Exodus 18 - Iñupiatun Mumiksat Uqalugiksuat

Jethro-m Ullaqattaaġmagu Moses

¹ Moses-gum aaparuaŋata Jethro-m, aŋaiyyuliqsiqpaum Midian-mi, tusaaŋaniġai iluqaisa savaaŋich God-im Moses-mun suli iñuŋiñun Israel aullautimmagi Egypt-miñ.

² Moses-muŋaruq qaġġisivlugu Moses nuliaŋa Zipporah, uniktauŋaruaq,

³ suli Gershom-lu Eliezer-lu, malġuuk iġñiŋik. (Moses uqallaŋaruaq, “Iglaaguŋaruŋa allauruami nunami,” tainnamik atchiŋaniġaa iġñini Gershom-mik.

⁴ Uqallakhuni suli, “God-iŋata aapaŋma ikayuŋagaaŋa suli annautivluŋa tuqutauniksrakkaluamniñ umialiŋaniñ Egypt,” tainnamik atchiŋagaa igḷua iġñini Eliezer-mik.)

⁵ Jethro-m ullaŋagaa Moses qaġġisivlugi nuliaŋa iġñiŋiglu nunagluktuakun, Moses nullaŋapkaqtillugu qaniŋani iġġiŋata God-im.

⁶ Kiliktitchaqtuŋagaa Moses qaiñiaġnivḷutiŋ,

⁷ tavraasii Moses-gum paaŋagaa, pułłuniasii sivuġaanun, suli kunikł̣ugu. Qanuqinmagaaġutillaaŋaruk aasii isiqhutiŋ Moses tupqanun.

⁸ Moses-gum quliaqtuaġutiŋagaa Jethro iluqaiññik Atanġum savaaŋiññik umialigmun suli iñuŋiññun Egypt annautisaqługich Israel-gum kiŋuvaaŋich. Suli uqautivlugu siġġaġniuġutimignik iglaullaġmiŋ suli qanuq Atanġum annautiraġimmatiŋ.

⁹ Tusaayugaaqami Jethro iluqaiññik tamatkuniŋa, quyapaluŋaruq

¹⁰ suli uqaqhuni, “Nanġaqtauli Ataniq, annautimmasi umialigmiñ suli iñuŋiññiñ Egypt! Nanġaqtauli Ataniq, annaurriruaq iñugmiñik kivgauniŋanniñ!

¹¹ Tavra iḷitchuġiruŋa Ataniq kamanałhaaqtilaaŋanik iluqaiññiñ god-it, qanukkii tainna savaŋamaruq Egypt-miut aŋalanmatigik Israel-gum kiŋuvaaŋich anmuksruqługich.”

¹² Tavraasii Jethro qaġġirriŋaruq aitchuutiksramik ikipkaaksramik suġaiḷḷugu suli allanik aitchuutiksranik God-mun; aasii Aaron-lu iluqaġmiglu aullarriuruat, Israel-gum kiŋuvaaŋich, niġiqatigiyyaŋagaat Moses aaparuaŋa, takkuani God.

Isivġiqsinik Nalunaiqsimmata

¹³ Uvlaakumman Moses-gum atiŋirrutiqaqtuat natqiksruŋagai. Aptallagniqsuq uvlaamiñ qaŋa unnuaġataqtillugu.

¹⁴ Jethro-m tautukkamiuŋ iluqaan Moses-gum savaaksraŋa, apiġiniġaa, “Immaimña suliqiutiqpakpigi iñuich? Summan tamanna kisiviñ savaaġiviuŋ, marra iñuich makitaruat uvlaamiñ unnuaġataqtillugu utaqqiruat uqaqatigisukłutin?”

¹⁵ Moses-gum kiugaa, “Savaaġiraksraġigiga qanukkii iñuich qairaqtut uvamnun iḷitchisukłutiŋ God-im pisuutaanik.

¹⁶ Malġuk iññuk atiŋirrutiqaqamik, qaisuuruk uvamnun, aasii sivunniġuuruŋa nalliak nalaunŋatilaaŋanik, suli uqautisuugitka God-im piraksriutiŋiññik pitquraŋiññiglu.”

¹⁷ Tavraasii Jethro uqallaktuq, “Taamna uvva savaaġiŋiññiġiñ iłuaqtuakun.

¹⁸ Minġuliġñiaqtutin taputilugich makua iñuich. Taamna savaaq aŋivaitchuq kisivich savaaġiniaġupku.

¹⁹ Uqaullaallagukkikpiñ nakuuruamik, aasii God-im itqatiginiaġaatin. Iłuaqtuq piraukavich iñugnun sivuġaani God-im qaġġisivlugich atiŋirrutiŋich ilaanun.

²⁰ Iḷisautiruksraġigitin God-im piraksriutiŋiññik pitquraŋiññiglu suli kaŋiqsipkaġlugich qanuq iñuuniaqtuksrautilaaŋiññik qanuġlu piruksrautilaaŋiññik.

²¹ Aglaan una iḷagilugu, naliġaglutin piḷḷaruanik aŋutinik aasii aullarriġuġlugich iñugnun: aullarriksrat 1,000-guruanun, tallimakipiaguruanun (100), malġukipiaq quliuruanun (50), suli quliuruanun. God qiksigiruksraġigaat ukpiġnaġlutiŋ uqayutitchumiñaiḷḷutiglu saglutaġuktuanun.

²² Isivġiqsirauyumaut iñugnun ataramik savaaġillasiḷugu. Siġġaġnaqtuat iliŋnun maniyumiñaġaich aasii siġġaġnaitchuat iliŋisa sivunniuġutigiyumiñaġniaġaich. Tainna piguvich siġġaġnaipayaaġniaqtuq iliŋnun, ikayuaqsikpatin nanmaaġiraġnik.

²³ Tainna piguvich, God-im tilikpatin, minġuliġñiaŋitchutin, aasiiḷi makua iñuich aiḷḷaaniaqtut atiŋirrutitiŋ natqiŋalugich.”

²⁴ Moses-gum akuqtuġniġaa Jethro-m siḷġiqsuutaa

²⁵ suli naliġakłuni piḷḷaruanik aŋutinik akunġanniñ Israel-gum kiŋuvaaŋiññiñ. Aullarriġuŋagai 1,000-guruanun, tallimakipiaguruanun (100), malġukipiaq quliuruanun (50), suli quliuruanun.

²⁶ Isivġiqsirauŋarut iñugnun kisian savaaġiliutivlugu, siġġaġnaqtuat Moses-muutillaavlugich aglaan siġġaġnaitchuat iliŋisa savaaġivlugich.

²⁷ Tavraasii Moses-gum itqanaiyautiŋagaa Jethro, aasii Jethro utiŋaruq nunamiñun.