Deuteronomy 8 - Iñupiatun Mumiksat Uqalugiksuat

Nunannaktaaksralluataq

¹ “Kamaksrisitchi iḷumutuupiaġlusi pitqurriutipayaatka qaitchatka uvlupak ilivsigñun, iñuullayumausi, iñugiaksiḷusiḷu, nunannaktaaġilugulu Atanġum unniqsuqłiutigiŋaraŋa imma maŋŋuuvsigñun.

² Puiguġnagu qanuq Atanġum God-ivsi igliġutitilaavsigñik nunagluktuakkun malġukipiani (40), ukiuni qaaŋianiktuani uuktuaġusiaqaqtiłłusi siġġaqipkaqłusi, iḷitchuġisukłuni qanuq igliġniaqtilaavsigñik suli kamaksriḷguniaġmagaavsi pitquraŋiññik.

³ Kaaksiupkaqłusi, qiñuiquvlusi, taimmaasii maana-mik aitchuġmivlusi niqiksravsigñik, niqimik ilivsi maŋŋuuvsiḷu qaŋaunnii niġiŋaisavsigñik. Ilaan taamna nalautinŋagaa iḷisautisukłusi inna, iñuk iñuuniaŋitchuq niqikun kisiagun, aglaallu ukpiġilugich Atanġum uqalupayauraŋi.

⁴ Taapkunani ukiuni malġukipiani (40) annuġaasi maquliḷaitchut, isigasiunnii puvinŋasisuiñmiut.

⁵ Puiguġnagu qanuq Atanġum God-ivsi tatavsaqłusiḷu aapa natqiksruiruatun miqłiqtuġmiñik.

⁶ Tavraasii, savagitchi Atanġum pitqutaatun: iñuusitchi nalaullugich qiksigilugiḷḷu pitqutiŋich kamagilugiḷḷu.

⁷ Atanġum God-ivsi nunagiksuamuutiniaġaasi naummaaġiksuamun. Tamanna nuna imġukkaqłuni kuuġuluuraummivḷuni maqsralukłutiŋ natiġnanun qimiqqanuḷḷu.

⁸ Nuna naurisuuvluni palauvaksranik suli barley-ñik, grape-nik, suli fig-nik, pomegranates-nik, suli olives-nik, honey-ñiglu.

⁹ Tavrani kaaksiuyumiñaitchusi naakkaqaa susuksiuniaŋiñmiusi. Uyaġaŋich savił̣haqaġmiut, qimiġaŋiḷḷu kannuyaqaqłutik.

¹⁰ Niqaiḷḷiuġvigiyumiñaitkiksi, quyyavigisimaaġniaġiksi Atanġum God-ivsi nunalluataksrirrutaa.

Sivuuġasaaġun Puiguiñikun Ataniġmik

¹¹ “Puiguiñiaġnasiḷu Ataniġmik God-ivsigñik; naakka kamaksriŋaiġñiaġnasiḷu pitqutaiññik piraksriutigikkamnik uvlupak ilivsigñun.

¹² Kaaksiuyumiñaitchusi aimaaġvigiksualiuġmiḷusi,

¹³ pamiqsaasi imnaigutisiḷu iñugiaksiiññaġniaqtut, suli maniutisi qatiqtuat kaviqsuallu nausiiññaġmiḷutiŋ suġaliññaktaasiḷu agliiññaġlutiŋ,

¹⁴ Qaunakłaapiaġumausi piqpagaaliġñasiḷu puiguisuŋiḷḷusi Ataniġmik God-ivsigñik annaurriŋaruamik ilivsiññik Egypt-miñ, kivgauŋavivsiññiñ.

¹⁵ Igliġutiŋagaasi nunagluktuakun tatamaanaqtuakullu nimiġiaqaqłuni tuqunalignik igutchaqpaqaqłuniḷu kapputiqpaligñik. Paliumavaił̣ł̣uni imġiḷakun igliġutikamisi imiġmik maqipkaiŋaruq uyaġagmiñ imiquvlusi.

¹⁶ Nunagluktuami niġipkaŋagaasi maana-mik, niqimik maŋŋuuvsiunnii niqigiŋaitchaŋannik. Siġġaqipkaŋagaasi uuktuqsaqłusi, aquvatigun quviasuusiqsuġukłusi nakuuruanik.

¹⁷ Tainnamik, isumanialanasi suunasugivaił̣ł̣usi umiallakkasugalusi ilivsi suaŋŋativsiññik.

¹⁸ Itqaumalugu Atanġum God-ivsi ilaata suaŋŋasiġaasi umiallaktiłłusiḷu. Tainna pipkaġaasi ukpiġnapiallakłuni uvlupagmuaglaan sivunniuġutaa unniqsuqłiutigiŋaraġmigun maŋŋuuvsigñun nalautinniaġnivḷugu.

¹⁹ Puiguiñiaġnasi Ataniġmik, God-ivsigñik naaggaqaa allanun god-inun saanniaġnasi aŋaiyyuvigisuglugich savautiyumalugiḷḷu. Tainna piguvsi, kilikkivsi uvlupak suksraunġiqsaupiaġniaqtusi.

²⁰ Kamaksriŋisuaġuvsi Ataniġmik, suksraunġiqsauniaqtusi tamatkunatitun nunaqpauruatitun suksraunġiqsauruatun sivunmuktuġavsi.