Deuteronomy 9 - Iñupiatun Mumiksat Uqalugiksuat

Iñuich Kamaksriŋirrutaat

¹ “Naalaġnisitchi, iñuŋi Israel! Uvlupak uvva ikaałhiñaaġuġiksi Jordan River nunannaktaaġiyyaqlugulu allat nunaŋat kamanałhaaqtuat ilivsigñiñ suaŋałhaaqłutiglu. Iniqpaqaqtut, katchiqaġmiut qutchiksuanik pamma pamuŋa.

² Iñuqaqtut aŋiruanik suaŋammivḷutiŋ; iñukpasuich, tusaasuummiusi kimun unnii akiiḷiyumiñaiññivḷugich.

³ Paŋmapak-aglaan qiñiġniaġiksi Ataniq God-iksi sivuvsiññi ikualaruatun igniqtun. Ilaan akiiḷiñiaġaich sivuġavsiññi, qimaaratchiḷugich suksraunġiġñiaġisi, ilaan unniqsuqłiutaa nalaullugu.

⁴ “Atanġum God-ivsi qimaaratchiañikpagich, uqallagnasi ilivsigñun nunannaktaaqaqtuksrauvlusi piñiḷusi. Naumi, Atanġum qimaaratchiŋagaich ilivsigñiñ piḷukpaił̣ł̣utiŋ.

⁵ Sivuniqaŋiñmiuq nakuuvaił̣ł̣usi piḷḷuataqtuaguvlusiḷu Ataniġmun nunaiqsinniḷugich. Qimaaratchiñiaġaich piḷuktuaguniŋat pisigilugu suli unniqsuqłiunni nalautitchukługu kiŋuniivsigñun Abraham-mun, Isaac-mun, Jacob-mullu.

⁶ Nalupqinaitchuq Atanġum nunalluataksriñŋitkaasi nakuuniqsi pisigilugu. Naumi, sivunmuutuqpaktusi.

⁷ “Puigugniaġnasiuŋ qanuq Ataniq God-iksi qinnaiŋatilaaŋanik nunagluktuami. Aullaġluqqaaqtusi Egypt-miñ tikiḷgataġnivsiŋñuaglaan mauŋa, paaqlaktaŋaiyuitkiksi.

⁸ Mount Sinai-miunnii Ataniq qinnaiŋagiksi suksraunġiġuliqsitaallavsi.

⁹ Iġġimun mayuŋaruŋa akuqtuġiaqługik uyaqqak aglaŋaruak sivunniuġutauruanik Atanġum ilaata savaaġiŋaraŋiññik piqatigivlusi. Tavraniinŋaruŋa malġukipiani (40) uvluni unnuaqtuummaisa niġigaluaġnaŋa imiġaluaġnaŋaunnii.

¹⁰ Tavraasii Atanġum qaił̣ł̣ugik malġuuk uyaqqak aglaagni ilaan argagmiñik uqausimisun ilivsiññun ignimiñ iġġimi.

¹¹ Aaŋ, malġukipiat (40) uvlut unnuaqtuummaisa qaaŋianigmata Atanġum aitchuŋagaaŋa uyaqqagnik aglaŋaramiñik pitquranik sivunniuġutikun.

¹² “Taimmalu Atanġum uqallautivaaŋa, ‘Akkupak atqaġiñ iġġimiñ, uvvakii iñuktin annaktittatin Egypt-miñ, maqurrusiqilgitchut pigiitchualiqirullu. Asiñuanilgitchut piraksriutikkaluamniñ iñuuraqpaliuqłutiŋ inmignun.’

¹³ “Atanġum uqallautimmigaaŋa, ‘Iḷisimagitka taapkua iñuich sivunmuutupiaġataqtut.

¹⁴ Nutqaqtinnialanaŋa. Sivunniŋaruŋa suksraunġiġukługich itqaumanaġumiñaiġḷugich. Ilvich aasii aapaġuġlutin nunaqpagmun aŋiłhaaqtuamullu iliŋiññiñ.’

¹⁵ “Tavra kiŋunmun atqaqtuŋa iġġimiñ, tigumiaqługik uyaġaak pitquranik aglaqaqtuak sivunniuġutikun. Igniq ikuallaktagaġmivḷuni iġġimiñ.

¹⁶ Tautuŋagivsi kamaksriŋisaniktilaavsigñik pitqutaanik Atanġum God-ivsi ilaan qaisaŋiññik, puttuqsrimmiuŋa piḷuksitilaavsigñik, paaqłagruiññaqługu aasii iñuuraqpalivḷusi savił̣haġruiññaġmik arriqaqtuamik tuttuqłuayaam aŋusalluanik.

¹⁷ Tavra sivuġavsigñi taapkuak uyaġaak miḷuqsautigikka siqummalaaqługik.

¹⁸ Taimmasuliasii palluummiaqsiḷgił̣ł̣uŋa Atanġum sivuġaani malġukipiani (40) uvluni unnuaqtuummaisa tainna niġiŋaiḷaqłuŋa imiġaluaġnaŋaunnii. Tainna piŋaruŋa atakkii piḷuksiḷgitchusi paaqłakługu Ataniq qinnaivḷuguasii.

¹⁹ Sivuuġatchapiallaŋaruŋa Atanġum qinnaliqpautaanik, atakkiuvva qinnaliqpaił̣ł̣uni suksraunġiġukkaasi; tavraaglaan aasi naalaġniḷgitkaaŋa.

²⁰ Atanġum qinnautiqpaŋammigaa Aaron tuqutchuktaallaan unnii, taputivlugu Aaron aŋaiyyuupiallaŋaruŋa.

²¹ Tiguvlugu piḷułak iñuuraqpaliaqsi arriqaqtuaq aŋusalluŋatun tuttuqłuayaam iginŋagiga igniġmun. Taimmaasii siqumiłługu, kaukługu avyuġuqługu, siamiłługuasii avyuq kuugalugmun maqiruamun anmun.

²² “Tainnasuli qinnaiŋammigiksi Ataniq God-iksi Taberah-miinŋavsi, Maasah-miḷu, suli Kibroth Hattaavah-mi.

²³ Tavrasuli nunannagiaqummasi aitchuutiginiaqtamiñik Kadesh Barnea-miillavsi, paaqłaŋalgiñmigiksi; ukpigiŋił̣ł̣ugu kamagisuŋił̣ł̣ugulu.

²⁴ Tavra nayuqsiutikavsiqaŋa paaqłaktuaġiksi Ataniq.

²⁵ “Tavra palluŋaataŋaruŋa Atanġum sivuġaani malġukipiani (40) uvluni unnuaqtuummaisa, iḷisimavluŋa suksraaġumaallipiaŋatilaavsigñik.

²⁶ Aŋaiyyuvluŋa, ‘Qutchigñiqsrauruatiin Ataniiq, suksraunġiġñagich ilivich pimaakkatiin iñuktin, annautiŋakkatiin ilivich Egypt-miñ kamanaqtuakun suaŋŋatiqpakkun.

²⁷ Itqaumalugich kivgatin, Abraham, Isaac, Jacob-lu, qaunagiŋaikkich ukua sivunmuulgutaat, pimaqłuktautaat, piḷuutiŋiḷḷu taapkua iñuich.

²⁸ Tainna inŋiñmikpan, Egypt-miut uqaġniaqtut nunannaktitchumiñaisimagaich unnii unniqsuqłiutikkaluaġmisun. Uqallagmiḷutiŋ uumigivlugich iñuktin nunagluktuamuutigitin tuqutchukługich.

²⁹ Uvvakii, taapkua iñuich ilvich iñuksraqtaatin suaŋŋatiqpakkun Egypt-miñ annautiŋaratin.’