Deuteronomy 5 - Iñupiatun Mumiksat Uqalugiksuat

Qulit Pitqurat

¹ Moses-gum tavra atautchimuktinŋagait iluqaisa iñuŋi Israel-gum aasii uqallautivlugich, “Ilivsi maŋŋuqaqtuasii Israel-mik, naalaġnisigich pitqurapayaat qaitchatka ilivsigñun uvlupak. Taimuŋaallasiḷugit suli kamagilugit piyumagisi.

² Mount Sinai-mi Atanġum God-ipta sivunniuqasiŋagaatigut.

³ Maŋŋuułhiñaŋiḷaavullu aglaan uvagullu, taputivlutaptauq pagmapak iñuuruaguut.

⁴ Tavrani tavra iġġimi Atanġum uqautiŋagaasi iŋnikun.

⁵ Qikaŋaruŋa akunnavsiññi ilivsiḷu Atanġumlu taimani uqautisaqłusi uqaluŋiññik atakkii iqsivḷusi igniġmik mayuġuŋaiñŋarusiunnii. “Ataniq uqallaktuq,

⁶ ‘Uvaŋa Ataniq God-iksi, Egypt-miñ annaurriksi, kivgauŋavivsiññiñ.

⁷ “‘Aŋŋuu, allanik god-iqaġniaġnasi uniuġluŋa.

⁸ “‘Aŋŋuu, iñuuraqpaliuġniaġnasi tuvraġlugich sut qiḷagmiittuat, naagga nunamiittuat, naaggaunnii immamiittuat nunam ataani.

⁹ Purviginiaġnasigich iñuuraqpaich naaggaunnii aŋaiyyuvigilugich, qanukkii uvaŋa Ataniq, ilivsi God-iksi, sigñaturuŋa. Piḷuusiqiguvich tatavsaġniaġikpiñ kiŋuvaatillu piŋayuannun sisamaŋannun aglaan.

¹⁰ Iḷisimapkaġiga aglaan aulayaitchuaq nakuaqqutiga taimuŋa kisiññaitchuanun kiŋuvaaġiiñun nakuaqsriruanun uvamnik kamaksriruanullu pitquramnik.

¹¹ “‘Aŋŋuu, uqamaqłuutiginiaġnagu atiġa, qanuq uvaŋa Ataniq God-iksi, tatavsaiñiaqtuŋa uqamaqłuutigikparruŋ atiġa.

¹² “‘Itqaumagilugu sivuniŋa Sabbath salumapkaġlugulu, Uvaŋa, Atanġum God-ivsi pitqurriġaasi.

¹³ Itchaksranik uvlunik savakviksraqaqtusi,

¹⁴ aglaan tallimat malġuat uvlut unaŋuiqsiġviuniaqtuq nalunaiqsauluni uvamnun. Taaptumani uvlumi kiña unnii savagniaŋitchuq—ilivsi, miqłiqtusi, kivgasi, pamiqsaasi, naaggaunnii iglaat allaniñ nunaniñ iñuuniaqtuat nunavsiññi. Kivgaġiratin unaŋuiqsiaqtuksraummiut iliktuttauq.

¹⁵ Itqaumalutin kivgauŋatilaaġniktauq Egypt-mi, suli uvaŋa, Atanġum God-ikpich, annautiŋagikpiñ suaŋŋatiqpapkun. Tainnamik tavra qaunagitqugiga Sabbath salumaruaġilugu.

¹⁶ “‘Qiksigilugik aapallu aakallu, uvaŋa Atanġum God-ivsi, piraksriġaasi, sut iluaġumaut ilivsigñi aasiiḷu iñuuniqtuyumausi nunami aitchuutiginiaqtamni ilivsiññun.

¹⁷ “‘Aŋŋuu, iñuaġniaġnasi.

¹⁸ “‘Aŋŋuu, allatuġniaġnasi.

¹⁹ “‘Aŋŋuu, tigligaġniaġnasi.

²⁰ “‘Aŋŋuu, saglutiginnigniaġnasi iñugnik.

²¹ “‘Aŋŋuu, kaviuġniaġnak allam nuliaŋanik, igluanik, nunaŋanik, kivgaŋiññik, pamiqsaaŋiññik, qimuktiŋiññik, naaggaunnii supayaanik ilaan pigikkaŋiññik.’

²² “Tavra taapkua pitqurat Atanġum qaisaŋi iluqavsigñun katinnamisi iġġimun. Uqaqłuni nipatuvluni ignikun, akunġaniḷḷu nuviyaqłuum, qaitchiŋaruq taapkuniŋa pitquranik, allanik piitchuq. Tavraasii aglakługik malġuugnun uyaqqagnun saatuquyaagnun aasii qaił̣ł̣ugik uvamnun.

Iñuich Iqsirut

²³ “Tavra iluqaġmi iġġiq ikuallagman tusaavlugulu iġñaŋa taaġmiñ, aullarrivsi qaukłivsiḷu ullakkaanŋa kiŋunillaavsigniñ

²⁴ uqaqłutiŋ, ‘Atanġum God-ipta iḷisimapkaġaatigut kamanaqtilaaġmiñik qaumaniġmiñiglu tusaakaptigu iġñaŋa ignikkun! Uvlupak aasii iḷitchuqqutigivlugu iñuich iñuuyumiñaqtilaaŋiññik, God-mun uqautigaluaqtillutiŋ.

²⁵ Summan uvva tuqqunmun qaiññiaqpisa? Igniqpaŋata suksraunġiġñiaġaatigut. Nalupqinaitchuq tuquniaqtugut Atanġum God-ipta uqautitqikpatigut.

²⁶ Iñugruiññaq imña iñuuŋava tusaaqqaaqługu iñuuruaq God uqautimmatiŋ igniġmiñ?

²⁷ Utiġiñ, Moses, naalaġniyyaġiaġuŋ uqalupayaaŋiññik Ataniqput God uqautikpatin. Qaiḷutin aasii uqautiyyaġluta qanuq uqautikpatin, naalaġniñiaġikput kamagilugulu!’

²⁸ “Tavra Atanġum tusaakamiuŋ taamna, uqallautigaaŋa, ‘Tusaagitka iñuich uqaluŋich, aasii iluakkuaqtut.

²⁹ Tainnasuŋaiññaġluqaa irrusiqallalutiŋ! Tainnasuŋaiññagluqaa kamanaqsiḷḷaliñŋa, qutchiksuaġillaliñŋa, kamaksriḷutiglu pitquramnik, suna iluaġluni innayaqtuq iliŋiññun kiŋuniiŋiñullu taimuŋa isuitchuamun.

³⁰ Aullaġutin kiligiakkich utiqulugich tupiŋiññun.

³¹ Aglaan ilvich, Moses, nayuŋŋa, qaiññiaġitka pitqurapayaatka iliŋnun suli piraksriutipayaatka. Iḷisaurrutigigisigitin iñugnun, kamagilugich iñuuyumaut nunaksrirrutimni.’

³² “Ilivsi iñuŋich Israel, iḷumutuuġusi kamaksriyumausi Atanġum God-ivsi pitqurriutiŋiññik piraksriutiŋiññiglu. Kamaksriŋiñŋuraaġnasi pitqurapayaaŋiññik.

³³ Kamagiruksraġigisi iluqaisa pitqurat, tainna piguvsi sunapayaaq iluaġuni inniaqtuq ilivsigñun nunannaktaaġiniaqtavsigñi. Tavraniisugrukkumiñaqtusi kamaksriguvsi.