Ephesians 4 - Iñupiatun Mumiksat Uqalugiksuat

Atautchisun Timitun Inniq

¹ Tavraasii uvaŋa, tigutaaqtaq savautivlugu Ataniq, qiññuaġivsi iñuutquvlusi nalliummatiruamik God-im iñuutqutaanun ilivsiññun,

² kamasaaŋiḷḷusi pikałaktautaiḷḷusiḷu qiñuirrutilusiḷu avanmun, manimmisilusiḷu pimaqłuutivsigun avanmun pisigilugu piviuttaqqutiniqsi.

³ Ilitqusiġiksuam atipkaġlisi, tutqiutiqaġumausi avanmun.

⁴ Qanuq iluqasi atausiurusi, timitun atausiuruatun. Atausiummiuq Ilitqusiġiksuaq, aasii God-im ququaŋammigaasi piqatigiiquvlusi atautchimi annagummanmi.

⁵ Suli atausiummiuq Ataniq, ukpiġivigikkaŋat iñuich atunim, iḷaŋiutiŋammiut atunim atautchimun paptaiġunmun.

⁶ Suli atausiummiuq God, aapaŋat iñuich iluqaġmiŋ, qaukłiġikkaŋat supayaat, savaktuaq supayaatigun, suli iñuuruaq supayaani.

⁷ Tavra Christ aitchuŋagaatigut atausiullaavluta piraksrallaanik supayaanik pitqukkamiñik uvaptiŋnun.

⁸ Taamna sivuniġivlugu, aglausimaruq Bible-ni inna, “Mayuqami qiḷaŋmun, aullarriŋaruq tigutaaqtaġiŋakkaŋiñik Tuunġaum, suli qaitchivḷuni piraksranik iñuŋnun.”

⁹ Sumik sivuniqaqpa uqallaun, Ilaa mayuŋaruq? Sivuniqaqtuq mayuqsaŋaiñŋaġmi atqaŋaruq atchiŋñiqsrapiaġataŋanun nunam.

¹⁰ Aasii taamna atqaŋaruaq ilaaguruq mayuŋammiruaqtauq qutchiŋñiqsramun qiḷaŋmun, ilaan atanniqsimasukługich supayaurat.

¹¹ Aasii aitchuutiŋi innasiuŋarut, iñuich iḷaŋich tilirautquvlugich, iḷaŋich uqaqtautquvlugich God-mun, iḷaŋich tusaayugaaġiksuanik alġaqsruitquvlugich, iḷaŋich aŋaiyyuliqsautquvlugich iḷisaurrautquvlugiḷḷu.

¹² Taamna piŋagaa, itqanaiyaqsaqługich iluqaisa God-im iñuŋi savaaqsranun ukpiqtuaguniġmiŋni, sivunmuktuutiksraŋannik aŋaiyyuliqiruat, timigikkaŋi Christ.

¹³ Tavra iluqata atunim ukpiliġataqtilluta, suli uvaptiŋnun iḷitchuġipiaġataqtillugu Iġñiŋa God-im, iñuullautaġuminaqsiḷġataġluta iñuusipiaġatamik Christ iñuusiġitqukkaŋanik uvaptiŋnun, ilaan iñuusimisun.

¹⁴ Tavraŋŋaaglaan inŋaiġñiaqtugut miqłiqtutun maliksuyaruatun, asiñuutipkaġumiñaiġḷuta killukun iḷisaurrutiŋiññun sagluqinnigniaqtuat iñuich, pisaasuunmikkun killukun ukpiqtitchisuuruat iñuŋnik.

¹⁵ Aglaan sivunmuktuqtuksraurugut supayaakun Christ-tun iḷisaiññaġluta iḷisaurrutigilugu iḷumun ittuaq piviuttaqqutiluta. Christ niaquuruatun ittuq,

¹⁶ aasiiḷi uvagut sulliñiġimmatun itkaatigut timim. Timi aŋalanmatun niaquata sulliñipayauraŋi savaŋmatun surruił̣ł̣utiŋ navyaapayaurat uniuqtinŋaił̣ł̣utiŋ, tainnatulli ikayuutiruksraummiugut avanmun iḷisaiññaġugluta Christ-tun piviuttaqqutiluta avanmun.

Nutauruaq Iñuusiq Christ-kuaqtuaq

¹⁷ Tavraasii Ataniq uqaqsiqł̣ugu uqallautigivsi qapiŋaiqł̣uŋa tavraŋŋaaglaan iñuusiqaŋaipiaquvlusi Jew-guŋitchuatun, isumaqaqtuatun anniqsuutauŋitchuanik,

¹⁸ suli kaŋiqsiḷaił̣ł̣utiŋ, qanuq nalupiallaktut uqayunaitchullu. Iliŋich iḷaŋiutiyumiñaitchut iñuutchimun God-im aitchuutaanun.

¹⁹ Suqpagillaiŋagaich unnii iluqaisa kanŋunaqtuat sut, aitchuutigivlutiŋ inmiŋnik qanusipayaamun pigiiḷḷiqunmun, maliġuaqługich isummiutitiŋ qanusipayauramun pigiitchuamun pitchaiḷiraġniaġnatiŋ.

²⁰ Iḷisaŋaitchusi tainnatchimik iñuutchimik iḷisausiavsigun Christ-kun.

²¹ Nalupqinaitchuq tusaayugaaġiŋagiksi Christ, aasii ilaan maliġuaqtigimmasi iḷisausiaqaŋarusi iḷumun ittuanik Jesus iḷisaurrutiŋiñik.

²² Tavraasii aŋalatinŋaiġitchi piḷuksisuguuruanun iñuusiġruavsiññun, pipkaisuuruanun ilivsiññik taimani iñuusiġisuukkavsiññik pigiipiaġataqtuakun inŋaruanik, kipiqsaaqłusi pigiitchuanun sagluqivlusiḷu.

²³ Nutaaġuqtuksraupiaqtusi kipiġniuġutigikkavsigun isumanivsiññiḷu.

²⁴ Aŋalatittuksraupiaqtusi nutauruamun iñuutchivsiññun savaaguruamun God-im irrusiatun, iñuupkaiyumiñaqtuamun ilivsiññik iḷumutun nalaunŋaruakun piḷuutaitchuakullu.

²⁵ Tavraasii sagluuŋaiġitchi. Iñupayaaq uqaqtuksraupiaqtuq iḷumun ittuamik ukpiqtuaguqanmiñun, qanuq iluqata atautchimiittugut timaani Christ.

²⁶ Qinnaliġuvsi piḷuksisiginagu. Qinnaŋanasi uvluqtutilaaŋatun,

²⁷ tuunġaq piviksraqaqtitauŋitchumauq piḷuksipkaġumiñaġlusi.

²⁸ Tavraŋŋaaglaan tigligaqti tigligaŋaiġḷi, aglaan savagli saglutaġautaitchuakun, aitchuutiksranikkumauq piiḷḷiuqtuanun.

²⁹ Uqaluqaġnasi anniaġutauruanik iñuŋnun, aglaan uqaluqaġitchi anniqsuutauyumiñaqtuanik sivunmuktuutauyumiñaqtuaniglu, tamatkua tusaaruat uqaluvsiññik anniqsuusiaqaġumaut.

³⁰ Suli isumaalluksaaġnagu Ilitqusiġiksuaŋa God-im, qanuq Ilitqusiġiksuaq God-im nalunaiñŋutchiutigiŋagaa pigiliutivlusi, nalupqinaiyautigivlugu uvlumi taivrumani God-im annaktinniaġmasi iluqaaniñ piḷuunmiñ.

³¹ Uumiḷuġruutiqaġnasi iḷuvsiññi, piavsayyataiḷḷusiḷu qinnautaiḷḷusiḷu qanaaġutaiḷḷusiḷu, suamaruanik uqaŋaiġḷusiḷu naġġuksruutiŋaiġḷusiḷu,

³² piaqłuktautiŋaiġḷusiḷu avanmun, nagliksrautiqaġlusiḷu suliqutigiŋaiġutilusiḷu avanmun, God-iptauq suliqutigiŋaiŋammagich itqaumayumiñaiqł̣ugich piḷuutisi pisigivlugu Christ.