Ephesians 2 - Iñupiatun Mumiksat Uqalugiksuat

Tuqqunmiñ Iñuggunmun

¹ Tavra ilivsi qaŋapak tuquŋaruatun iñuktun inŋagaluaqtuasii qanuq piḷuksiŋavlusi kamagiŋił̣ł̣ugiḷḷu God-im pitquraŋi, God-im aitchuŋagaasi iñuggunmik isuitchuamik.

² Taimani iñuuŋagaluaqtuasii piḷuusiqutini, nunam iñuŋisa iñuusiatitun. Taimani qaukłiata ilitqusiqł̣uich piḷuusiqipkaŋavlusi, paŋmapaksuli iñuŋnik kamaksripkaiŋiñmatun God-im pitquraŋiñik.

³ Tainnauvva iluqata qaŋauvlugu iñuusuuŋagaluaqtuaguut. Pisuuŋaruaguut qanuq piḷuksisuguuruat iñuutchivsa pisukkaŋiññik, iñuuvluta iviġagniugaqsiññaqługich timiptalu isumaptalu pisukkaŋich. Tavra ukpiqtuaguŋiññapta taimani, tatavsaqtauyumiñaŋagaluaġmiugut allatuttauq iluqaisitun ukpiŋaitchuatitun iñuktitun.

⁴ Aglaan God naglikkutiqpaqaŋaruq uvaptiŋnun suli piviuttaġiqpaŋagaatigut.

⁵ Irrusiqaŋagaluaqtilluta tuquŋaruatun iñuktun pisigivlugich piḷuutivut, God-im aitchuŋagaatigut iñuggunmik isuitchuamik aŋipkaqamiuŋ Christ tuqqunmiñ, qanuq atausiŋŋuqatigiŋagikput Christ. God-im nagliktuutiqpaŋagun annaurrauŋarugut.

⁶ Aasiisuli atausiŋŋuqatigiŋavlugu Christ, aŋipkaqtauganiŋammatun ittugut Christ aŋipkaqtaumman. Suli inmiuq uvagut qiḷaŋmiitaniŋmatun aquppivḷuta inaani kamanaqsipkaqtauvium piqatigivlugu Christ Jesus, qanuq ilaa atausiŋŋuqatigiŋagikput.

⁷ Tainna pikami God piaqłuktautaipiaġataŋaruq uvaptiŋnun atausiŋŋuqatigipkaqamisigut Christ-mun, aasii taavruma iḷisimanaqsiñiaġaa isuitchuamun qanutun God naglikkutiqpaqaqtilaaŋa uvaptiŋnun.

⁸ Qanuq God-im nagliktuutiqpaŋagun annaurrauŋarusi ukpiliqavsi. Annautiŋaitchusi ilivsiññik sunik piḷusi. Taamna annaun God-im aitchuutaa ilivsiññun.

⁹ Annaurrauŋaitchusi pisigilugich piḷġusiḷḷuatasi. Annaurraullaniġuvsi piḷġusiḷḷuatasi pisigilugich, iñuk uqavigaaġutiksraqaġniaġaluaqtuq.

¹⁰ Aglaan God ilaa allaŋŋuqtitchiŋaruq uvaptiŋnik, atausiŋŋuqataullasivḷuta Christ-mun, iñuulluatallasitquvluta. God sivuniqaŋaniqsuq iŋiḷġaan tainna iñuuruksrauvluta.

Atausiŋŋuqatigiigñiq Christ-mi

¹¹ Tavra itqaqsiuŋ qaŋauvlugu ilivsi Jew-guŋitchuasii taiguqtauŋagaluaqtilaaqsi nalunaiñŋutaiḷanik Jew-guruanun timimiŋni nalunaiñŋutaqaqtuanun.

¹² Itqaumasitchi taimani atausiŋŋuqatigiŋaitkiksi Christ, iḷauŋaiñŋarusi God-im iñuksraqtaaŋiñun Israel-guruanun. Piqatauyumiñaiñŋarusi aitchuusiaqaqtuanun unniqsuqłiisinik God-im sivunniuġutigiŋakkaŋiñik iñuksraqtaamiñun, aasii piqaŋił̣ł̣usi annagummanmik, suli naluvlugu God.

¹³ Tavra uŋasiguuŋagaluaqtuasii God-miñ, paŋmapak Christ qaġġisiŋagaasi ilaanun, maqipkaqługu auni tuqqutivlusi.

¹⁴ Christ aŋuyautaiqsinŋagaatigut God-mun avanmullu. Jew-guruallu Jew-guŋitchuallu atiŋitkaluaqtuat uumikkutivlutiŋ, paŋmapak atisiŋarut aŋuyautiŋaiqł̣utiŋ.

¹⁵ Jew-guruat pigivlugich iluqaisa God-im pitquraŋi, aŋaiyyuvikpaŋmiḷu piraġautchich, isummatigiŋarut inmiŋnik nalaunŋałhaaqłutiŋ Jew-guŋitchuaniñ. Tavra Christ tuqukami, asivaŋagai pitqurapayaurat nalaunŋasiñiaġutauŋaiqł̣ugich iñuŋnun, aglaan iñuich nalaunŋasipkaq tauyumiñaqsivḷugich ukpiġlutiŋ ilaanun. Taamna pisigivlugu Jew-guruallu Jew-guŋitchuallu atausiŋŋuqatigiŋagaat Christ, aasii aŋuyautiŋaiqł̣utiŋ avanmun.

¹⁶ Atunim Jew-guruallu Jew-guŋitchuallu avilaitqatigiiksittut God-mun Christ tuqqutaagun aŋarraurami, aasii paŋmapak suuramik-unnii uumikkutaiqsut avanmun.

¹⁷ Suli Christ tiliŋagai alġaqsruirini quliaqtuaġutitquvlusi aŋuyaŋaiġunmik God-mun, ilivsi Jew-guŋitchuasii uŋasiŋagaluaqtuasii God-miñ Jew-guruallu qanittuat God-mun.

¹⁸ Tavra atausiŋŋuqatigiŋakaptigu Christ iluqata, Jew-guruallu Jew-guŋitchuallu, ikayuqtiqaqtugut atautchimik Ilitqusiġiksuamik ullautitquvluta Aapamun.

¹⁹ Tavraasii tavraŋŋaaglaan allayuaguŋaiqsusi iglaaguŋaiqsusiḷu, aglaan atausiŋŋuqataurusi ilaaguaqtauruanun God-mun, iḷaliutivlusiḷu igluqatiŋiñun God-im.

²⁰ Ilivsi igluqpaum iḷagimmatun itkaasi nappakkaŋata maŋŋuliġmatun pivḷugu tilirauruaniglu uqaqtiŋiñiglu God-im, Christ Jesus ilaa sivulliqsun maŋŋuksratun uyaġaktun maŋŋuliutiqqaaqługu.

²¹ Qaaŋanun taavruma maŋŋuliutauqqaaqtuam uyaġaum igluqpak iluqani ipiqqiqsauruq aasii nappaqługu aŋaiyyuviguqsaiññaqtuatun ilaaguaqtauvlugu Ataniġmun.

²² Tavraptauq tainnatun ilivsi iḷagimmigaasi God-im igluata aasii God iñuuvluni iḷuvsiññi Ilitqusiġiksuamigun.