Ephesians 6 - Iñupiatun Mumiksat Uqalugiksuat

Miqłiqtullu Aŋayuqaallu

¹ Miqłiqtuut, kamagisigik aŋayuqaasi Ataniq atausiŋŋuqatigiŋakavsiuŋ. Taamna nalaunŋaruq.

² Qutchiksuakun isummatigisigik aapasiḷu aakasiḷu, taamna unniqsuqłiisiqaqqaaqtuq pitquraniñ

³ piḷḷuataun itchumauq ilivsiññun suli iñuuyumausi sivisuruamik nunami.

⁴ Aŋayuqaaguruasii qinnaguksaaġnagich miqłiqtusi, aglaan iñukkuksaqsigik natqiksruutigilugich siḷġiqsuutigilugiḷḷu Atanġum iviġaumagikkaŋi.

Kivgallu Kivgaqaqtuallu

⁵ Kivgauruasii, kamakkutiqaġitchi tamatkunuŋa nunami ataniġikkavsiññun, qiksigilugich savautilluatapiaġlugich, savaurriyumalaaġlusi savautimmatun Christ.

⁶ Savaŋaiġḷusi qiñiqtiqaġuvsi kisian iñuŋnik iviġaiñiaqtitun, aglaan piḷusi kivgaŋisun Christ, savaaġilugu pisuutaa God-im piyumalaaġlusi.

⁷ Tavraasii savaurrisitchi piyummatigiksuakun savaŋmatun Ataniġmun, iñuŋnik savaurriŋiñmatun,

⁸ iḷisimalusi kialiqaa nakuurualiqiani tainnatuttauq aitchuusiaqautiginiaġaa Ataniġmiñ, kivgaugaluaġumi naagga atanġitkaluaġumi.

⁹ Atanġuruasii, tainnatuttauq pisitchi kivgavsiññun sivuuġasaaqsaiḷiḷugich, iḷisimalusi Ataniŋat ilivsiḷu Ataniqsi qiḷaŋmiittuaq aŋalatchisilaaŋanik ativlugich iñupayaat.

Annuġaat Aŋuyaunnat God-im Aitchuutiŋi

¹⁰ Aasiisuli, suaŋŋatiqaġitchi ikayuutaagun ilaan sapiġñaqtuam suaŋŋataata atausiŋŋuqatigiŋalugu Ataniq,

¹¹ atuġlugu iluqaan suaŋŋan God-im aitchuutaa ilivsiññun, Tuunġaum payariŋitchumagaasi pisaasuġmiaġunmigun.

¹² Qanuq aŋuyaŋitkivut iñuich timiqaqtuat, aglaan aŋalatchiruat ilitqusiqł̣uich siḷami, atanaurallu pigiitchuat aŋalatchiruat iñuŋnik mattumani nunami, suaŋŋatillu aŋalatchiruat pigiitchuanik makkunani uvluni.

¹³ Tavraasii ataramik atuqsiuŋ iluqaan suaŋŋan God-im qaisimaakkaŋa, payariyumagisi Tuunġaum piḷuksipkaġniutiŋi uvlut pigiiḷikpata. Itqanaitchitchi aŋuyaktitun iluqaisa atuġlugich aŋuyaunnat annuġaasi igḷutuġumiñaġumagisi akiḷḷivsi piyuaġutiŋi kiŋuppiasuŋaġnasi.

¹⁴ Tavra itqanaitchitchi. Aŋuyakti tavsiaġiksaaŋaruatun, tainnatun iḷumun illusi God-mun, suli aŋuyakti satqagutituqtuatun qatikkaaġnaiḷutaġivlugu, tainnatulli iñuuniaġitchi nalaunŋaruakun.

¹⁵ Aŋuyaktitun anŋiqpaktuqtuatun puukayasiasuŋił̣ł̣uni, tainnatulli itqanaitchitchi quliaqtuaġisaalukkumiñaġlugu tusaayugaaġiksuaq aŋuyautairrutauruaq.

¹⁶ Ataramik suaŋali ukpiġurri Ataniġmun, Tuunġaum anniaŋitchumagaasi, aŋuyaktim akkiġautaata qamitqataġmatun ikualaruat qaġruŋi akiḷḷimi.

¹⁷ Aŋuyaktisuli aŋuyaunnamun nasauttamiñun niaqquaqtaiḷimmatun, tainnatulli annaurraunivsi pitchaiḷigaasi pigiitchuamun. Suli God-im uqaluŋi Ilitqusiġiksuam qaisaŋi ilivsiññun savikpagimmatun illugich.

¹⁸ Taamna iluqaan pisiuŋ aŋaiyyutigilugu, apiġilugu God ikayuqulusi. Supayaaġuvsi aŋaiyyuuġlusi Ilitqusiġiksuam piyummiqpasi. Taamna pisigilugu nipuŋaitchitchi suli suuramikunnii qapiġnasi, aŋaiyyutilugiḷḷu ataramik God-im iñuŋi.

¹⁹ Aŋaiyyutiluŋalu uvaŋa, God-mun aitchuquluŋa uqaluksramnik, uqaqtuksraġuġaġiguma uqaurriyumauŋa sapiqsrautaiḷḷuŋa, iḷitchuġipkallalugulu tusaayugaaġiksuam kaŋiqsiñaitchuaŋa.

²⁰ Taamna tusaayugaaġiksuaq pisigivlugu uvaŋa Atanġum kivgaksraqtaaŋa tigutaaqtauruŋa. Aasii kiikaa aŋaiyyusitchi tusaayugaaġiksuaq uqautigiyumagiga taluqsraŋaiġḷuŋa uqausiksraptun.

Paġlasuiqsaaġutit

²¹ Paŋmapak iḷisimatqummigivsi qanuqitilaamnik suliqitilaamniglu, Tychicus piviuttaġirauruam aniqatim suli kivgaulluataqtuam Ataniġmun quliaqtuaġutiniaġaasi supayaanik uvapkun.

²² Tiliñiaġiga ilivsiññun taamnapiaġataq pisigilugu, iḷisimatqulusi qanuqitilaaptiŋnik, suli ilaanun qapiŋaisaaqulusi.

²³ God-iptuq Aapauruam Atanġuvlu Jesus Christ tutqiutiqaqtillisi piviuttaqqutiqaqtillusiḷu iluqaiññun aniqatinun, ukpiġutiqaqtillusiḷu.

²⁴ Nagliktuutiqpak illi iluqaiññun piviuttaqsriruanun Ataniptiŋnik Jesus Christ-mik nuŋulaitchuamik piviuttaqqunmik.