Exodus 10 - Iñupiatun Mumiksat Uqalugiksuat

Pigliġayuich Atautchikuaqpaktuat

¹ Tavra Atanġum uqallautigaa Moses, “Aullaġutin tautugiaġuŋ Pharaoh. Uqayunaiḷipkaŋagiga atanauraŋiḷḷu, apqusaaquvlugich aliuġnaqtuat savaatka

² iḷisamapkaquvlugiḷḷu miqłiqtusi tutaaluusiḷu qanutun kipagiŋatilaaŋich Egypt-miuguruat savakkama aliuġnaqtuanik. Iluqavsi iḷisimaniaqtusi uvaŋa Atanġutilaamnik.”

³ Tavra Moses-lu Aaron-lu Pharaoh-muŋaruk aasii uqallautivlugu, “Ataniq, God-iŋat Hebrew-guruat, innaqtuq, ‘Qanutuaglaan imña kamaksrisiqaġniaŋitpich uvamnun? Aullaqtitkich iñugiratka, nanġautiqaġumaut uvamnun.

⁴ Kamaksrisuŋitkuvich-suli, qaipkaiñiaqtuŋa pigliġayugnik nunagnun uvlaaku.

⁵ Iñugiakpaiḷḷutiŋ matuniaġaat iluqaan nuna. Niġiñiaġaat sunapayaaq maqunŋaisaŋat natatquġnat, napaaqtut-unnii kisiŋŋuqtauŋaruat.

⁶ Immiġñiaġaich igluqpasiḷu igluŋiḷḷu atanaurapayaaqpich iñupayauratillu. Piaġiił̣haaġniaqtut supayaaniñ kiŋuniivsi tautuŋaraŋiññiñ.’” Tavra Moses tunułłuni aullaŋaruq.

⁷ Pharaoh-m atanauraŋisa uqallautigaat, “Qanutun imña sivisutigiruami uuma iñuum isumaaluutiqaqtinniaqpatigut? Aullaqtillich apkua Israel-gum kiŋuvaaŋich, nanġautiqaġumaut Ataniġmun God-igiramignun. Sivuniqsiŋaitpich imña Egypt suksraunġiqsautilaaŋanik?”

⁸ Tavraasii Moses-lu Aaron-lu qaipkatqiŋagaik Pharaoh-mun, aasii uqallautivlugik, “Ki, aullaġumiñaqtusi nanġaġiaġlugu Ataniq God-iksi. Aglaan uvva kitkupiaq aullaġniaqpat?”

⁹ Moses-gum kiugaa, “Iluqata aullaġniaqtugut, piqatigilugich miqłiqtuvut utuqqanaavullu. Aullautiniaġivut iġñiġiravut, paniutivullu, imnaivut, nagrulivullu, pamiqsaavullu, qanukkii niqinaqiruksraurugut qutchiksiḷiġlugu Ataniq.”

¹⁰ Pharaoh uqallałłaktuq, “Naumi! Aullautipkaġumiñaitkitka aġnasiḷu miqłiqtusiḷu! Nalunaitchuq uvva sivunniŋarusi utiġumaŋił̣ł̣usi.

¹¹ Naumi! Kisimiŋ aŋutit aullaġumiñaqtut nanġaġiaġlugu Ataniq tainna pisukkuvsi.” Uqallaanipqaqami, Moses-lu Aaron-lu anitinŋaruk.

¹² Tavraasii Atanġum uqallautigaa Moses, “Isaaġuttuuŋ argaiñ qulaagun nunaŋata Egypt qaipkaqsaġlugich pigliġayuich. Qaiḷutiŋ niġiñiaġaat sunapayauraq nauruaq, sunapayaaġlu maquliŋaisaŋa natatquġnat.”

¹³ Tavra Moses-gum isaaġutiŋagaa ayauppiani, aasii Atanġum anuqłiġuqtinŋagaa nigiġmiñ aasii anuqłiŋaruq uvluqtutilaatun unnuaqtutilaatullu. Uvlaaġmagu anuġim qaipkaŋamagaich piqliġayuich.

¹⁴ Qaiñiqsut iñugiaguttaqhutiŋ aasii inillakhutiŋ iluqaanun nunamun. Iñugiakpaił̣ł̣utiŋ pigliġayuich qaŋaunnii tainnatun qiñiġataŋaitchut sivuani naaggaunnii qiñitqikkumiñaitchut tainnatun iñugiaktigiruanik.

¹⁵ Matuŋagaat nuna maŋaqsiḷġataqługu; niġiŋagaat sunapayaaq natatquġnat kisiŋŋuqtaŋat, iḷagivlugich iluqaisa siiġñat napaaqtuniittuat. Iḷakuŋaitchut sumik nauruamik napaaqtuni naakka nauruat nunapayaaŋani Egypt-gum.

¹⁶ Tavraasii Pharaoh qilamiqsruqhuni ququaġniġaik Moses-lu Aaron-lu aasii uqallakłuni, “Piḷuusiqiŋaruŋa paaqłakługu Ataniq God-iksi paaqłakłusiḷu ilivsi.

¹⁷ Suliqutigiŋaiqsiuŋ piḷuutiga atausivsaami aasii aŋaiyyulusik Ataniġmun God-ivsiññun piiqulugu uvamniñ una tatavsaun tuqqutauniaqtuaq.”

¹⁸ Moses-gum unił̣ł̣ugu Pharaoh aŋaiyyuŋaruq Ataniġmun.

¹⁹ Aasii Atanġum mumiŋagaa nigiqpagmiñ anuġi suaŋaruamun uŋalaġmun, aasii tiŋitiłługich pigliġayuich Iḷuliaŋanun Suez-gum. Atausiuraq unnii pigliġayuk kisiŋŋuqtauŋaitchuq Egypt-mi.

²⁰ Aglaan Atanġum uqayuġnaisinŋalgitkaa Pharaoh, aasii aullaqtinŋaitkaich Israel-gum kiŋuvaaŋich.

Taaqtuaq

²¹ Tavraasii Atanġum uqallautigaa Moses, “Isaaġuttuuŋ argaiñ qiḷaum tuŋaanun, aasii taaqpaktuam matuniaġaa nunaŋa Egypt, taaqsivaił̣ł̣uni tammaanaqtuq-unnii.”

²² Moses-gum isaaġutigaa argani tuŋaanun qiḷaum, aasii taaqsiqpagniqsuq piŋasuni uvluni sumipayaaq Egypt-mi.

²³ Egypt-miut tautuutillaiŋarut avanmun, suli atausiuraq unnii iñuk aniŋaiñŋaruq iglumiñiñ tavrani. Aglaan Israel-gum kiŋuvaaŋich qaummaaġigñiqsuq iñuuniaġviat.

²⁴ Pharaoh-m ququaġaa Moses aasii uqallakhuni, “Ki, aullaġumiñaqtusi aasii nanġaġlugu Ataniq, aġnasiḷu miqłiqtusiḷu kaluġumiñaġisi. Aglaan imnaisi, nagrulisi, pamiqsaasiḷu maaniittuksraurut.”

²⁵ Moses-gum kiugaa, “Tavra niġrutiqaqtittuksrauniaġivsigut ikipkaiḷuta aitchuutiksraptignik Ataniġmun God-iptinnun.

²⁶ Naumi, niġrutivut kaluġniaġivut; atausiq unnii uniktauniaŋitchuq. Uvaptignik naliġaktuksraurugut niġrutinik nanġautiksraptignik Ataniġmun God-iptinnun. Suli tikiñŋaunnata taamuŋa, naluniaqtugut kisunik niġrutinik aitchuutiqaġniaqtilaaptinnik ikipkaigupta ilaanun.”

²⁷ Atanġum uqayuġnaiqsiłługu Pharaoh, aullaqtitchuŋiḷgitkaich.

²⁸ Ilaan uqallautigaa Moses, “Uumaa, maaŋŋa piiġiñ! Taututqiguŋitkikpiñ qakuguunnii! Taututqituaġupkiñ, tuquniaqtutin!”

²⁹ Moses-gum kiugaa, “Iluakkuaqtutin, taututqigñiaŋitkigma.”