Deuteronomy 6 - Iñupiatun Mumiksat Uqalugiksuat

Kamanaqtuaq Pitquraq

¹ “Tavra taapkua pitqurapayaat Atanġum God-ivsi piraksriutigikkaŋii uvamnun iḷisaurrutigitquvlugich ilivsiññun. Kamagipiaqsaġisi nunannaktaaksrautivsigñi.

² Iñuuniqtutilaavsiksun, ilivsi kiŋuniisiḷu qutchiksuaġilugu Ataniq God-iksi kamagilugiḷḷu pitqurapayaat qaitchatka ilivsigñun, sivisuruamik nunannaktaaqsi iñuuvigiyumagiksi.

³ Naalaġnisiuŋ una, maŋŋuqaqtuasii Israel-mik, kamagilugich! Suna iluaġluni ilivsigñun itchumauq, suaŋasiḷusi nunaqpaguġmausi, nunagiksuami nalaullugu Atanġum God-im unniqsuqłiutigiŋaraa maŋŋuuptignun.

⁴ “Naalaġnisiŋa Israel-guruasii! Ataniq kisiatualuk God-igigikput.

⁵ Piqpagilugu Ataniq God-in iluqaaġlugu uummatigni, ilitqusiġñi, suli suaŋŋatigni.

⁶ Puiguġñiaġnagich piraksriqsuutit qaisatka ilivsigñun uvlupak.

⁷ Iḷisaurrutigilugich miqłiqtuvsigñun. Uqausiġilugich aimmiguvsi, aullaġuvsi, unaŋuiqsiaġuvsi naaggaunnii savallavsi.

⁸ Agliutilugich maqpiġaanun aasii tallivsiññullu qauvsiñullu qiḷiqsruutilugich, itqautauyumaut ilivsigñun.

⁹ Agliutilugich upkuavsi avaluŋiññun upkuaqpavsigñullu.

Sivuuġasaaġun Kamaksriŋiññikun

¹⁰ “Nalaullugu unniqsuqłiutigiŋarani Atanġum God-ivsi maŋŋuuvsigñun, Abraham-mun, Isaac-mun, Jacob-mullu, ilaan nunannaktinniaġaasi aŋiruanik piqpagnaqtuanik nunaqpalluatanik ilivsi nappaŋaitchavsiŋñik.

¹¹ Iglut suġauttaġiksuat inillaŋaitchasi, nivviat nivaaġiŋaitchasi, siiġñaliviich olive-niglu nautchiiviich nautchirriutiŋaitchasi. Atanġum nunannaktitpasi iḷaŋaniiqsuaġniaqtusi,

¹² aŋŋuu puiguġniaġnagu Ataniq annaurriŋaruaq ilivsigñik Egypt-miñ, kivgauvivsigñiñ.

¹³ Qutchiksiḷiġlugu Ataniq God-iksi, nanġaġlugu kisiatualuk, unniqsuqłiiḷusi atiŋagun kisian.

¹⁴ Maliġuaġnasi allanik god-inik, nalliŋiññik unnii iñuich god-inik avativsiññi.

¹⁵ Maliġuaġuvsi allanik god-inik, Atanġum qinnautaa ikualaruatun suammagniaqtuq aasii suksraunġipiallaglusi, atakkii Ataniq God-iksi, paŋmapak ittuam ilivsigñi sigñaturuaguruq.

¹⁶ “Uuktuġniaġnagu Ataniq God-iksi, piḷġusiġiŋaravsiksun Massah-mi.

¹⁷ Kamaksriñiapiaġumausi pitqurapayaaŋiññik ilivsiŋñun.

¹⁸ Savagiñ sumik Atanġum iluaġiraŋanik, sunapayaaq ilignun iluaġumauq, nunannalluataġumausiḷu Atanġum unniqsuqłiutigiŋaraanik maŋŋuuvsigñun,

¹⁹ anitchumagisi akiḷḷisi, unniqsuqłiisaatun.

²⁰ “Iḷaannigukpan aasii miqłiqtuvich apiġikpatin, ‘Summan uvva Atanġum God-ipta kamaksritqusuuvatigut ukuniŋa pitquranik?’

²¹ Uqallautiyumagisi, ‘Kivgauŋagaluaqtuaguut akiññayuił̣ł̣uta Pharoah-mun, Atanġum annautiŋagaatigut suaŋŋatiqpagmigun.

²² Irraptignik qiñiŋagikput ilaa aliuġnaqtuanik tatamaanaqtuaniglu nalautitchimman Pharoah-mun qaukłiŋiññullu.

²³ Annaktinŋagaatigut Egypt-miñ mauŋaġataqłuta nunannagviksraptiŋnun, unniqsuqłiutigiŋavlugu maŋŋuuvsigñun tainna nalautinniaġnivḷugu.

²⁴ Tavraasii Atanġum God-ipta piraksriqł̣uta kamaksritquvluta pitquranik qutchiksuaġitquvluniḷu. Tainna pigupta munaġisuŋaiññaġniaġaatigut piḷḷuataqtisimaaġlutalu.

²⁵ Iḷumutuuġuta kamaksrigupta God-im pitqutipayaaŋiññik uvaptignun, iviġaumaginiaġaatigut.’