Exodus 21 - Iñupiatun Mumiksat Uqalugiksuat

Aŋalanniŋat Kivgat

¹ “Israel-gum kiŋuvaaŋich ukuniŋa pitquraksritkich:

² Tauqsiġuvich Hebrew-mik kivgamik, savautiniaġaatin itchaksrani ukiuni. Tallimat malġuanni ukiut kivgauŋaiġñiaqtuq sumikunnii akiḷiaksraiññiaġmiuq.

³ Tuvaaqataitpan kivgaliutikami, aullautiniaŋitkaa tuvaaqasiutirani tavrani; aglaan tuvaaqasianiŋakpan kivgaliutikami, aullautiyumiñaġaa nuliani.

⁴ Umialiŋata tuvaaqatiksriñŋakpauŋ aasii iġñiqaŋakpan naakka paniqaŋakpan, aġnaallu miqłiqtuŋiḷḷu umialiŋata piginiaġaich, aasii aŋun kisimi aullaġniaqtuq.

⁵ Aglaan kivgauruaq uqallakpan nakuaġiniḷugich umialini, nulianiḷu, qitunġaniḷu, kivgauŋaiġuŋił̣ł̣uniḷu,

⁶ tavra umialiŋata God-im sivuġaanuutiraksraġigaa. Tavraniasii upkuamuutilugu putuniaġaa siutiŋa. Tavra kivgaġiniaġaa iñuuniqtutilaaŋatun.

⁷ “Aŋutim tunikpauŋ paniñi kivgautqulugu, kivgauŋaiġumiñaitchuq aŋutitun kivgauŋaiḷḷaruatun.

⁸ Tuniraukpan aŋunmun nuliaqavsaaġuktuamun, aglaan aŋutim iviġaumagiŋitpagu tunitqiktuksraġigaa aapaŋanun; umialiŋata tuniyumiñaitkaa allaniñ nunaniŋŋaqtuanun, maliġuaŋitkaakii unniqsuqłiutini.

⁹ Aŋun tauqsiqpan aġnamik kivgamik qaisaksramiñik iġñiġmiñun, aŋalattuksraġigaa nanmiñiq panimisun.

¹⁰ Aŋun nuliavsaaġumi, nuliaqqaani niqiqaqtittuksraġigaa annuġaaqaqtittuksraġigaa miqłiqtuqallayumiñaqtuġlu ilaaniñ.

¹¹ Taŋŋiqsinŋitpagu piraksraġirani nuliaqqaamigun, kivgauŋaiġumiñaqtuq akiḷiigaluaġnani.

Pitqurat Pił̣ł̣aktaġnikun

¹² “Kiñapayaaq anaunnigluni iñuaqpan tuqutauruksrauruq.

¹³ Aglaan pisaaġigaluaġnagu tuqutpagu, annaksaġumiñaqtuq inimun nalunaiqsamnun, tavrani aasii anayanniuġniaŋitchuq.

¹⁴ Aglaan kiña sivunniuqqaaġluni iñuaqpan, tuqutauruksrauruq, annaksaġaluaqpanunnii ikipkaivimñun.

¹⁵ “Kialiqaa anaukpauŋ aapani naakka aakani tuqutauruksrauruq.

¹⁶ “Kiñapayaaq payarivḷugu aullaurriruaq iñugmik, tunisuglugu naakka kivgaġisuglugu, tuqutauruksrauruq.

¹⁷ “Kiñapayaaq uqamaqłuurriruaq aapamiñik naakka aakamiñik tuqutauruksrauruq.

^18-19 “Qinnaglutik iñuum anaukpauŋ alla iñuk uyaġagmik naakka qakiġlugu aglaan tuqunŋiḷḷugu, tatavsaqtauniaŋitchuq. Anniqsauŋaruaq mavsiqsuksraukpan aasii aquvatigun pisuarraqsikpan ayauppiaqtuġluni, pimaqłuktiŋata akiḷiqsaksraġigaa akiññaktaaksrautikkaluaŋanik savakkumi qaunagilugulu mamilġataqtillugu.

²⁰ “Kivgaqaqtuam qirugmik anaullaqpauŋ kivgani, aŋutaugaluaqpan naakka aġnaugaluaqpan, aasii kivgauruaq tavrani tuquluni, kivgalik tatavsaqtauniaqtuq.

²¹ Aglaan kivgaq tuquŋitpan atausimi naakka malġugni uvlugni, kivgalik tatavsaqtauniaŋitchuq. Qanukkii taamna kivgak ilaata pigigaa.

²² “Aŋutit qinnaglutiŋ anniqparruŋ siŋaiyauruaq aġnaq tammaipkaqtaallaan siŋaiyaaŋanik, aglaan sukun allakun anniŋaiḷḷuni, anniġñiktuaq aġnamik akiḷiiruksrauruq qanutupayaaq aŋutaat apiqsrikpan, iviġaumagiraŋatigun isivġiqsirit.

²³ Aglaan aġnaq anayanniuġnaqtuamik anniŋakpan, tatavsautauniaqtuq iñuggun iñuggutaanun,

²⁴ iri irimun, kigun kigunmun, argak argagmun, isigak isigagmun,

²⁵ uutiqtinniq uutiqtinniġmun, kiḷḷiq kiḷḷiġmun, tigluuraġniq tigluuraġniġmun.

²⁶ “Iñuum iraġuqpauŋ aŋun naakka aġnaq kivgani ayaupkaqtaallaan, kivgauŋaiqsittaksraġigaa akiḷiutigisaġlugu iraanun.

²⁷ Kigutaurraaġumiuŋ, kivgauŋaiqsittaksraġigaa akiḷiutigisaġlugu kigutaanun.

Pitqurat Pamiqsaaqaqtuanun

²⁸ “Immulivium aŋusalluata tuqutpauŋ iñuk nagruglugu, tuqutaksrauruq miḷḷuuġlugu uyaġagnik, suli niqaa niġiruksraġiŋitkaat; iñua aglaan tatavsaqtauniaŋitchuq.

²⁹ Aglaan nagruiraġaġuukpan iñugnik aasii iñua kiliktauŋagaluaŋŋaġmi avaluligaamiitinŋiññiqpagu tavra tuqutchiñiqpan iñugmik, tuqutaksrauruq miḷḷuuġlugu uyaġagnik, aasii tavra iñua tuqutaksrauniaġmiuq.

³⁰ Aglaan pamiqsaaqaqtuaq taamna akiḷiipkaqparruŋ annautisaġlugu iñuggutini, akiḷigaksraġigaa iluqaan.

³¹ Aasii taamna immulivium aŋusallua tuqutchikpan aŋutaiyaamik naakka aġnaiyaamik, pitquraliaguruaq maliġuaġniaġaat.

³² Aasii suli tuqutchikpan kivgamik, aŋunmik naakka aġnamik, taavruma niġrutim iñuata akiḷiġñiaġaa kivgam iñua iñuiññaq qulinik (30) qatiqtuanik manigñik, aasii taamna aŋusalluq miḷḷuuġlugu uyaġagnik tuqullugu.

³³ “Iñuum matuiqpauŋ iḷuqsraq naakka nivakkumi aasii matuŋiḷḷugu, aasii immulivium aŋusallua naakka kakakti katakpan tavruŋa,

³⁴ akiḷiqsaksraġigaa taaptuma pamiqsaam akia. Akiḷiiruksrauruq manigmik iñuanun aasii ilaata pigiyumiñaġaa tuqutaq pamiqsaaq.

³⁵ Immulivium aŋusalluata tuqutpauŋ allam iñuum immulivium aŋusallua, tuniruksraġigaak iñuuruaq aasii aviglugu manik; suli autaaġniaġmigaak niqaa tuqutam pamiqsaam.

³⁶ Aglaan iḷisimakparruŋ taamna aŋusalluq nagruksisuutilaaŋanik sivuani aasii iñuata avaluligaamiitinŋiññiqpagu, aitchuqtuksraġigaa allamik iñuuruamik, aglaan pigiyumiñaġaa tuquŋaruaq.