Ephesians 3 - Iñupiatun Mumiksat Uqalugiksuat

Paul Savautigai Jew-guŋitchuat

¹ Uvaŋa Paul tigutaaqtauruŋa pisigivlugu alġaqsruiñiġa tusaayugaaġiksuamik Christ-kun ilivsiññun Jew-guŋitchuanun.

² Iḷisimarusi God-mun aitchuŋatilaamnik taavrumiŋa savaaksrapiaġatamik, alġaqsruiñiġmik ilivsiññun Jew-guŋitchuanun God-im nagliktuutiqpaŋanik.

³ Taamna sivunniuġutaa God-im Jew-guŋitchuanun iḷisimanaiñŋaruaq sivuani, God-im salapqiŋagaa uvamnun. Taamna uqautigillaŋagiga uqautigipiasuŋaġnagu tuyuutimni.

⁴ Aasii taiguallaisa tuyuutitka, puttuqsriñiaġiksi kaŋiqsisiqaqtilaaġa alġaqsruutiqaġniġmik Christ-mik.

⁵ God-im kaŋiqsipkaŋaitkaa taimani iñuuruanun iñuŋnun paŋmapak kaŋiqsipkaisiġmisun ilaaguaqtamiñun uqaqtimiñullu Ilitqusiġiksuakun.

⁶ Aasiuvva God-im salapqiŋakkaŋa. Jew-guŋitchuat kiŋuvaannaqataullasivḷugich Jew-guruanun. Iliŋich Jew-guruatuttauq pigillavlugich Christ-gum, aasii piqataullasivḷutiŋ annaunmun unniqsuqłiisauŋaruamun Christ-kun, ukpiġiliqamisigik tusaayugaaġiksuat.

⁷ God-im piksraqtaaġiŋagaaŋa alġaqsruirautquvluŋa tamattumiŋa tusaayugaaġiksuamik, nagliktuutiqpaqaqłuni uvamnun annautivluŋa suaŋŋanmigun.

⁸ Kamanaiññiqsraugaluaqtilluŋa iluqaiññiñ ilaaguaqtauruaniñ God-mun, ilaa naglikkutiqaŋaruq uvamnun, aasii uvamnun alġaqsruutigitquŋagai Jew-guŋitchuanun inuaŋaitchuat anniqsuusiaksraŋich iluqaġmiŋ, atausiŋŋuqatauŋaruat Christ-mun.

⁹ Suli God-im piraksriŋagaaŋa kaŋiqsiñaqsitquvlugu ilaan sivunniuġutigiŋarani iñupayaanun, annaurrauniksraŋat iñupayaurat Jew-guŋitkaluaqtuat Jew-guruallu. God-im savaŋaruam supayaanik, nalunaqtinŋagaa aippaapak taamna sivunniuġutini.

¹⁰ Paŋmapak God-im iḷitchuġipkaŋagaa sivunniuġutini aŋaiyyuliqiruatigun, tamatkua iluqaisa isaġulgiḷḷu ilitqusiqł̣uiḷḷu tautuquvlugich taŋŋiutaanik kamanaqtuam isumattutaata God-im.

¹¹ God-im sivunniuġutigiŋagaa taimaŋŋaqaŋa isuaniñ taamna sivunniuġutini taŋŋiqsauniaġnivḷugu Jesus Christ-kun Ataniptigun.

¹² Aasii pisigivlugu ukpiġniqput ilaanun, qikkisaiġḷuta attaqsruutaiġḷutalu ullautiyumiñaqtugut God-mun.

¹³ Nagliksaaqtuŋa pisigivlugu quliaqtuaqaġniġa tusaayugaaġiksuanik ilivsiññun, aasii apiġigivsi ipiqtusuutigitquŋił̣ł̣ugu taamna, aglaan qapiŋaisaaġusiaġitquvlugu pisigilugu anniqsuusiaqaŋaniqsi alġaqsruutipkun ilivsiññun.

Piviuttaqqutaa Christ

¹⁴ Isummatigikapkich tamatkua iluqaisa God-im sivunniuġutigiŋaraŋi, pułłuŋa aŋaiyyuruŋa Aapamun,

¹⁵ Aapauruamun iluqaiññun ukpiqtuanun, qiḷaŋmiitkaluaqpata naagga nunamiitpata,

¹⁶ aŋaiyyuvluŋa God-mun inuaŋaitchuamik nagliktuutiqpaqaqtuamun, suaŋŋasipiaġataquvlusi Ilitqusiġiksuaŋanun iḷuvsiññiittuamun iñuuyumiñaqsiḷusi nalaunŋaruakun,

¹⁷ iḷisimanaġumauq Christ iñuutilaaŋa uummativsiññi sivisutilaaŋatun ukpiqsimaaġnivsi. Aŋaiyyummiuŋasuli piviuttaqsriqpaktuagukavsi, kaŋiqsiyumiñaquvlugu piqatigilugich iluqaisa ukpiqtuat iḷitchuġilugu uummativsiññiñ,

^18-19 qanutun kamanaqtilaaŋa piviuttaqqutaata Christ-gum uvaptiŋnun. Piviuttaqqutaa kamanaqpaił̣ł̣uni iḷitchuġimmaġiksiyumiñaitkikput iluqaan. Sutun ittuq aktilaaġnaġumiñaipiaqtuatun, ikiqtułhaaqłuni, takiłhaaqłuniḷu qutchił̣haaqłuniḷu itiłhaaqłuniḷu supayaamiñ qiñiqtuuraaġumiñakkaptiŋniñ. Tainnainniġman aŋaiyyutigivsi ataramik iñuutquvlusi nalaupiaġataġlugu God-im iñuutqutaa ilivsiññun.

²⁰ Qanutułhaaq God-im pisiyumiñaġaatigut qaaŋiġḷuguunnii apiqsriaġiyumiñakkaqput naagga qiñiqtuuraaġumiñakkaqput. Taamna ilaan piḷḷagaa Ilitqusiġiksuakun ikayuqtigianikkaptigun ilaan iñuutqutaagun uvaptiŋnun.

²¹ Iñupayaat isuiḷaamik nanġaġlirruŋ God paŋmapaŋmiñ isagutilugu isuitchuamullu, pisigilugu ilaan aktilaaganignaġumiñaitchuaq kamanautaa iḷisimanaqsiŋaruaq aŋaiyyuliqiruatigullu Christ-kullu.