Esther 1 - Iñupiatun Mumiksat Uqalugiksuat

Queen Vashti-m Paaqłakkaa Umialik Xerxes

^1-2 Umialguvianiñ Persia-m iniqpaŋani Susa-m, Umialgum Xerxes-gum atanniqsimaŋagai 127 nunaqpaich, India-miñ aullaqivḷutik Ethiopia-muaglaan.

³ Piŋayuanni ukiut umialguvianni niqinaqiutiŋagai atanaurani suli piraksriqsuqtiŋit qaukłiŋi umialgum. Aŋuyaktiŋich Persia-mlu, Media-mlu tavraniinŋammiut, tainna suli kavanauruat suli umialiŋnat kaŋiqaqtuat nunaŋiññi.

⁴ Naalġataqługi itchaksrani tatqich piraksriqsuqtiŋit manivanŋagai suġaliñi atanniqsuqtamiñi irvigmiñi qanutun qiññaġiksigiruat suli aliuġnaqtuat.

⁵ Taaptuma aquagun, umialgum niqinaqiutiqpaŋagai iluqaisa iñuich iniqpaŋani Susa-m, umialgugaluaġmata naakka iḷiappaugaluaġmata atunim. Tallimat malġuk uvlut naalġataqługi niqinaqiqpaŋarut nautchiaqaġviani umialgum igluqpaŋani.

⁶ Umialgum irviata siḷataani qiñiyunaqutiqaŋaruq talukiyaaqaqhuni suŋauraaqtaanik suli qatiqtaanik ukił̣haanik, qiḷiġviqaqhuni tigluuraaqtaanik ukił̣haanik qivliaqtaanik tigummiviqaqhutik maapumik ayagutiligaanik. Aquppiviich savaaguŋaruat manigñik kaviqsuanik suli qatiqtuanik inillaŋagaich siḷataani, natiġutiqaqhuni qatiqtuanik maapunik, kaviqsaanik feldspar-nik, qivliqtuanik mother-of-pearl-nik, suli suŋauraaqtaanik turquoise-nik.

⁷ Imġutiŋich qallugaurat savaaguŋammiut manigñik kaviqsuaniñ, allakaaġiiḷḷaavlutik, suli iḷaŋaniiqsinŋammigaich umialgum wine-gutimiñik.

⁸ Killiiñŋaruq taaŋŋaq imiġuktuamun; umialgum suli piraksriŋammigai qaunaksriruat kivgani iñupayaaq iḷaŋaniiquvlugu imiġuktuat.

⁹ Taimmaliasii, umialgum igluqpaŋani tuvaaqataata Vashti-m niqinaqiutiqpaŋagaich aġnat.

¹⁰ Uvlut tallimat malġuŋanni niqinaqiruat Umialik imiŋasiuraaqhuni quviatchaŋaruq, tavraasii ququaŋagai tallimat malġuk ilaata nanmiñiq kivgani, Mehuman, Biztha, Harbona, Bigtha, Abagtha, Zethar, suli Carkas.

¹¹ Piraksriŋagai umialgum qaġġisitquvlugu tuvaaqatini Vashti, niaquġutiqaġlugu. Umialgum tuvaaqataa aġnaġipiaŋaruq, aasii umialgum qiñiyunaqtilaaŋa tuvaaqanmi manivanŋagaa atanauramiñun suli aiyugaaqtamiñun.

¹² Tavraasii kivgami uqallautimmanni Vashti piraksriutaagun umialgum, kamaksriŋaitchuq. Tavra umialik qinnalipiaġataŋaruq.

¹³ Piḷġusiġiŋagaa umialgum apiqsriyumiñaqłuni pitquraliqiriñun qanuq pitquraġlu suli piraksriun inniaġmagaan, tavraasii ququaŋagai siḷġiqsuqtini, iḷisimaniaġmata qanuq piraksrautilaamiñik.

¹⁴ Tavra saasuŋaiññaġuuraŋi siḷġiqsuqtini ukua Carshena, Shethar, Admatha, Tarshish, Meres, Marsena, suli Memucan—tallimat malġuuruat atanaurauruat Persia-miḷu Mediam-miḷu qutchigñiqsraŋi atanaurauruat umialgunmiñi.

¹⁵ Uqallautiŋagaich tavra taapkua inna, “Uvaŋa, Umialik Xerxes, tiliŋagitka kivgatka tuvaaqatimnun Vashti-mun piraksriutimnik, aasiuvva kamaksrisuŋitchuq! Qanuq aasiimma pitquraq itpa qanuġniaqtilaaptignik ilaagun?”

¹⁶ Tavra Memucan uqallaŋaruq kaŋiqsiñaqsipiaġataqługu umialigmun suli atanauraŋiññun inna: “Tuvaaqataata umialgum Vashti-m pisaaŋapiaġataŋagaa umialik atanauraŋiḷḷu—tavraami iluqaaqługiḷḷu aŋutipayaallu umialgutaani taputigaich!

¹⁷ Aġnapayaam tavra umialgutimni tuvaaqatini anmukturraqsiñiaġaa tusaagumik qanuq umialgum tuvaaqataa pitilaaŋa. Inna uqaġmiḷutik, ‘Umialgum Xerxes-gum piraksriŋagaluaġaa tuvaaqatini Vashti ullaquvluni, aasii kamaksriŋaitchuq.’

¹⁸ Tavra tuvaaqatauruat umialgum atanauraŋisa Persia-mlu Media-mlu tusaagumiŋ irrusianik umialgum tuvaaqataata, uqausiġiniaġaat tuvaaqatimignun taamna piruaq uvluq nuŋuŋaunnagu. Tuvaaqatauruat sumipayaaq qiksiksrautaiġñiaqtut uimigñun, suli uiguruat qinnautiniaġaich nuliatik.

¹⁹ Iviġaumagigupku umialguruatiin, manisiiñ kiliktuunmik Vashti suuramik-unnii sivuġaanutqikkumiñaiġḷugu umialgum. Aglaktillugulu pitquraġuġlugu Persia-mi Media-miḷu, allaŋŋuġumiñaipiaġataġlugu. Taimmaasii umialgum tuvaaqataa inaŋiqsillugu nakuulhaaqtuamik aġnamik.

²⁰ Tavraasii kiliktuun nalupqinaiġanikpan iluqaanun umialgutiqpagnun, aġnapayaurat qiksikkun uimignun aturraqsiñiaġaat, umialgugaluaqpan naakka iḷiappaugaluaqpan.”

²¹ Umialgum suli atanauraŋisa iviġaumagiŋagaat taamna sivunniutaat, aasii umialgum taŋŋiqsinŋagaa piraksriutaa Memucan-gum.

²² Nunaaqqiḷḷaanun atanniqsimaruanun tuyuŋaruq uqautchiŋisiktun suli aglausiatitun nunaaqqiḷḷaam, ugallautivlugi; piraksriqł̣ugi uigupayauraqtuaq qaukłiunivḷugu aimaaġvimiñi suli uqaġumiñaġuni ataniġnaqutiqaġuni.