviksraŋa savaaguruksraurut aulaiḷamiñ kautaqtamiñ kaviqsuamiñ manigiksuamik.

³⁷ Tallimat malġugnik naniḷiuġlusi naniqaġviksramun aasii inillaglugich qaummatitchumiñaqsiḷugich tuŋaanun sivuġaŋata.

³⁸ Tiggutiksriuġlusi suli alliġauranik kaviqsuamiñ manigiksuamik.

³⁹ Atuġlusi piŋasukipiat akimiaq (75) pounds-tun uqumaisigiruanik, kaviqsuamik manigiksuamik naniq nappaviksriuġuvsiuŋ iluqaisalu suġauttapayauraŋich.

⁴⁰ Qaunagilusi tuvrapiaġlugu piraksraun maniŋaraġa ilivsiññun iġġimi.