Exodus 20 - Iñupiatun Mumiksat Uqalugiksuat

Qulit Piraksriutit

¹ God uqallaktuq inna:

² “Uvaŋa Ataniq God-iksi Egypt-miñ annaurriksi, kivgauvivsigñiñ.

³ “Aŋŋuu, allanik god-iqaġniaġnasi uniuġluŋa.

⁴ “Aŋŋuu, iñuuraqpaliuġniaġnasi tuvraġlugich sut qiḷagmiittuat, naagga nunamiittuat, naaggaunnii immamiittuat nunam ataani.

⁵ Purviginiaġnasigich iñuuraqpaich naaggaunnii aŋaiyyuvigilugich, qanukkii uvaŋa Ataniq, ilivsi God-iksi, sigñaturuŋa. Piḷuusiqiguvich tatavsaġniaġikpiñ kiŋuvaatillu tatavsaġniaġitka piŋayuannun, sisamaŋannunaglaan.

⁶ Iḷisimapkaġiga aglaan aulayaitchuaq nakuaqqutiga taimuŋa kisiññaitchuanun kiŋuvaaġiiñun nakuaqsriruanun uvamnik kamaksriruanullu pitquramnik.

⁷ “Aŋŋuu, uqamaqłuutiginiaġnagu atiġa, qanuq uvaŋa, Ataniq God-iksi, tatavsaiñiaqtuŋa uqamaqłuutigikparruŋ atiġa.

⁸ “Itqaumagilugu sivuniŋa Sabbath salumapkaġlugulu.

⁹ Itchaksranik uvlunik savagviksraqaqtusi,

¹⁰ aglaan tallimat malġuat uvlut unaŋuiqsiġviuniaqtuq nalunaiqsauluni uvamnun. Taaptumani uvlumi kiña unnii savagniaŋitchuq—ilivsi, miqłiqtusi, kivgasi, pamiqsaasi, naaggaunnii iglaat allaniñ nunaniñ iñuuniaqtuat nunavsiññi.

¹¹ Itchaksrani uvluni uvaŋa Atanġuruaŋa savaŋagiga nuna, qiḷak, taġiuq, suli sunapayaaq ittuaq taapkunani, aglaan tallimat malġuanni uvlut unaŋuiqsiŋaruŋa. Tavra tainnamik uvaŋa Atanġuruaŋa ilaaguaŋagiga nalunaiqł̣ugu Sabbath salumarualiuqługulu.

¹² “Qiksigilugik aapallu aakallu, iñuuniqtuyumausi nunami Ataniq God-ivsi aitchuutaani ilivsiññun.

¹³ “Aŋŋuu, iñuaġniaġnasi.

¹⁴ “Aŋŋuu, allatuġniaġnasi.

¹⁵ “Aŋŋuu, tigligaġniaġnasi.

¹⁶ “Aŋŋuu, saglutiginnigniaġnasi iñugnik.

¹⁷ “Aŋŋuu, kaviuġiniaġnagu allam iñuum igluŋa; kaviuġiniaġnagu nuliaŋa, kaviuġiniaġnagich kivgaŋich, pamiqsaaŋich, kakaktiŋich, naaggaunnii supayaat ilaan pigiraŋich.”

Iñuich Iqsiḷiġmata

¹⁸ Iñuich tusaagamirruŋ kallualaruaq suli nipauqłuktaun suli tautukługu igniġuuqpatitaqtuaq avyualaruaġlu iġġiq, makitallaġmiŋ uŋasikł̣utiŋ iqsitchakłutiŋ uuliksiŋarut.

¹⁹ Uqallautigaat Moses, “Uqautiguvsigut naalaġniñiaqtugut; aglaan uvva iqsirugut God-im uqautikpatigut tuquniaġnasugiluta.”

²⁰ Moses-gum kiugai, “Iqsiñasi; God-im uuktuqsiññaġaasi qiksikkutiqpaqaquvluni ilaa, piḷuusiqitquŋił̣ł̣usiḷu.”

²¹ Aglaan tavra iñuich aulagaluaġnatiŋ makitaŋarut uŋasikhutiŋ, aasii Moses kisimi qalliŋagaa God taaqtuami nuviyami ittuaq.

Pitqurat Ikipkaiviḷiuġnikun

²² Atanġum tiliŋagaa Moses uqautitquvlugich Israel-gum kiŋuvaaŋich: “Qiñiŋagivsiñŋa qanuq uqautikavsi qiḷaŋmiñ.

²³ Iñuuraqpaliuġnasi god-iksravsiññik qatiqtuaniñ naakka kaviqsuaniñ manigñiñ iḷagiluŋa aŋaiyyuviksravsiññik.

²⁴ Aitchuiviḷiuqsiñŋa nunamiñ, aitchuivigilugu aasii imnaigutivsiññik suli pamiqsaavsiññik ikipkaġlugich iḷammiuġutauniaqtuanik aitchuutinik. Sumipayaaq inimi nalunaiqsamni aŋaiyyuvigitquvluŋa, ullagniaġivsi aasii quviasaaġunmik aitchuġlusi.

²⁵ Aitchuiviḷiuġuvsi uyaġagmik uvamnun, nappaiñasi sanaŋaruanik uyaġagnik, qanukkii ipiktuamik savalġunmik atuġuvsi uyaġagnun, atuġumiñaiġñiaġisi uvamnun.

²⁶ Nappaiñasi aitchuivigmik mayuġnaqtuamik; tainna piguvsi, nalikkaasi qiñiġnaqpiaqtut.