Exodus 23 - Iñupiatun Mumiksat Uqalugiksuat

Isivġiqsaunikun Nalaunŋaruakullu Aŋalatchiñiq

¹ “Siamitchiñasi iḷumun inŋitchuanik, suli ikayuġnasiuŋ pasirauruaq sagluuġlusi.

² Maliqqugnasigik iñugiagniqtauruat killukun igliqtuat naakka tunulliḷiġlugich uqaluvsigun isivġiiñiġmi.

³ Tunulliḷiqsuġnagu iḷiappaunisiññaġlugu isivġiqsauruaq.

⁴ “Apqusaaġuvsiuŋ akiḷḷiivsi immuliviŋa naakka kakaktiŋa aullauruaq, utiqtitchiuŋ ilaanun.

⁵ Kakaktiŋa uumigirivsi ulġuŋaniqpan nanmaqaqpaił̣ł̣uni, ikayuqsiuŋ kakaktiŋa makitqiksillugu; qaaŋiqsaaqsiññaŋaiġḷugu.

⁶ “Isivġiutaiññasi iḷiappauruamun isivġiqsivigmukpan.

⁷ Iḷumun inŋitchuakun pasiññignasi, suli suŋiḷaaq iñuk tuqutaupkaġnasiuŋ, qanuq suliqutigiŋaiġñiaŋitkiga iñuk savaktuaq tainna pigiisigiruamik.

⁸ Akuqtuġnasiuŋ akiḷiun saglutautikun, sagluqipkaqtauruat tautullaiġuugaat suna iłuaqtuaq suli maqułługu savaaŋat patchisaitchuat.

⁹ “Aŋalamaqługnasiuŋ aaŋŋaġmiu; iḷisimarusi qanuqitilaaŋa aaŋŋaġmiuguruni, qanukkii ilivsi aaŋŋaġmiuguŋarusi Egypt-mi.

Tallimat Malġuŋat Ukiut suli Tallimat Malġuŋat Uvlut

¹⁰ “Itchaksrani ukiuni nautchiivigisiuŋ nunaksi suli katillugich nauruat.

¹¹ Aglaan tallimat malġuanni ukiut nautchiiñasi, suli pukugnasi tavrani nauruanik. Iḷiappauruat niġiyumiñaġaich nauruat, suli niġrutit niġiyumiñaġaich iḷakut. Tainna-suli savaglugich grape-giḷḷu olive-giḷḷu napaaqtut nautchiivisi.

¹² “Savaiññiġmi savaglusi itchaksrani uvluni, aglaan savaŋnasi tallimat malġuanni uvlut, kivgasiḷu aaŋŋaġmiullu savaktigirasi, suli pamiqsaasi unaŋuiqsiġumaut.

¹³ “Naalaġnisigiŋ iluqaisa uvaŋa, Atanġum, uqautigiŋaratka ilivsiññun. Aŋaiyyunasi allanun god-inun; tusaġnaqtinnasigik unnii atiŋich.

Piŋasut Kamanaqtuat Quvianġuviit

¹⁴ “Quvianġutigilugich piŋasuiqsuaġlugu ukiuq qutchiksiḷiġutaulugich uvamnun.

¹⁵ Tatqiŋani Abib, tatqimi aullaġvivsiññi Egypt-miñ, quviasugvigilugu Niqinaqiniq Puvlaksautaitchuamik Punniġmik piraksriusiptun ilivsiññun. Niġiñasi punniġmik imaksraligaamik taapkunani tallimat malġugni uvluni. Qaiñasi nanġaġiaġluŋa qaġġirrigaluaġnasi aitchuunmik.

¹⁶ “Quviasugvigilugu Kivluiñiġum Niqinaqivia nauriavsiññik kivluirraqsiguvsi. “Quviasugvigilugu Katiqsriñiġum Niqinaqivia ukiaksraami, katitkuvsigik siiġñat siiġñalivivsiññiñ.

¹⁷ Ukiutuaġaġikpan ukunani piŋasuni niqinaqiviŋñi aŋutipayaurat nanġaġiaqtuksraġigaat Ataniq God.

¹⁸ “Aitchuiñasi puvlaksautiqaqtuanik punniġnik aitchuiguvsi pamiqsaamik taputilugu auŋa uvamnun. Qaunnaŋit niġrutit aitchuutauruat uvamnun taapkunani niqinaqiniġni aannagutaaqtittuksraġiŋitkisi uvlaaġataqtillugu.

¹⁹ “Ukiutuaġaġikpan qaġġisilugich igluanun Atanġum God-ivsi sivulliit palauvaksrat katiqsrasi. “Iganasiuŋ imnaiyaaq naakka nagrulik aakaŋata immuani.

Unniqsuqłiisauruat suli Piraksriutit

²⁰ “Aullaqtitchiñiaqtuŋa isaġuligmik sivuvsiññi qaunaksriksravsiññik iglaullavsi qaġġisilusiḷu inimun itqanaiyaŋaramnun.

²¹ Isaġulik naalaġniyumagiksi suli kamagilugu. Akiḷḷiqsruġnasiuŋ, qanuq ataniġnaqutiksriñŋagiga. Suliqutigiŋaiġñiaŋitkaasi tainna paaqłakkuvsiuŋ.

²² Aglaan kamagiguvsiuŋ suli kamagilugu sunapayaaq piraksriutiga, aŋuyaŋniaġitka akiḷḷipayaurasi.

²³ Isaġuligma sivulliuġniaġaasi, nunaŋiññuutiniaġaasi Amor-miut, Hit-miut, Periz-miut, Canaan-miut, Hiv-miut, suli Jebus-miut, aasii suksraunġiġñiaġitka.

²⁴ Purviginasigiŋ iñuuraqpaŋich nanġaġlugiḷḷu suli akuqtuġnasigik ukpiqqutimiktigun pilġusiŋich. Suksraunġiqsuksraġigisi iñuuraqpaŋich suli siqumillugich napaqutaliaŋich uyaġaich.

²⁵ Nanġaġuvsiñŋa uvaŋa Ataniq God-iksi quviasaaġutiksriññiaġivsi niqinik imiġmiglu suli naŋirrutisi piiġḷugich.

²⁶ Nunavsiññi aġnapayauraq iġñiayaaġniaŋitchuq naakka miqłiqtuiḷḷuni. Iñuuniqtuniaqtusi.

²⁷ “Iqsigiliqsinniaqtuŋa akiḷḷiqsruqtuanun ilivsiññik; alapitillugiḷḷu akiḷḷisi, suli iluqaisa qimaapkaġniaġitka.

²⁸ Akiḷḷiqsruqtisi iqsittualapkaġniaġitka. Aullaqtitaġniaġitka Hiv-miut Canaan-miut, suli Hit-miut sivunmun iglaupkaqtillusi.

²⁹ Aullaqtitaġniaŋitkitka atausimi ukiumi; qanuq tainna piguma, nuna iñuiġñiaqtuq, suli niġrutit iñugiaksivaiññiaqtut ilivsiññun.

³⁰ Aglaan, aullaqtitaġniaġitka iñugiakiñaaqtaġlugich, naamasiḷġataqtillusi ilivsi nuna pigiliutisaġuvsiuŋ.

³¹ Killiḷiġniaġiga nunaksi iḷuliaŋaniñ Red Sea-m Mediterranean Sea-muaglaan; suli nunagluktuamiñ Euphrates River-muaglaan. Ataniġnaqusiġñiaġivsi iñuŋiñun nunam, aasii aullaqtitaġniaġisi sivunmun iglaullavsi.

³² Sivunniuqatiginasigik naaggaunnii iñuuraqpaŋich.

³³ Taavapkua iñuich iñuuniaqtinnasigik nunavsiññi, tainna pigaluaġuvsi piḷuusiqipkaġniaġaasi paaqłagluŋa. Aŋaiyyuguvsi iñuuraqpaŋiñun, tuqqunmun nigatchiaqtitauniaqtusi.”