Exodus 15 - Iñupiatun Mumiksat Uqalugiksuat

Atuutaa Moses-gum

¹ Tavra Moses-lu Israel-guvlu kiŋuvaaŋich atuŋarut uumiŋa atuunmik Ataniġmun: “Atuġniaqtuŋa Ataniġmun, qanukkii akimaruq kamanaqtuamik akimmanmik; miḷuqsautiŋagaich tuttuqpaiḷḷu tuttuqpagaqtiŋiḷḷu taġiumun.

² Ataniq suaŋaruaq ikayuqtigigiga; ilaata annautiŋagaaŋa. Ilaa God-iga, nanġaġniaġiga, aapagma God-iŋa, aasii atuġniaqtuŋa ilaata kamanautaagun.

³ Ataniq aŋuyaktauruq; Ataniq atiŋa.

⁴ “Miḷuqsautiŋagaich Egypt aŋuyaktiŋich aksraktuuraŋiḷḷu taġiumun; qaukłiġigñiqtaŋich Pharaoh-m ipiŋarut Red Sea-mi.

⁵ Itiruam taġium matuŋagaich; kiviŋarut natqanun uyaġaktun.

⁶ “Taliqpigiran, Ataniiq, aliuġnaqtuamik suaŋŋatiqaqtuq; suksraunġiġuugaich akiḷḷiuruat.

⁷ Kamanaqtuakun akimmatikkun akiiḷiŋagitin akiḷḷiitin; qinnautin igniqtun iłłuni ikipkaġitin ivigruanik ikipkaimmatun.

⁸ Suvluaqavich taġiumun imaq qaliġiiksittuq qutchiksivḷuni; napaŋŋaaġikhutiŋ katchitun; itiniqtaŋa taġium siqquqsiŋaruq.

⁹ Akiḷḷiq uqallaktuq, ‘Maliqataġniaġitka aasii aŋulugich; autaaġniaġitka suġaliŋich piksralgutilaaptun; amuniaġiga savikpaga piññaktaaġiniaġitka iluqaisa pigiraŋich.’

¹⁰ Aglaan atautchimi aniqsaaġvigñi, Ataniiq, Egypt-miut ipiŋarut; kiviŋarut uqhatun tatamaanaqtuami immami.

¹¹ “Ataniiq, akunġanni god-auruat kiña iliktun itpa? Kiñaimña iliktun itpa, aliuġnaqtuaq salumaniġmiñi? Kiña savallava aliuġnaqtuanik suli kamanaqtuanik savaanik iliktun?

¹² Taliqpigñik isaaqtuatin, aasii nunam iiŋagaich akiḷḷiivut.

¹³ Iḷumutuuqłutin unniqsuqłiisigni, aullatigitin iñuich annautiŋaratin; suaŋŋatikkun aullatigitin salumaruamun nunamun.

¹⁴ Nunaqpaich tusaaŋarut, aasii uulillaġmik iqsiḷiŋarut; Philistia-ġmiut tatamaalaŋarut.

¹⁵ Aullarriŋich Edom iqsiḷiŋarut; Moab-gum suamaruat aŋutiŋich uuliksiŋarut; iñuŋich Canaan qapiŋasiŋarut.

¹⁶ Tatamaalaliŋarut sivuuġaliqł̣utiglu. Tautukkaat ilvich suaŋŋatin, Ataniiq, qanuqsausiiŋarut iqsivaił̣ł̣utiŋ iñugiratin qaaŋiqsaaġataqtillugich iñugiratin— ilvich atanġiqsittatin akiiḷaaqługich kivgauniŋanniñ.

¹⁷ Qaġġisiniaġitin aasii inillaglugich iġġiġñun, inimun ilvich, Ataniiq, naliġaktaaġiraġnun aimmivigisukługu, Salumaruaq ini ilvich nappaŋaran.

¹⁸ Ilvich, Ataniiq, umialguniaqtutin taimuŋa isuitchuamun.”

Atuutaa Miriam-gum

¹⁹ Israel-gum kiŋuvaaŋich pisuaŋarut taġiukun paliumaruakun nunakun. Aglaan Pharaoh-m aksraktuuraŋich tuttuqpaŋiḷḷu suli aullarriŋich maliqatautimmata, Atanġum utiqtinŋagaa imaq, aasii matuvlugich.

²⁰ Uqaqtauruaq God-mun Miriam, Aaron-gum nukaalua atuqtuurausiŋaruq qiḷaugauramik aasii aġnapayaurat maliġiŋagaat, atuqtuuraqhutiŋ qiḷaugauranik aŋayuvlutiglu.

²¹ Miriam-gum atuutiŋagai: “Atuġitchi Ataniġmun, qanukkii akimaruq kamanaqtuamik akimmanmik; miḷuqsautiŋagaich tuttuqpaich aŋalatiŋiḷḷu taġiumun.”

Kimnaqtuaq Imiq

²² Taimaasiiñ Moses-gum aullatirraqsiŋagaich Israel-gum kiŋuvaaŋich unił̣ł̣ugu Red Sea nunagluktuaŋanun Shur-m. Piŋasuni uvluni pisuaŋarut nunagluktuami, aglaan paqinŋaiñŋarut imiksramignik.

²³ Tavra tikiñŋarut inimun atiqaqtuamik Marah-mik, aglaan imiq tavraniittuaq kimnaqpaił̣ł̣uni imiġumiñaiñŋaniġaat. Tainnamik atiqaqtuq Marah-mik.

²⁴ Iñuich uqaviḷurraqsiŋarut Moses-mun aasii suli apiqsrivḷutiŋ, “Sumik imña imiġniaġniqpisa?”

²⁵ Moses qiññuaqtuġvigigaa Ataniq, aasii Atanġum tautuktitkaa qiruk. Moses-gum miḷuqsautigaa immamun; aasii tavra imaq imiġnaqsiŋaruq. Tavrani Atanġum aitchuŋagaich pitquranik maliġuagaksraŋiññik, suli tavrani ilaata uuktuŋagaich maliġuaġniaġmagaisa pitqurat.

²⁶ Uqallaktuq, “Uvaŋa Ataniq God-iksi, kamagituiññaġuvsiñŋa iluqaanik kamagilugu iłuaġiraġa suli kamagilugich pitqutitka, tatavsaġniaŋitkivsi naŋirrutinik Egypt-miutun. Uvaŋa Atanġuruŋa, iłuaqsiriksi naŋirrunmiñ.”

²⁷ Tavraniasii tikiñŋarut Elim-mun, qulit malġutun (12) suvliktuanik imiqaqtuamun suli piŋasukipiaq qulinik (70) napaaqtuqaqhuni palm-nik; tavruŋa nullaŋarut immam qaniŋanun.