Ephesians 5 - Iñupiatun Mumiksat Uqalugiksuat

Iñuusitchi Qaummaġmi

¹ God-im tainna piqpagivlusi miqłiqtuliutimmasi ilivsiḷi tainnatun piñiḷuktuksraurusi avanmun, qanuq ilaan piviuttaġivlusi miqłiqtuġigaasi.

² Piviuttaqqutiqpaqaġitchi allanun iñuŋnun, maliġuaġlugu tuvraaksriutaa Christ piviuttaġivluta aitchuutigiŋaruq inmiñik God-mun tuqutauvluni piḷuutaiġukłuta. Tainna pikami, iviġaŋagaa God, taipkunatun ikipkairuatun niġrutinik aitchuikamiŋ ilaanun.

³ God-im iñugimmasi allatuqtuksrauŋitchusi, qanusipayaamiglu pigiitchuamik, kaviuqtuksrauŋitchusiḷu suuramik-unnii.

⁴ Uqautiqaqtuksrauŋitchusiḷu kanŋunaqtuanik. Uqaqtuksrauŋiñmiusi asiḷiqqutauruanik, suli pigiitchuanik uqaqtuksrauŋitchusi. Aglaan iłuałhaaqtuq nanġaġuvsiuŋ God.

⁵ Una nalupqinaigisiuŋ, kiñaliqaa allatuqtauruaq isiġumiñaitchuq atanniqsimavianun Christ God-ivlu naagga pigiiḷḷiqirauruaq naaggaunnii kaviuqtauruaq, kaviuġiłhaaqługich iñuiḷḷu sullu God-miñ. Taamna iñuuraqpaqaġniġuruq.

⁶ Kimulliqaa sagluqipkaġnasi iḷumun inŋitchuanik uqaluŋnik, qanuq tamatkua pisigilugich God-im tatavsaġniaġai kamasulaitchuat inmiñik.

⁷ Sagluqinniŋniaqtuanun piqasiqsuutinasi.

⁸ Ilivsivsauq piḷuusiqiugaġuuŋagaluaqtuasii iñuummatun taaġmi, paŋmapak Atanġum iñugiliutimmasi, piḷuusiqiugaŋaiqsusi, qaummaġmi iñuuruatun. Tavraasii iñuutuiññaqtuksraurusi qaummaġmi.

⁹ Iñuukavsi qaummaġmi, iñuupkaqtitaurusi nakuupiaqtuakun nalaunŋapiaqtuakullu iḷumupiaġlu ittuakun.

¹⁰ Iḷitchisaiññaġitchi iñuuniaġniġmik iviġaumasuglugu Ataniq.

¹¹ Piqasiqsuutinasi iñuŋnun piḷġusiqaqtuanun anniqsuutauŋitchuanik, iñuuvlutiŋ taaqtuami. Aglaan satqummiqsigik piḷġusiġiitchuaŋich qaummaġmun.

¹² Qanuq kanŋunaqtut-unnii uqautigisaqtuni piḷġusiŋich nalunautchivḷutiŋ.

¹³ Satqummiġuvsigik qaummaum qaummaġigviginiaġai piḷuutiŋich aasii satqummiġḷugich aasii iḷitchuġigumiŋ qanutun killukuapiaġataqtilaamiŋnik, iḷaŋich iḷaanni iñuurraqsiñiaqtut qaummaġmi.

¹⁴ Taamna pisigivlugu God uqallaŋaruq Bible-ni inna, “Itiġiñ siñiktii, qimakkich tuqqutauyumiñaqtuat piḷuutitin, aasiiḷi Christ iñuullasipkaġniaġaatin qaummaġmi.”

¹⁵ Qaunakłaapiaġitchiasiiñ qanuq iñuutilaavsiññik, isumalluaġiitchuatun iñuktun piŋaiġḷusi aglaan isumaturuatun,

¹⁶ atułhamaniaġlugu piviksraq anniqsuunmun, qanuq makkunani uvluni iñugiaktut pigiitchuat piñaiḷutchiqsuutit uvaptiŋnun savautitchaiḷisaavlugu Ataniq.

¹⁷ Tavraasii isumalluaġiiññasi, aglaan uvlutuaqpan nalupqinaiġñiḷuksiuŋ tuvraġuglugu suna Atanġum pitqukkaŋa ilivsiññun.

¹⁸ Suli imiŋasisiqaġnasi taaŋŋaġmik, qanuq taamna piaġiitchuamun pialapiaġataġniġmun ittuq, aglaan Ilitqusiġiksuamun aŋalatittitchi,

¹⁹ uqaurrutilusi avanmun psalms-nik nanġautiniglu ilitqutchikullu atuutinik, atuġlusi atuutinik, psalms-niglu Ataniġmun iḷuvsiññiñ,

²⁰ ataramik quyyatigilugich supayaat God-mun Aapamun, atqagun Atanipta Jesus Christ.

Tuvaaqatigiich

²¹ Qiksiksrautiqaqavsi Christ-mun, kamakkutiugaġitchi avanmun.

²² Nuliaguruasii, kamagisigik uisi, kamagimmatuttauq Ataniq.

²³ Qanuq uiguruaq ataniġnaqutiqaqtuq nuliamiñun Christ-tuttauq ataniġnaqutiqaqtuatun aŋaiyyuliqiruanun, suli Christ ilaa annaurrigigaat aŋaiyyuliqiruat, ilaan timigimmatun itaŋisa.

²⁴ Aŋaiyyuliqiruatun kamakkutiqaqtuatun Christ-mun, tainnatuttauq nuliaguruat kamakkutiqaġlich uimiŋnun supayaatigun.

²⁵ Uiguruasii, piviuttaġisigik nuliasi, tainnatuttauq Christ piviuttaġimmatun aŋaiyyuliqiruat suli aitchuutigivluni inmiñik pisigivlugich tuqutauvluni.

²⁶ Ilaa tainna piŋaruq aŋaiyyuliqiruat ilaaguaqsaqługich God-mun, akuqtuġnaġumiñaqsisaqługich piraksriŋagai paptaiqsautquvlugich kamagilugiḷḷu uqaluŋni.

²⁷ Ilaa tuquŋammiuq iñuich aŋaiyyuliqiruaġuġlugich ilaan pigiliutisukługich. Niviaqsiaq aŋunmun tuvaaqasiutiruatun ilaan aŋaiyyuliqiruani piḷuutaitqugai naġġunaqtuagiḷḷugich piññaġnaqtuatun niviaqsiatun tuvaaqatiksrautiqaqtuatun salumavluni qanusiḷimaamiñ suaġiirrunmiñ.

²⁸ Uiguruat piviuttaġiraksraġigaich nuliatiŋ nanmiñiq timimiktun iḷiḷugich. Iñuk piviuttaqsriruaq nuliamiñik piviuttaġiruq inmiñun.

²⁹ Qanuq qaŋaunnii iñuum uumigiŋaitkaa timini, aglaan pamatchuugaa qaunagivlugulu, Christ-tauq qaunaksrimmatun aŋaiyyuliqiruanik,

³⁰ qanuq ilaan uvagut timigimmatun itkaatigut atausiŋŋuqatigivluta.

³¹ Bible uqaluŋiññi God uqallaŋaruq inna, “Taamna pisigilugu, aŋutim qimaguuniġik aapaniḷu aakaniḷu aasii nayuqsiutivlugu nuliani. Tavra iliŋik malġuuruak atautchisun iñuktun iḷiñiaqtuk.”

³² Kamanaqtuaq iḷisaurrun salapqiŋaruq taavrumuuna Bible uqaluatigun tuvaaqatigiikkun, aasiivsauq kaŋiqsigiga sivuniqaqtilaaŋanik Christ-mullu aŋaiyyuliqiruanullu.

³³ Suli sivuniqaġmiuq ilivsiññun tuvaaqatigiiksuanun. Aŋutipayaam piviuttaġiraksraġigaa nuliani ilimisun iḷiḷugu, suli nuliaguruam isummatigilluataġlugu uiñi.