Exodus 1 - Iñupiatun Mumiksat Uqalugiksuat

Israel-gum Kiŋuvaaŋich Aŋalamaqłuksiqsut Egypt-mi

¹ Iġñiġutiiŋich Jacob-gum Egypt-muqatigiŋaraŋich, qitunġallaatiglu, ukua

² Reuben, Simeon, Levi, Judah,

³ Issachar, Zebulun, Benjamin,

⁴ Dan, Naphtali, Gad, Asher-lu.

⁵ Iñugiaktilaaŋat taapkua iñuich kiŋuvaaġiraŋisa Jacob piŋasukipiaq quliuŋarut (70). Iġñiŋa Joseph Egypt-miitaniŋavluni.

⁶ Iñuuvlutiŋ tainna Joseph-lu, aniqatiiŋiḷḷu, iluqaġmiglu iñuuqatipayauraŋich tuquġaaŋarut,

⁷ aglaan kiŋuvaaġiraŋich, Israel-gum kiŋuvaaŋich, iñugiaktuanik miqłiqtuqaŋarut suli iñugiaksipiaġataqhutiŋ, suaŋammivḷutiŋ, Egypt nunaŋa siḷivinŋagaat.

⁸ Ukiut iñugiaktuat qaaŋianigmata umialitchiaŋarut. Naluŋaruq qanuq Joseph ikayuutauŋatilaaŋa Egypt-miunun.

⁹ Uqallaŋaruq iñugmiñun, “Atta! Naalaġnisitchi! Uvvaukua Israel-gum kiŋuvaaŋich iñugiakpaktut suaŋammivḷutiŋ, anayasaaġutaurut uvaptinnun.

¹⁰ Iḷaanni aŋuyakpata iḷaliutilutiŋ akiḷḷiptignun aŋuyakpiaġaatigut, aasii annaglutiŋ nunaptinniñ. Paqittuksraurugut sumik iñugiaksivsaaġnaiḷutauruamik iliŋiññun.”

¹¹ Tavraasi tiliuqtiliqsuŋagaich nagliksaaqtitaġisaqługich siġġaġnaqtuanik savaktiłługich. Israel-gum kiŋuvaaŋich nappaŋagaik nunaaqqik Pithom-lu Rameses-lu suġauttaqaġvigisaqługik umialigmun.

¹² Aglaan Egypt-miunun nagliksaaqtitkaluaqtiłłutiŋ, iñugiaksiñmuktuvsaaŋarut iniksraiḷiqiliqsaallaġmik. Egypt-miuguruat sivuuġagiliŋagai Israel-gum kiŋuvaaŋich

^13-14 aasii nagliksaaqtinŋagaich nunurivḷugich kivgaġiŋagaich. Savaktinŋagai igluqpiamignik savaktiłługiḷḷu sunigliqaa nautchiivigmigni, naglikkutaiñŋammiut iliŋiññun.

¹⁵ Tavraasii Pharaoh-m piraksriŋagaik Shiphrah-lu Puah-lu, iġñipkairauruak Hebrew-guruanun aġnanun,

¹⁶ “Iġñipkaiguvsik Hebrew-guruanik aġnanik, tuqutchaġiksik iḷiḷgauraq aŋutaiyaaguniqpan; aglaan aġnaiyaaguniqpan, iñuupkaġlugu.”

¹⁷ Aglaan iġñipkairik qiksikkutiqaŋaruk God-mun tavraasii kamagiŋił̣ł̣ugu Pharaoh; aasii iñuupkaqługich aŋutaiyaat.

¹⁸ Tavraasii Pharaoh-m qaitquŋagaik iġñipkairik aasii apiġivlugik, “Immaimña suqpakpisik? Kamakkutaiḷak-asuukuak! Summan aŋutaiyaat iñuupkaqtaqpisigik?”

¹⁹ Iliŋikta kiugaak, “Hebrew-guruat aġnaŋich Egypt-miut aġnaŋisun inŋitchut; iġñisuurut siġġaġnaiḷaakun, aasii iġñianiŋaraqtut tikiñŋaisillunuk.”

^20-21 Iġñipkairik qiksikkutiqaġmagnik inmiñun, God-im nakuugutiŋagaik aasiiptauq qitunġipkaqługik. Israel-gum kiŋuvaaŋich aasii sivunmun kiikaa iñugiaksisaiññaŋarut suaŋasiqpakłutiglu.

²² Kiisaimmaa Pharaoh piraksriiñiqpuq iñugipayaaqtamiñun: “Hebrew-guruat aniqqammiqsuat iluqaisa aŋutaiyaat igitchaġisi Nile-mun kuugmun, aglaan aġnaiyaat iñuupkaġlugich.”