Exodus 17 - Iñupiatun Mumiksat Uqalugiksuat

Imiq Uyaġagmiñ

¹ Iluqaġmiŋ Israel-gum kiŋuvaaŋich aullaŋarut nunagluktuaŋaniñ Sin-gum, nuktaqłutiŋ inimiŋniñ piraksriutaatun Atanġum. Nullaŋarut Rephidim-mun, aglaan imiksraiñŋarut.

² Uqaviḷuutiŋagaat Moses uqaqhutiŋ, “Imiksritchigut.” Moses kiugai, “Summan uvva uqaviḷukpisi? Summan Ataniq uuktuqpisiuŋ?”

³ Aglaan iñuich imiġuliqpaiñŋavlutiŋ uqaviḷuutiŋaiḷḷaiŋagaat Moses. Uqaqhutiŋ, “Summan aullautiŋavisigut Egypt-miñ? Tuqutchukłuta miqłiqtuvullu pamiqsaavullu imiġuksiuluta?”

⁴ Moses aŋaiyyuruq katchuŋaił̣ł̣uni Ataniġmun uqaqhuni, “Qanuġlagich makua iñuich? Tuqutchumaalliġaanŋa uvva uyaġagnik miḷḷuuġluŋa.”

⁵ Atanġum uqallautigaa Moses, “Piqatigilugich iḷaŋich Israel umialignaŋich, sivuatigun iñuit ayusitchi tigumiaġlugu ayauppiaq atuŋaran anaukapku Nile.

⁶ Makinniaqtuŋa sivuġaġnun uyaġagmun Mount Sinai-mi. Anauyumagiñ uyaġak, aasii imaq maqiniaqtuq tavraŋŋa iñuich imiġviksraŋat.” Moses tainna piŋaruq takkuanni umialignaŋisa Israel.

⁷ Ini atchiŋagaat Massah-miglu Meribah-miglu, qanukkii Israel-gum kiŋuvaaŋich uqaviḷuŋarut suli uuktuqługu Ataniq apiqsrikamiŋ, “Atanġum imña itqatigivatigut naakka itqatigiŋitpatigut?”

Aŋuyagmata Amalek-miullu

⁸ Amalek-miut qaivḷutiŋ aŋuyaŋagaich Israel-gum kiŋuvaaŋich Rephidim-mi.

⁹ Moses-gum uqallautigaa Joshua, “Naliġakkumautin aŋuyagiaqtiksranik Amalek-miunun uvlaaku. Makitaniaqtuŋa qaaŋani qimiqqam tigummiḷugu ayauppiaq God-im tigumiaquraŋa.”

¹⁰ Joshua-m kamagivlugu Moses piraksriutaa aŋuyagiaġai Amalek-miut, qimiqqam qaaŋanuktillugich Moses-lu, Aaron-lu, Hur-lu.

¹¹ Moses isaaŋapkaqługu, Israel-gum kiŋuvaaŋich akimaraqtut, aglaan talligñi anmugmagik, Amalek-miut akimaaqsiraqtut.

¹² Moses tallik piḷaiġmagnik, Aaron-guvlu Hur-vlu uyaġagmik aquppiviksraġniġaak, aasii iliŋiksa makitavlutik tallik tiguvlugik isaaŋapkaġniġaak, aulayaiqsimavlugik tallik siqiñiq nipilġataqtillugu.

¹³ Tainnaqłutiŋ Joshua-m akiisiñŋagai iluqaisa Amalek-miut.

¹⁴ Tavraasii Atanġum uqallautigaa Moses, “Agliuttuuŋ qanuqłusi akimatilaavsiññik, itqaumasuuyumagaat. Uqallauttuuŋ Joshua tamatkiġḷugiyguuq suksraunġiġñiaġitka Amalek-miut.”

¹⁵ Moses aitchuiviḷiuŋaruq aasii atchiqł̣ugu “Ataniq Akimmatiga.”

¹⁶ Uqallaktuq, “Qutchiksiḷugu tigumiaqsiuŋ takuyaŋa Atanġum, akimaniŋa! Atanġum aŋuyaksimaaġniaġai akiḷḷiġilugich Amalek-miut taimuŋa!”