Exodus 13 - Iñupiatun Mumiksat Uqalugiksuat

Ilaaguaqtaummata Salumarualiuqługich Aŋayukłiuruat Iġñiġuruat

¹ Atanġum uqallautigaa Moses,

² “Ilaaguaqsigik iluqaisa aŋayukłiuruat aŋutit uvamnun, qanuq uvva aŋayukłipayaat aŋutit Israel-gum kiŋuvaaŋich suli aŋayukłiuruat aŋusallut niġrutit uvaŋa pitka.”

Niqinaqiniŋat Puvlaksautaitchuamik Punniġmik

³ Moses-gum uqallautigaich iñuich, “Itqaumalugu una uvluq aullaġvigiŋaraqsi Egypt-miñ, ini kivgauvigiŋaraqsi. Tavra taaptumani uvlumi Atanġum qaġġisiŋagaasi kamanaqtuakun suaŋŋatimigun, tainnamik taaptumani uvlumi puvlaksautiligaamik niġiñiaŋitchusi.

⁴ Aullaġniaqtusi Egypt-miñ taaptumani uvlumi sivulliġmi tatqimi, atiqaqtuamik Abib-mik.

⁵ Atanġum unniqsuqłiiŋagaich maŋŋuusi qaiññiaġnivḷugu nunaŋat Canaan-miut, Hit-miut, Amor-miut, Hiv-miut, Jebus-miuyaallu. Aullatikpasi taaptumuŋa umialguruamun suli nauriḷguruamun nunamun, atuqtaksraġigiksi itqautauruaq taamna niqinaqiniq sivulliġmi tatqimi ukiutuaġaġikpan.

⁶ Tallimat malġugni uvluni niġiñiaqtusi puvlaksautaitchuamik punniġmik aasii suli tallimat malġuanni uvlut niqinaqiniaqtusi qutchiksiḷiġutaulugu Ataniġmun.

⁷ Tallimat malġugni uvluni niġiruksrauŋitchusi punniġmik puvlaksautiligaamik; puvlaksautaitchuksrauruq suuramik unnii sumiḷiqaa nunavsiññi.

⁸ Niqinaqiniq isagutikpan, kaŋiqsipkaġlugich qitunġasi taamna nalautchuuniḷugu pisigivlugu Atanġum savaaŋa aullaqavsi Egypt-miñ.

⁹ Taamna nalunaiqsauŋaruaq atuqtaqsi itqaqsautauniaqtuq, qiḷiġutiŋaruatun argavsiññi naakka niaquvsiññi; itqautauniaqtuq taimuŋaallatqulugich suli iḷisaaġitqulugich Pitquraŋich Atanġum, qanukkii Atanġum aullautiŋagaasi Egypt-miñ kamanaqtuakun suaŋŋatimigun.

¹⁰ Taamna itqautauruaq niqinaqiniq qutchiksuaġilugu atuqtuksraġigiksi inillaŋaruami piviksrami ukiutuaġaġikpan.

Aŋayukłiuruaq Iġñiġuruaq

¹¹ “Atanġum aullatiniaġaasi nunaŋannun Canaan-miut, unniqsuqłiisigiŋaraġmisun ilivsiññun suli maŋŋuuvsiññun. Qaitpauŋ ilivsiññun,

¹² aitchuutigiraksraġigisi aŋayukłipayaat aŋutit Ataniġmun. Aŋusalluqqaat niġrutit Atanġum ilaata pigigaich,

¹³ aglaan tasuqtuksraġigiksi aŋayukłipayaaq kakakti simmausiġḷugu imnaiyaamik. Tasuŋitkuvsiuŋ kakakti, niġluqtuksraġigiksi. Tasuqtuksraġigiksi aŋayukłipayaaq aŋun iġñiqsi aglaan simmausiutiqaqtuksraurusi.

¹⁴ Taikaniqpani qakugu, iġñivsi apiġikpasi sumik sivuniqaqtilaaŋa taamna nalunaiqsauŋaruaq, kiuniaġiksi, ‘Atanġum qaġġisiŋaraatigut Egypt-miñ akiiḷaaqługu kivgauviptigniñ atuqługu kamanaqtuaq suaŋŋatiqpani.

¹⁵ Pharaoh uqayunaił̣ł̣uni aullaquŋiñmatigut, Atanġum tuqunŋagaich aŋayukłiupayaaqtuat aŋutit nunaŋani Egypt, iñuiḷḷu niġrutillu. Tainnamik tavra aitchuutigisuugivut aŋayukłiupayaaqtuat aŋusallut niġrutit Ataniġmun, aglaan tasuqługich aŋayukłiuruat iġñivut.

¹⁶ Taamna nalunaiqsauŋaruaq itqautauniaqtuq, qiḷiġutiŋaruatun argavsiññun naakkaunnii niaquvsiññun, itqaumapkaġniaġaatigut Ataniġmun aullautiŋatilaaptinnik Egypt-miñ kamanaqtuakun suaŋŋatimigun.’”

Nuvuyakullu suli Ignikun

¹⁷ Pharaoh-m aullaqtinmagich iñuich, God-im aullatiŋaitkaich qitqagun Philistia-m, qaniłhaaġaluaqtillugu. God isumaŋaruq, “Iñuich isumalitqigḷugich utiquŋitkitka Egypt-mun aŋuyaksaġumik.”

¹⁸ Aglaan, kukiḷuutiŋagaich nunagluktuakun tuŋaaġivlugu Red Sea. Israel-gum kiŋuvaaŋich satkuqaŋarut itqanaił̣ł̣utiŋ aŋuyagniksramun.

¹⁹ Moses-gum kaluŋaniġaich Joseph-gum sauniŋich, Joseph-gumkii unniqsuqłiipkaŋagaich Israel-gum kiŋuvaaŋich. Joseph uqallaŋaruaq, “Nalunaitchuq God-im annautiniaġaasi, aasii annautikpasi, tigumiaqtuksraġigiksi timiga mattumaŋŋa inimiñ.”

²⁰ Israel-gum kiŋuvaaŋich aullaġniqsut Sukkoth-miñ aasii nullaqhutiŋ Etham-mi siḷataani nunagluktuam.

²¹ Uvlumi Atanġum sivulliuŋagai nuvuyamik takiłhuaŋaaqtuamik iglauyaaksraŋannik, aasii unnuami igniġmik takiłhuaŋaaqtuamik nanniqsimavlugich, iglaullasivḷugich unnuamiḷu uvlumiḷu.

²² Nuvuya taamna ittaqtuq sivuanni iñuich uvlutuaġman, aasii igniq unnuatuaġman.