Exodus 19 - Iñupiatun Mumiksat Uqalugiksuat

Israel-gum Kiŋuvaaŋich Mount Sinai-mi

^1-2 Israel-gum kiŋuvaaŋich aullaŋarut Rephidim-miñ, aasii sivullianni uvlut piŋayuanni tatqich aullaanikamiŋ Egypt-miñ nunagluktuaŋanuŋarut Sinai-m. Tavruŋa nullaŋarut sivuġaanun Mount Sinai-m,

³ aasii Moses iġġi mayuŋagaa kasuġiaqługu God. Atanġum ququaŋagaa iġġimiñ aasii uqaluksrił̣ł̣ugu Israel-gum kiŋuvaaŋiññun, Jacob kiŋuniiŋiññun:

⁴ “Tautuŋagisi aŋalataġikapkich Egypt-miut suli qaunagikavsi tiŋmiaqpaum usiaqsiqtinmatun piayaani isaqqugmiñi, aasii qaġġisivlusi mauŋa uvamnun.

⁵ Tavra, kamagiguvsiñŋa suli atuġlugu sivunniuġutiga, uvaŋa nanmiñiq iñuginiaġivsi. Iluqaan nuna uvaŋa pigigiga, aglaan ilivsi naliġaktaaġivlusi uvaŋa iñuginiaġivsi,

⁶ iñuich nalunaiqsauŋaruat uvamnutualuk, suli ilivsi savautiniaġivsiñŋa aŋaiyyuliqsaulusi umialgutimni. Tavra uqaluksrasi Israel-gum kiŋuvaaŋiññun.”

⁷ Tavraasii Moses atqaqłuni ququaŋagaich aullarrit atautchimun, aasii kilikługich Atanġum uqalupayauraŋiññik ilimiñun.

⁸ Tavra iluqaġmiŋ iñuich kiuniqsut atautchikun, “Sunapayaaq piñiaġikput Atanġum uqallautigiraa,” aasiiḷi Moses-gum kilgutigiŋagaa taamna Ataniġmun.

⁹ Atanġum uqallautigaa Moses, “Ullagniaġivsi nuviyaqłukun, iñuich tusaayumaut uqaġumnuk aasii ukpiġiliġḷutin tavraŋŋaaglaan.” Moses-gum uqallautigaa Ataniq iñuich kiggutaannik,

¹⁰ aasii Atanġum kiugaa, “Ullaglugich iñuich uqautisaġitin uvlupak uvlaakulu itqanaiyaqulugich atautchimugniksraptignun. Iqaġiruksraġigaich annuġaatiŋ

¹¹ aasii itqanaiḷḷutiŋ uvlaakutqigu. Taaptumani uvlumi atqaġniaqtuŋa Mount Sinai-mun, iñupayaanun tautukkumiñaqsiḷuŋa.

¹² Nalunaiġḷugu avataa iġġim iñuich avluqtuksraġiŋitchaat, aasiisuli uqallautilugich mayuquŋiḷḷugu iġġi qallitquŋiḷḷugulu. Nallipayaavsi tutikpauŋ tuqutauruksrauniaqtuq;

¹³ tuqutauruksrauniaqtuq miḷḷuuġlugu uyaġagnik naakka pisiglugu qaġrunik, iñugniñ aksiktaugaluaġnani. Taamna tunŋaruq iñugnullu niġrutinullu; tuqutauruksrauniaqtut. Aglaan nipauqłuktaun nivliqpan, tavra iñuich mayuġumiñaġniaqtut iġġimun.”

¹⁴ Tavraasii Moses atqaqhuni iġġimiñ uqautiŋagai iñuich itqanaiyaquvlugich atautchimugniksramignun. Tavra iqaqsriŋarut annuġaamignik,

¹⁵ suli Moses-gum uqautigai, “Itqanaitchumausi uvlaakutqigu suli siñiqatiqaġnasi utaqqiḷḷavsi.”

¹⁶ Uvlaami piŋayuanni uvlut kallualaŋaruq suli igniġuuqpatitaqhuni, nuviyaqłuk nuiŋaruq iġġimi, suli nipatupiaġataqtuaq nipauqłuktaun tusaaŋagaat. Iluqaġmiŋ iñuich nullaummiruat uuliksiŋarut iqsiḷiqłutiŋ.

¹⁷ Moses-gum aullatiŋagai nullaummivianniñ kasuġiaqługu God, aasii makitaŋarut sivuġaani iġġim.

¹⁸ Ataniq atqaġman tavruŋa ignikun iluqani Mount Sinai avyum matuŋagaa. Avyuq putchualaŋaruq iġġimiñ, aasii iġġiq iluqaġmi aulaliqtuŋaruq.

¹⁹ Nipaa nipauqłuktautim nipatusisaiññaqpaŋaruq. Moses uqallaktuq, aasii God-im kiuniġaa kallukun.

²⁰ Ataniq atqaŋaruq qaaŋanun Mount Sinai-m aasii ququaqługu Moses qaaŋanuquvlugu iġġim. Moses mayuŋaruq

²¹ aasii Atanġum uqallautigaa, “Atqaġlutin kiligiakkich iñuich qaaŋiquŋiḷḷugu killi qiñiġiaqsaġluŋa; tainnatuaġumiŋ iñugiaktuat tuquniaqtut.

²² Aŋaiyyuliqsit unnii qalliruat uvamnun salumaruksraummiut tatavsaqtausuŋitkumiŋ.”

²³ Moses uqallautigaa Ataniq, “Iñuich mayuġumiñaitchut, qanukkii piraksriŋagivsigut salumaruaġitquvlugu iġġi nalunaiġḷugulu avataa.”

²⁴ Atanġum kiugaa, “Atqaġiñ qaġġisisaqtuġuŋ Aaron. Aglaan aŋaiyyuliqsiqpaiḷḷu iñuiḷḷu qaaŋiqsuksraġiŋitkaat killi uvamnuksaġutiŋ, tainna pikpata tatavsaġniaġitka.”

²⁵ Tavra Moses atqaŋaruq iñugnukhuni aasii uqautivlugich Atanġum uqaluŋiññik.