Deuteronomy 7 - Iñupiatun Mumiksat Uqalugiksuat

Atanġum Ilaata Iñuŋi

¹ “Atanġum God-ivsi nunannaktaaksravsigñuutiniaġaasi, anillugich iñugiaktuat nunaqpaich. Sivunmuullavsi, aninniaġaich tallimat malġuuruat nunaqpaich aŋiłhaaqtuat suaŋałhaaqtuallu ilivsigñiñ: Hit-miut, Girgash-miut, Amor-miut, Canaan-miut, Periz-miut, Hiv-miut, Jebus-miullu.

² Atanġum God-ivsi qaitpagich suaŋŋativsigñun aasii akiisillugich, tamatkiġḷugich tuqutaksraġigisi aitchuutigilugich Ataniġmun. Sivunniuqatiginiaġnagich naakka nagliginiaġnagich.

³ Tuvaaqatchiutinasi iliŋiññun, naakka miqłiqtusi tuvaaqatchiqtuksrauŋitchut nalliŋiññik unnii,

⁴ atakkii maliksuksitpiaġaich miqłiqtusi Ataniġmiñ nanġaisuksaaġlugich allanun god-inun. Tainna pimaguvsi, Atanġum qinnautiniaġaasi suksraunġiġḷusiḷu.

⁵ Aglaan ulġullugich ikipkaiviŋich, siqumillugich salumaruaġiraŋich uyaġaich nappaaŋich, siqummaaġlugiḷḷu itqautauniaqtuallu iñuuraqpaŋannun Asherah-mun, suli ikipkaġumagisi iñuuraqpaŋich.

⁶ Tainna piyumausi atakkii Atanġum God-ivsi pigigaasi. Iñupayaaŋiññin nunam naliġaaġiŋagaasi ilaaguaqtauvlusi ilaata iñugisukłusi.

⁷ “Atanġum nakuaġisiññaqłusi naliġaaġiŋaitkaasi pisigilugulu iñugiagniqsi; uvvakii iñugiakiññiqtauŋarusi allaniñ nunaniñ.

⁸ Atanġum aglaan nakuaġivlusi suli nalautitchukługu unniqsuqłiunni maŋŋuuvsigñun. Taamna pisigivlugu annautiŋagaasi suaŋŋatiqpagmigun piiqsitchukłusiḷu, kivgaunivsigniñ Pharoah-mun.

⁹ Itqaumalugu Ataniq God-iksi kisimitualuk iḷumutun God-auruq. Nalautinniaġaa sivunniuġutini iḷisimanaqtillugulu nakuaqqunni kisiññaitchuanun kiŋuniġiiñun nakuaqsriruanun inmiñik kamaksriruanullu pitqurriutimiñik,

¹⁰ Aglaan piñatchiaġniaŋitchuq suksraunġiqsauniġmun tamatkunuŋa uumiksriruanun inmiñun.

¹¹ Pagmapak aasii, kamaksrisitchi iḷisaurrusiavsigñik; kamagilugich pitqurat qaitchatka ilivsigñun uvlupak.

Quviasuusiaŋit Kamaksriñġum

¹² “Kamagiguvsigik piraksriutigiratka kamagipiaġlugiḷḷu, Atanġum God-ivsi sivunniunni nalautinniaġaa suli manivallugu nakuaqqunni nuŋusuitchuaq, unniqsuqłiunmisun maŋŋuuvsigñun.

¹³ Nakuaġiniaġaatin quviasuusiġḷutillu, iñugiaksitquvlusi miqłiqtuukkaqsiḷusi; piḷḷuataqtinniaġai nautchiivisi, palauvaksraqaqulusi, wine-qaqulusi, olives-qaqulusilu; quviasuusiġñiaġaasi pamiqsaagukkaqsiḷusi imnaigukkaqsipkaġlusiḷu. Tamatkuniŋa quviasuusiqsuġniaġaasi nunami unniqsuqłiutigiŋakkagmiñi maŋŋuuvsigñun qaiññiaġnivḷugu.

¹⁴ Nunam iñuŋi ilivsiksun piḷḷuatautiqaqtigiyumiñaitchut. Suli pamiqsaasi nalliat unnii ivaaqalaitchumiñaitchuq, naakka ilivsi aŋutit aġnallu miqłiqsisuitchuaguyumiñaiñmiut.

¹⁵ Atanġum naŋirrutaisinniaġaasi, piaġliuġnaqtuanik naŋirrutaiññik Egypt-miinnavsi, aglaan nalautitinniaġai akiḷḷiḷiqsuqtivsigñun.

¹⁶ Suksraunġiġumagisi nunaqpaupayaaqtuat Atanġum God-ivsi suaŋŋanmigun akiiḷipkakkaŋiich naglikkutaiġusi ilaiññun. Nanġaiñiaġnasiḷu god-iŋiññik, atakkii nanġaiñiq iñuuraqpanun maqurrutauniaqtuq ilivsigñun.

¹⁷ “Ilivsigñik nikaginasi nunaqpauruat iñugiakpaiññiḷugi qimaaratchiyumiñaiññasugalugich.

¹⁸ Iqsiginagich, itqaumalusi qanuq piŋatilaaŋanik Atanġum God-ivsi Pharoah-mun, iñuŋiññullu.

¹⁹ Puiguġnagich qiñikkasii irravsigñik aliuġnaqtuat qanuġlu suaŋŋatiqpagmigun Atanġum God-ivsi annautimmasi tigutaaqtaunivsigniñ, tainnasuli suksraunġiqsuatun Egypt-miunik, suksraunġiġñiaġmigai tamatkua iqsigikkasii pagmapak.

²⁰ Kavyapkaiñiaqtuq iriġaqtuġaluaqpataunnii, suksraunġiqsauniaqtut qanuġviiġutiŋ.

²¹ Tainnamik sivuuġaginagich tamatkua iñuich, Atanġum God-ivsi nayuġaasi; ilaakii kamanaqtuaguruq God sivuuġagiraksraułhaaqtuq.

²² Iñugiakiñaaqtauraaġlugich ilaan qimaaratchiñiaġaich nunaqpaich sivunmuktuġnivsigñi. Tamatkianikkumiñaitkisi tavrauvvaa, atakkii tainnaġaluaġuvsi, niġrutitik iñugiaksivaitpata igḷutuġayaitkisi, ilivsigñik navianniuqtitchiḷutiŋ.

²³ Atanġum akiisitaupkaġniaġaich akiḷḷiisi tatamaaliqsillugiḷḷu suksraaġataġlugich.

²⁴ Ilaan aitchuutiginiaġai umialiŋich ilivsi suaŋŋativsigñun. Tuqunniaġisi, aasii allat iñuich puiguġniaġaich. Kia unnii nutqaqtitchumiñaitkaasi; tamatkiġḷugich suksraunġiġñiaġisi.

²⁵ Ikipkaġumagisi iñuuraqpaŋich. Kaviuġinagich unnii maniich kaviqsuat qatiqtuallu qaaŋaniittuat iñuuraqpagni, suksramaaġlugich piksraqtaaġinasigi. Tainna piguvsi, maqurrutiginiaġisi, atakkii Atanġum naġġugipiaġataġaa iñuuraqpaktuġniq.

²⁶ Iñuuraqpagnik aggirriñasi, atakkii pimaqłuun ilivsigñuttauq tunŋaniaqtuq tunŋaruaq ilaiññun ittuat. Naġġugiruksraġigisi tamatkua iñuuraqpaich, atakkii Atanġum suksraaŋaraŋi.