Exodus 11 - Iñupiatun Mumiksat Uqalugiksuat

Tuquniksraŋat Aŋayukłiuruat Iġnich

¹ Tavra Ataniq uqallaktuq Moses-mun, “Atausitualuvsaamik tatavsautiqaġniaqtuŋa Pharaoh-mun suli Egypt iñuŋiñun. Taaptuma aquagun aullaqtinniaġaasi. Uvvaami, aninniaġaasi iluqasi tamaaŋŋa.

² Uqautikkich iñuŋich Israel iluqaisa qasiḷitqulugich qiñiyunaqsautinik siḷalliimigniñ Egypt-miuniñ kaviqsuaniglu qatiqtuaniglu manigñik piḷianik.”

³ Atakkii Atanġum Egypt-miuguruat iviġaumapkaŋasipkaġniġaich Israel-gum kiŋuvaaŋiññun. Tavra suli, Pharoah-m kivgaŋich Egypt iñuŋiḷḷu qiksigiliġniġaat Moses.

⁴ Moses uqallaktuq Pharaoh-mun, “Ataniq uqaqtuaq inna, ‘Unnuaq qitiqqaqpan Egypt-kuaġniaqtuŋa,

⁵ aasii iluqaġmiŋ aŋayukłiuruat iġñiŋich tuquniaqtut Egypt-mi. Kiŋuvaaksrauniaġaluaqtuamiñ aquppiutaqpaŋanun Pharaoh-m, iġñiŋanuaglaan kivgauruam akutchiruam palauvaksranik, tuquniaqtut. Aniqqaaŋaruaq aŋusalluq pamiqsaani tuquniaġmiut.

⁶ Nipaturuanik qiaruaqaġniaqtuq iluqaani Egypt, nalautinŋaitchuamik qaŋaunnii naakkaunnii nalautitqikkumiñaitchuamik.

⁷ Aglaan qirratiksraqaġniaŋitchut unnii Israel-gum kiŋuvaaŋich. Tuaksruitpaiḷḷuni qiḷuktuaqaġniaŋitchuq unnii. Tavra iḷitchuġiniaqtutin uvaŋa, Atanġuruaq, nalunaiqsaġiniaġitka Israel-gum kiŋuvaaŋich Egypt-miuniñ.’”

⁸ Moses aġiusaaqami uqallaktuq, “Iluqaġmiŋ qaukłiuravsi ullagniaġaanŋa aasii pullutiŋ sivuġamnun, iŋiqsruġniaqtut aullaquluta iluqata. Tainnaanikpata, aullaġniaqtuŋa.” Tavra Moses qinnalipiallaŋavluni uniñŋagaa Pharaoh.

⁹ Ataniq uqallaktuq Moses-mun, “Umialigum suli naalaġnisugniaŋitkaatin, savavsaaġumiñaqsiḷuŋa aliuġnaqtuanik Egypt-mi.”

¹⁰ Moses-lu Aaron-lu savaŋaruk iluqaiññik tamatkuniŋa aliuġnaqtuanik sivuġaani Pharaoh-m, aglaan Atanġum uqayunaiqsinŋagaa, aasii aullaqtitchuŋiñŋagaich Israel-gum kiŋuvaaŋich nunamiñiñ.