Exodus 16 - Iñupiatun Mumiksat Uqalugiksuat

Maana-lu Quail-giḷḷu

¹ Iluqaġmiŋ Israel-gum kiŋuvaaŋich aullaqiŋarut Elim-miñ, tavraasii uvlut akimiaŋanni (15th) tuglianni tatqich aullaġmata qaŋa Egypt-miñ, nunagluktuaŋanuŋarut Sin, akunġagniittuaq Elim-lu Sinai-vḷu.

² Tamaani aasii uvva nunagluktuami uqaviḷuutiŋagaik Moses-lu Aaron-lu

³ uqallautivlugik, “Tuqunŋalisigut imma Atanġum Egypt-mi. Taavani uvva aquviłłuta niqipiaqtuġuuruaguut qanutupayaaġlu allanik niqinik niġisuktaptignik. Aglaan uvva qaġġisiŋagiptigut mauŋa nunagluktuamun paniġluta iluqata tuqutquvluta.”

⁴ Aasii tavra Atanġum uqallautigaa Moses, “Uvvahii sialuktinniaġiga niqiksravsiññik qiḷagmiñ. Iñuich uvlutuaqpan aniḷutiŋ katiqsriruksraurut naamaniaqtuanik taaptumani uvlumi. Iḷitchuġisaġniaqtuŋa kamaksriñiaqtilaaŋiññik piraksriutimnik.

⁵ Itchaksraŋanni uvlut qaġġirriruksraurut katiqsraqtiŋ malġuullugu itqanaiyaġlugu aasiiñ.”

⁶ Tavraasii Moses-lu Aaron-lu uqallautiŋagait Israel-gum kiŋuvaaŋich, “Anaqapak iḷitchuġilluataġniaqtusi Ataniġmun Egypt-miñ annisiŋatilaavsiññik.

⁷ Uvlaami tautugniaġiksi Atanġum, itqatauniŋata qaumaniŋa. Tusaaŋagaasi uqaviḷuutigavsiuŋ—ii, ilaa paaqłakługu, qanukkii uvva uvaguk savaaġisiññaġivuk piraksriqsuutiŋi.”

⁸ Tavraasii Moses uqallaktuq, “Atanġum niqipiaksriññiaġaasi niqiksravsiññik anaqami, aasii iḷaŋaniñ punniġnik uvlaami, atakkii tusaaŋagai uqaviḷuutisi akiḷḷiqsruqługu ilaa. Uqaviḷuutikavsiguk, tavra uqaviḷuutigiksi ilaa akiḷḷiqsruqługu Ataniq.”

⁹ Moses-gum uqallautigaa Aaron, “Uqautikkich iluqaisa Israel-gum kiŋuvaaŋich qalliḷaaqulugich sivuġaanun Atanġum, qanuq uvva tusaaŋagai uqaviḷuutiŋich.”

¹⁰ Aaron uqaqtillugu Israel-gum kiŋuvaaŋich qiviaġniqsut tuŋaanun nunagluktuam, aasii tavraŋŋatchiaq nuviyakun nuiruq qivliġruaqtun qaumaniŋa Atanġum.

¹¹ Atanġum uqallautigaa Moses,

¹² “Tusaaŋagitka uqaviḷuutiŋich Israel-gum kiŋuvaaŋisa. Uqallautisigiŋ tanuġaaksikpan niqipiaksranigniaqtut, aasii uvlaami punniksraqaġniaġmiut iḷaŋaniñ. Samma iḷitchuġilluataġniaqtusi uvaŋa, Ataniq, God-igitilaamnik ilivsiññun.”

¹³ Anaqammagu iñugiaktuat quail mitchaaŋarut siḷvilġataqługu nullaummiviat, suli uvlaami uġġuksraaŋaniqsuq iluqani nullaummiviat.

¹⁴ Uġġuksraaq paniġmagu, suna kanuqqiŋaruaq qaaŋaniinŋaruq nunagluktuam. Kaniqtun saatuuratun inŋaruq.

¹⁵ Israel-gum kiŋuvaaŋich tautukkamirruŋ, naluŋarut suutilaaŋanik suli apiqsruqtautivlutiŋ, “Suna manna?” Moses-gum uqallautigai, “Tamarra niqi Atanġum qaitchaŋa ilivsiññun niġitquvlugu.

¹⁶ Ataniq piraksriiruq ilivsigullaa katiqsritquvlusi qanutun piksravsiññik, tallimat piŋasuullugu qallun iñullaam piksraŋa igluqatauruam.”

¹⁷ Israel-gum kiŋuvaaŋich tainna piŋarut, iḷaŋich katiqsrił̣haaqłutiŋ iḷamiŋniñ.

¹⁸ Aktilaaqamisigiŋ, katiqsriqpaŋaruat piqaqpaiñŋiññiqsut, aasiiḷi katiqsriqpaŋitchuat inuqtuŋaitchut. Iñullaa katitchiŋaruq naamasivḷuni inmiñun.

¹⁹ Moses-gum uqallautigai, “Kia unnii tutquqtaġiruksraġiŋitkaa iḷaŋa uvlaakuksramun.”

²⁰ Aglaan iḷaŋisa naalaġniŋiññiġaat Moses aasii tutquqługu iḷaŋa. Uvlaaġmagu qupilġuŋaniġaa suli tippakługu auŋaruatun, aasii Moses-gum qinnautiniġai.

²¹ Uvlaatuaġman iñullaa katiqsriraqtuq naamasivḷuni; aasii siqiñiq uunaqsimman, iḷakuuruaq nunami augaġigaa.

²² Itchaksraŋanni uvlut katiqsriraqtut malġuułługich niqiksratiŋ, akimiaq atausiq (16) qallutit aktilaaŋat iñullaamun. Iluqaġmiŋ aullarrich ullautiniqsut uqallautiyyaqługu Moses taaptumuuna,

²³ aasii uqallautiniġai, “Ataniq piraksriiŋaruq uvlaaku salumaruaq uvluq unaŋuiqsiġviksraun, nalunaiqsauŋaruaq ilaanun. Samuunnaaġlugu samuunnaaġuktaqsi aasii qalatillugu qalatitchuktaqsi. Aasii iḷakusi tutquġlugich uvlaakuksramun.”

²⁴ Moses piraksriusiatun, tutquŋagaat iḷakuktiŋ uvlaakuksramun; tippaŋiññiqsuq naakkaunnii qupilġuŋaiññiqsuq.

²⁵ Moses uqallaktuq, “Niġisigik ukua uvlupak, qanukkii uvlupak Sabbath, uvluq unaŋuiqsiġvik nalunaiŋaraa Atanġum, suli paqinniaŋitchusi niqiksranik siḷataani nullaummivium.

²⁶ Katiqsriruksraurusi niqiksranik itchaksrani uvluni, aglaan tallimat malġuanni uvlut, uvluani unaŋuiqsiġvium, piqaġniaŋitchuq.”

²⁷ Tallimat malġuanni uvlut iñuich iḷaŋich katiqsriyyaġniqsut niqiksramignik, aglaan paqitchiŋaiñŋarut.

²⁸ Tavraasii Atanġum uqallautigaa Moses, “Qanutun imña sivisutigiruamik ilivsi iñuit kamaginiaŋitpisigik piraksriutitka?

²⁹ Itqaumalusi uvaŋa, Atanġuruaŋa, uvluksriñŋagivsi unaŋuiqsiġviksramik, aasii tavra tainnamik itchaksraŋanni uvlut aitchuġuuniaġivsi naamasiḷugu niqiksraqsi malġuugnun uvlugnun. Iñuich iluqaġmiŋ sumuktuksrauŋitchut tallimat malġuanni uvlut anigaluaġnatiŋ.”

³⁰ Tavraasii iñuich savaŋaitchut tallimat malġuanni uvlut.

³¹ Iñuŋisa Israel taiŋagaat niqi maana-mik. Qatiqtauratun saunauratun qiññaqaŋaruq, aasii tipiqaqhuni qaqqulauratun honey-ligaamik.

³² Moses uqaqtuq, “Atanġum tutquqsitqugaatigut iḷaŋanik maana-m, kiŋuvaaksrautiptignun tautuquvlugich niqiksriusiavut nunagluktuami aullautikamisigut Egypt-miñ.”

³³ Moses uqallautigaa Aaron, “Misuġuqtuutiksraġlutin immiġuŋ maana-mik tallimat piŋasutun qallutitun, aasii inillaglugu Atanġum takkuanun tutquqtausaġlugu kiŋuvaaksraptignun.”

³⁴ Atanġum piraksriusiatun Moses-mun, Aaron iḷiñiġaa sivuġaanun Sivunniuġutim Kiguunniŋata tutquqtautquvlugu.

³⁵ Israel-gum kiŋuvaaŋich niqiqaŋarut maana-mik malġukipiani (40) ukiuni, tikiḷġataqługu nuna Canaan, tavrani aasii inillakłutiŋ.

³⁶ (Taimani ephah uuktuun atuġuuraŋat aktilaaqaŋaruq sisamakipiatun (80) qallutitun. Omer una aktilaaqaqtuq tallimat piŋasutun qallutitun.)