Exodus 24 - Iñupiatun Mumiksat Uqalugiksuat

Sivunniuġun Inillaktaumman

¹ Atanġum uqautigaa Moses, “Mayuġiñ iġġimun uvamnuglutin, ilviḷḷu, Aaron-lu, Nadab-lu, Abihu-lu, piqatigilugich piŋasukipiaq quliuruat (70) aullariŋich Israel; aasii uŋasiuraŋŋavsi suli, putchumausi nanġaiḷusi.

² Kisivił̣hiñaq qalliñiaġiŋma, mayuqatikpiñŋił̣aaq. Allat unnii iñuich mayuqtuksrauŋipiaġataqtut iġġimun.”

³ Moses-gum uqallautiyyaġniġai iñuich Atanġum piraksriutipayaaŋiññik suli iluqaiññik maliġuagaksrautiŋiññik, aasii iñupayaat kiuniqsut atautchikun, “Savaaġiniaġikput sunapayaaq Atanġum uqallausiġiraŋa.”

⁴ Moses-gum agliutiniġai iluqaisa Atanġum uqaluŋich. Uvlaatchaurami uvlaakumman ikipkaiviḷiuŋaruq killiŋanun iġġim aasii nappaivḷuni qulit malġugnik (12) uyaġagruanik, naałługich qulit malġuuruat (12) Israel maŋŋuġillaaraŋich.

⁵ Tavraasii tilisiñiqsuq nukatpianik, aasii ikipkaiñiqsut aitchuutinik Ataniġmun suli aitchuivḷutiŋ pamiqsaanik iḷammiuġniġmun.

⁶ Moses auksraqłuni avvaŋanik augum katiqsramiñ pamiqsaaniñ iḷuturuat immiqsuġniġai; aasii avvaŋa siqił̣ł̣autiŋagaa ikipkaivigmun.

⁷ Tavraasii tiguniġaa makpiġaaŋa Sivunniuġutim, agliusimaviat Atanġum piraksriutiŋisa, aasii taiguaqługu iñugnun. Uqallaktut, “Kamaginiaġikput Ataniq suli savaglugu sunapayaaq piraksriutigiraŋa.”

⁸ Tavra Moses-gum auk iḷuturuaniittuaq tiguvlugu siqił̣ł̣autiŋagaa iñuich uqallakłuni, “Uuma augum nalupqinaiġaa sivunniuġutaa Atanġum tunŋaruaq ilivsigñun qaiññamigich iluqaisa piraksriutit.”

⁹ Moses-lu, Aaron-lu, Nadab-lu, Abihu-lu, suli piŋasukipiaq qulit (70) aullarriŋich Israel iġġimun mayuġniqsut;

¹⁰ aasii tautugniġaat God-iŋat Israel-gum kiŋuvaaŋisa. Ataani isigaŋiksa inniqsuq turviliaq uyaġagiksaamiñ suŋauraaqtaatun qiḷaktun.

¹¹ God-im pimaqłuŋaiñŋagai taapkua aullarriŋich Israel-gum kiŋuvaaŋich; iḷitchuġiŋaniġaat God tautukkamirruŋ, aasii niġivḷutik imiqhutiglu.

Moses Mount Sinai-mi

¹² Atanġum uqallautigaa Moses, “Mayuġiñ iġġimun uvamnuglutin, aasii tavraniinŋaqpich, aitchuġniaġikpiñ malġugnik uyaġagnik saapaqayagnik aglaamnik pitquraliamnik iḷisaurrutigitquvlugich iñugnun.”

¹³ Moses-lu ikayuqtiniḷu Joshua paġnaniqsuk, aasii Moses mayunagutiŋaruq God-im iġġiŋanun.

¹⁴ Moses-gum uqallautigai aullarit, “Utaqqisiguk uumani utiġataqtillunuk. Aaron-gumlu Hur-mlu uvva itqatigigaasi; aasii kiñapayaaq atinġiutiqaqtuaq natqiktuksrauruamik ullakkumiñaġaik.”

¹⁵ Moses mayuġaa Mount Sinai, aasii nuviyam taluŋagaa iġġiq.

^16-17 Qaumaniqpaŋata Atanġum turviginiġaa iġġiq. Israel-gum kiŋuvaaŋiññun qaumaniŋa qiññaqaġniqsuq ikualaruatun qaaŋani iġġim. Nuviyam matuniġaa iġġiq itchaksrani uvluni, aasii tallimat malġuanni uvlut Atanġum ququulaŋagaa Moses nuviyamiñ.

¹⁸ Moses-gum mayuŋagaa iġġiq nuviyam iḷuanun. Tavrani inŋaniqsuq malġukipiani (40) uvluni suli unnuani.