Exodus 12 - Iñupiatun Mumiksat Uqalugiksuat

Qulaurrusiqivik

¹ Ataniq uqaŋaruq Moses-mun, Aaron-mullu Egypt-mi:

² “Uumani tatqimi atuqtaptinni sivulliġiniaġaa ukium ilivsiññun.

³ Qaitchigik ukua piraksriutit iluqaiññun Israel-guruanun: Quliŋŋuqpan uumani tatqimi iñullaa naliġakkisiruq imnaiyaamik naakka nuġġaġmik nagruligmik piksraŋannik igluqatiimi.

⁴ Qitunġaġiich iñukitpata niġiyumiñaiḷḷugu iluqaan niġrun, siḷalliniḷu niġrunmik autaaġumiñaqtuk, naayuqtaaġlugu iñugiaktilaaŋatitun iñuich suli aktilaaŋatun iñullaam niġiyumiñaqtaŋatitun.

⁵ Naliġakkumiñaqtutin imnaimik naakka nagruligmik, aglaan atausimik ukiuqtutilaaqaqtuksrauruq aŋusalluuluni surruutaiḷḷuniḷu.

⁶ Tavraasii, tanuġaaksimman uvlut akimiaġutaiḷaŋanni (14th) tatqim, Israel-gum kiŋuvaaŋich tuqutchiñiaqtut niġrutinik naliġaamignik.

⁷ Iñuich auksraġisirut aasii auguaqtaġlugich iglut upkuaŋich saniġaŋisigullu qulaaŋisigullu nalunaiqsaġlugu niġrutinik iñuich niġġiviksraŋat.

⁸ Taaptumani unnuami niqi argiqsaksraġigaat, aasii niġiḷugu niġġisiġḷugu tipigluktuanik naurianik punniġniglu imaksraiḷaanik.

⁹ Niġiñagu iḷaŋaunnii uiḷaġlugu naakka qalatillugu, aglaan niġiḷugu argiŋaruaq suġaiḷḷugu, taputilugich niaqua, niuŋich, ilaġviŋiḷḷu.

¹⁰ Uvlaaŋaiñŋaan niġiŋaraksrauruq; iḷakuqaqpan, ikipkaqtaksrauruq.

¹¹ Niġiruksraġigiksi qilamiqsruġlusi, qanukkii annuġaaqtuŋaruksraurusi iglaugunnanik, aluġutituġlusi ayauppiaqaġlusiḷu. Tavra taamna Qulaurrusiqinikun Niqinaqivik qutchiksiḷiġutausaqługu uvamnun, Atanġuruamun.

¹² “Taaptumani unnuami Egypt nunaŋaguaġniaqtuŋa, tuquttaġlugich aŋayukłipayaat aŋutauruat, aŋusalluŋiḷḷu niġrutit, tatavsaġlugiḷḷu iluqaisa god-iŋich Egypt-gum. Uvaŋa Atanġuruŋa.

¹³ Augich upkuavsi avatiŋiñiittuat nalunaiñŋutauniaqtut iglunun iñuuvigiravsiññun. Tautukkupku auk, qulaunniaġivsi suli pimaqłuŋiḷḷusi tatavsaġupkich Egypt-miuguruat.

¹⁴ Itqautiqallaaruksraurusi ukiutuaqpan taaptumani uvlumi niqinaqivigilugu, itqautausaġlugu ilivsiññun, uvaŋa Atanġuruaq, qanuq savaŋatilaamnik. Quviasuutikun itqautigilugu taimuŋa.”

Niqinaqiniq Imaksraiḷaamik Punniġmik

¹⁵ Ataniq uqallaktuq, “Tallimat malġugni uvluni niġiñiaŋitchusi punniġnik imaksraligaanik—niġiḷusi kisian imaksraiḷaanik punniġnik. Sivulliġmi uvlumi igittuksraġigisi puvlaksautipayaat igluvsiññiñ, qanukkii kiñapayaaq taapkunani tallimat malġugni uvluni niġiruaq imaksraligaamik punniġmik, iḷauŋaiġñiaqtuq iñugiramnun.

¹⁶ Sivulliġmiḷu tallimat malġuanniḷu uvlut katitkisirusi aŋaiyyusaqtuaġlusi. Sumik unnii savagniaŋitchusi taapkunani uvluni, aglaan niqłiuġumiñaqtusi.

¹⁷ Nuimaruaġisaġiksi taamna niqinaqiniq, qanukkii itqautauruq taaptumani uvlumi aullautikapkich kiŋuniġiiḷḷaaruat Egypt-miñ. Quviasugviginiaġiksi taamna uvluq niqinaqivigilugu ukiutuaqpan.

¹⁸ Sivullium tatqim uvluŋaniñ anaqasaaqtuamiñ akimiaġutaiḷamiñ (14th), iñuiññaq atausiannun (21st) aglaan anaqasaaqtuamun, niġiñiaŋitchusi punniġnik imaksraligaanik.

^19-20 Tallimat malġugni uvluni puvlaksautiqaqtuksrauŋitchusi igluvsiññi, qanukkii kiñapayaaq, nutim tamaani aniŋagaluaġumi naakka allaniŋŋaqtaugaluaġumi, niġituaġumi punniġmik puvlaksautiligaamik, iḷaullayumiñaiġñiaqtuq iñugiramni.”

Sivulliq Qulaurrusiqiniq

²¹ Tavraasii Moses-gum ququaqługich aullarripayaat Israel-gum kiŋuvaaŋich uqautiŋagai, “Iluqasi naliġaktuksraurusi imnaiyaamik naakka nuġġaġmik nagruligmik aasii tuqullugu, qitunġaġiigulusi niqinaqiyumausi Qulaurrusiqiniġmi.

²² Ukpiqł̣uuramik piḷusi, ivsaglugu niġrutim auŋanik puggutauramiittuamiñ, aasii nanuutilugu igluvsi upkuaŋisa avaluŋigñullu qulaaŋiññullu. Nalliqsiunnii aniruksrauŋitchuq iglumiñ uvlaaġataqtillugu.

²³ Ataniq Egypt-kuaġumi tuqutchaqtuġlugich aŋayukłiich aŋutit Egypt-miut qitunġaġiiḷḷaani, tautugniaġaa auk qulaanniḷu avaluŋiññiḷu upkuat isiqtinniaŋitkaa Isaġulga Tuqqutim igluvsiññun.

²⁴ Ilivsiḷu qitunġavsiḷu kamagiruksraġigisi makkua piraksriutit taimuŋa isuitchuamun.

²⁵ Nunamukkuvsi Atanġum unniqsuqłiisigiŋaraanun qaiññiaġnivḷugu ilivsiññun, taamna atuqtaksraġigiksi piraġausiq.

²⁶ Miqłiqtuvsi apiġikpasi, ‘Sumik una taamna sivuniqaqpa?’

²⁷ Kiuniaġisi, ‘Itqautauruq Qulaurrusiqiniġmun qanukkii Atanġum qulaunŋagaich igluŋich Israel-gum kiŋuvaaŋich Egypt-mi. Tuqunŋagaich aŋayukłiich aŋutit Egypt-miut qitunġaġiiḷḷaani, aglaan aksiŋaitkaatigut uvagut Israel-guruaguut.’” Tavraasii, Israel-gum kiŋuvaaŋich punŋarut nanġaivḷutiŋ.

²⁸ Tavraasii kamaksriŋarut Atanġum piraksriutiŋiññik Moses-mullu Aaron-mullu.

Tuqutaummata Aŋayukłiuruat

²⁹ Unnuaq qitiqqaġman Atanġum tuqunniġaich iluqaisa aŋayukłiuvlutiŋ iġñiġuruat Egypt-mi, Pharaoh-m iġñiŋaniñ, iġñiŋanuaglaan tigutaaqtauruat tigutaaġvigñi; iluqaisalu aŋusalluqqaaŋich niġrutit tuqutauŋaniqsut.

³⁰ Taaptumani unnuami, Pharaoh, qaukłiuraŋiḷu, iluqaġmiglu allat Egypt-miut iqiiŋarut aasii iḷitchuġivlutiŋ iġñitiŋ aŋayukłiich tuquŋamaruat. Nipatuvlutiŋ qiaruaqaŋaruq Egypt-mi, qanukkii iglupayaurani tuquruaqaŋaruq.

³¹ Tavrani unnuami Pharaoh-m qaitquŋagaik Moses-lu Aaron-lu aasii uqallautivlugik, “Aullaġitchi, iluqasiglu Israel-guvlu kiŋuvaaŋich! Unitchiuŋ manna nunaga; aullaġlusi nanġaġiaqsiuŋ Ataniq, apiqsriavsisun.

³² Aullautilugich niġrutipayaat pamiqsaasi, aullaġitchi. Aŋaiyyutiluŋalu ikayuusiaqaquluŋa.”

³³ Egypt-miuguruat aullaqupiallaŋagai iñuich qilamik nunamigniñ; uqaqhutiŋ, “Iluqatauvva tuquniaqtugut aullaŋisuaġuvsi.”

³⁴ Tavraasii iñuich punnilivitiŋ immiqsuqługich puvlaksautaitchuanik akutanik, puuqługich annuġaanik, nanmakkiutiŋagaich.

³⁵ Israel-gum kiŋuvaaŋich kamaksriŋarut Moses uqallautaanik, suli qasiḷiŋarut Egypt-miuguruaniñ kaviqsuaniglu qatiqtuaniglu manigñik piḷianik qiñiyunaqsautinik annuġaaniglu.

³⁶ Atanġum qiksikkutiqaqtinŋagai Egypt-miuguruat iñugnun aasii aitchuqtiłługich apiqsriaġiraŋiñik. Tainnaqhutiŋ Israel-gum kiŋuvaaŋich aullaurriŋarut umialgutiŋiñik Egypt-miut.

Israel-gum Kiŋuvaaŋich Aullaqtut Egypt-miñ

³⁷ Israel-gum kiŋuvaaŋich aullaŋaniqsut pisukataqhutiŋ Rameses-miñ Sukkoth-muksaqhutiŋ. Iñugiaktigikavsaŋarut 600,000-tun aŋutit, kisitkaluaġnagich aġnallu miqłiqtullu.

³⁸ Iñugiakpaktuat iñuich iñugiaktuallu niġrutit pamiqsaat aullaqatigiŋagaich.

³⁹ Kukiuŋagaich puvlaksautaiḷaat punniġich akutaniñ qaġġirramigniñ Egypt-miñ, qanukkii uvva tavrauvvaa aullaqurauvlutiŋ Egypt-miñ itqanaiyaġviiñŋarut-unnii niqiksramignik naakkaunnii puvlaksialiuġviksraitchut.

⁴⁰ Israel-gum kiŋuvaaŋich iñuuniaŋarut Egypt-mi 430-ñi ukiuni.

⁴¹ 430-iuruat ukiut naanmata, iluqaġmiŋ Atanġum iñuŋiñun aullaŋarut Egypt-miñ.

⁴² Taaptumani unnuami Ataniq munaqsriŋaruq aullautisaqamigich Egypt-miñ; tavraasii taamna unnuaq ilaaguaqtauruq Israel-gum kiŋuvaaŋich nipuŋaiġviksraŋat ukiutuaqpan qutchiksiḷiġutausaqługu Ataniġmun.

Maliġuagaksrat Qulaurrisiqinikun

⁴³ Atanġum uqautigaik Moses-lu Aaron-lu, “Uvva ukua Qulaurrisiqinikun maliġiraksrat: Israel-guŋitchuaq niġiñiaŋitchuq Qulaurrisiqinikun niqinik,

⁴⁴ aglaan kivgauruam tauqsiŋaravsi niġiyumiñaġaa nalunaiḷutchiqsauganikkumi.

⁴⁵ Iñuuqatauyyaqtuam sivikisuuramik naakka savaktauruam akiññaksaqhuni niġiñiaŋitkaa.

⁴⁶ Iluqaan niqłiaq niġiraksrauruq iglumi niqłiuġvigmi; annisuutiraksrauŋitchuq. Suli naviktaksrauŋitchut niġrutim sauniŋich.

⁴⁷ Iluqaġmiŋ Israel-gum kiŋuvaaŋich itqautaulugu niqinaqivigiruksraġigaat,

⁴⁸ aglaan kiñaunnii nalunaiñŋutchiqsauŋaitchuaq niġiyumiñaitchuq. Iñuk Israel-guŋitchuaq akunnavsiññi iñuuniaqsaŋaruaq suli iḷausuktuaq niqinaqikpata Qulaurrusiqivigmi qutchiksiḷiqsaġlugu Ataniq, nalunaiḷutchiqqaaqtuksraġigisi aŋutipayaat igluqatiiŋich. Aŋalataksraġiniaġaat nanmiñiq Israel-guqatigiruatun aasii iḷaullasiḷugu niqinaqiruani.

⁴⁹ Maliġiraksrat atiniaqtut Israel-guruanun Israel-guŋitchuanullu iñuunialiŋaruanun akunnavsiññi.”

⁵⁰ Iluqaġmiŋ Israel-gum kiŋuvaaŋich kamaksriŋarut Atanġum piraksriutaanik Moses-mullu Aaron-mullu.

⁵¹ Taaptumani uvlumi Atanġum aullautiŋagaich Israel-gum kiŋuvaaŋich Egypt-miñ.