Deuteronomy 4 - Iñupiatun Mumiksat Uqalugiksuat

Moses-gum Kiiqsruŋagai Israel-gum Kiŋuvaaŋich Kamakkutiqaquvlugich

¹ Moses tavra uqallautigai iñuich, “Kamakkutiqaġitchi pitqurapayaanun iḷisaurrutigikkamnun, iñuuyumausi nayuġlugu nunaksrirrutaa Atanġum, God-iŋata maŋŋuuvsi, aitchuutigiraa ilivsigñun.

² Iḷauġnasigich pitqurriatka, naakkaunnii iḷaŋŋaqtuġnasigich. Kamaksriruksraurusi pitqurriaŋiññik Atanġum, God-ivsi, qaiñŋaramnik ilivsigñun.

³ Takkuqsraaŋagiksi Ataniq suraġaŋatilaaŋanik Mount Peor-mi. Suksraaŋagaich tamatkiqł̣ugich nanġaipayaaqtuat Baal-mik tavrani,

⁴ aglaan ukpiqsimaaqtuasii Ataniġmun God-ivsiññun, pagmapak iñuurusi suli.

⁵ “Ilisautiŋagivsi pitqurapayaaŋiññik Ataniġma God-im piraksriutaatun. Kamagiyumagisi nunami nunannaktaaġiniaqtavsigñi.

⁶ Kamagipiaġataġumagisi, atakkii tainna piguvsi allat nunaqpaich isumaturualiñiaġaasi. Tusaagumiŋ pitquravsiġñik, uqallakkisirut, ‘Yai, nunaqpak una isumatuniqsuq kaŋiqsiumammivḷuni!’

⁷ “Nunaqaŋaitchuq, qanutun kamanaġaluaġli, god-iqaqtuamik qanitigiruamik Ataniqtun God-iptiktun. Kiusuugaatigut ataramik ikayuqtisiuqapta.

⁸ Allamik nunaaqqiitchuq, qanutun kamanaġaluaġli, pitquraqaqtuanik innatun nalaunŋatigiruanik iḷisaurrutiptun uvlupak ilivsigñun.

⁹ Qaunakłaaġumausi! Suuramik unnii puiguiñasi iñuuniqtutilaavsiksun, tautuŋaravsigñik irravsigñik. Quliaqtuaġilugich miqłiqtuvsigñun tutaaluuvsigñullu

¹⁰ qanuq taaptumani uvlumi makitakavsi takkuani Atanġum God-ivsi Mount Sinai-mi, uqallautimmaŋa, ‘Atautchimuktitki iñuich. Tusaatqugitkauvva uqalumnik, kamagillasiyumagaanŋa qiksiksrautiqpaqaġlutik iñuuniqtutilaamiktun, taimmaasii iḷisaurrutigiaqsiḷugich miqłiqtumignun, tainnali iliŋich piyumaut.’

¹¹ “Uqautiyumagisi miqłiqtusi qanuq makitaŋatilaavsigñik ataani iġġim matuŋaruam nuviyaqługmik suli maŋaqtuamik avyuġruamik iŋniġmik nikuappagaġmivḷuni siḷamun.

¹² Uqautilugich qanuq Ataniġmun uqautiŋatilaavsigñik igniġmiñ, qanuq tusaaŋatilaaqsi uqaġman qiñiġnaitkaluaqtillugu.

¹³ Uqallautiŋagaasi suruksrautilaavsigñik kamaksriñiaġuvsi sivunniuġunmiñik. Kamaksriruksraurusi Qulinik Pitqurriutaiññik, aglaaġiŋaraŋich saatuquyaaŋnun uyaqqaŋnun.

¹⁴ Atanġum tiliŋagaaŋa iḷisaurrutigitquvlugit pitqurat kamagitquvlugiḷḷu nunannaktaaġiniaqtavsigñi.

Moses-gum Sivuuġasaaġutaa Iñuuraqpaliqinikun

¹⁵ “Atanġum Mount Sinai-miñ uqautimmasi ignikun, tautuŋaitchusi irrutchimik. Qaunakłaapiallaktuksraurusi,

¹⁶ piḷuusiqinasi iñuuraqpaliuġlusi qanusiugaluaqpan, arriugaluaqpan aŋutitun, naakkaunnii aġnatun,

¹⁷ niġrutitun, tiŋmiatun,

¹⁸ paamġuatun, naakkaunnii iqaluktun.

¹⁹ Maliksuktitaunasi nanġaġuglugich tautuktasi siḷami—siqiñiġmik, tatqimik, uvluġiakkaluanik. Atanġum God-ivsi inillaŋagaich iluqaiññun nunaqpauruanun ataani iluqaani qiḷaum.

²⁰ Ilivsiaglaan annautiŋagaasi Egypt-miñ, ikualaugaqtuamiñ iŋniġvikpaktun. Annisiŋagaasi iñuksraqtaaġisukłusi, tavraasii iñugigaasii uvlupagmuaglaan.

²¹ Ilivsi pisigivlusi Atanġum God-ivsi uumitchautiŋagaaŋa aasii uqaviksuutivluŋa ikaaġumiñaiññivḷugu Jordan River suli nunalluatamukkumiñaiññivḷuŋalu ilivsi nunannaktaaksrautivsiŋñun.

²² Tuquniaqtuŋa tamaani nunami ikaaġaluaġnagu kuuk, aglaan uvva ilivsi ikaaġaqsirusi nunannaktaaġisaġlugu nunagikpaktuaq.

²³ Puiguġniaġnagu Atanġum God-ivsi sivunniuġutigiŋaraa ilivsigñun. Kamagilugu pitqutaa iñuuraqpaliuġnasi qanusiugaluaqpata,

²⁴ atakkii Ataniq God-iksi ikualaruatun igniqtun ittuq; sigñaturuaguruq.

²⁵ “Sivisuruami nunannaktaavsigñiitkaluaġuvsi miqłiqsiuġlusi tutaaluniktuġlusiḷu, piḷuusiqinasi iñuuraqpaliuġḷusi qanutchimik irrusiqaġaluaqpan. Taamna pigiipiaġataqtuq Atanġum qiññaŋani, qinnautigillagaalu.

²⁶ Ququaġikka qiḷaglu nunalu iḷisimarautquvlugik ilivsigun, kamagiŋitkuvsiñŋa piiqsauniaqtusi nunamiñ. Iñuuvigipasaġniaŋitkiksiḷu nunannaktaaqsi akianiittuaq Jordan-gum. Suksraunġiqsaupiallagniaqtusi.

²⁷ Atanġum siamitinniaġaasi allanun nunaqpauruanun, iḷaqiurauruasii kisiŋŋuqtaullakkisirusi.

²⁸ Tavrani savaurriñiaqtusi god-inik iñuich argagmiŋnik savaaŋiññik, god-ilianik qiruniñ, uyaġagniñ, god-iliat tautulaiḷat, tusaalaiḷat, niġiḷaiḷat, naisuiḷḷallu.

²⁹ Tavrani ivaġisigiksi Ataniq God-iksi aasii ivaġuvsiuŋ iluqaaġlugu uummativsigñik, paqinniaġiksi.

³⁰ Taimanigu isumaaluliġuvsi apqusaaġuvsigich supayaat iḷiuḷḷuiġutit, mumigruiññaġisirusi Ataniġmun, aasii kamagiaqsiḷugu.

³¹ Ilaakiuvva naglikkutiqpaqaqtuq God. Suksraaġniaŋitkaasi naakkaqaa maqunniaŋitkaasi, puiguġumiñaitkaalu sivunniuġutigiŋarani maŋŋuuvsiññun.

³² “Kaŋŋiuqsiuŋ suna pianiŋaruaq aniŋaiñŋavsiunnii, God-im iññiqqaaġmauŋ nuna. Kaŋŋiupiaġataġlugu nuna. Tainnatun kamanaqtigiruaq sivuaniñ qaŋa nalaunŋava? Tusaġnaġataŋava tainnasimik nalautittuamik qaŋaunnii?

³³ Iñuqaŋava ilivsiktun iñuuruamik tusaaŋaruamik God-mik uqaġman ignikkun?

³⁴ Allamik god-iqaŋava iñunnaksaŋaruamik allaniñ nunaqpagniñ, Atanivsi God-im pilġusiatun iñunnaktaaġimmasi Egypt-miñ? Takkuuraġniavsiŋñi suaŋŋatini atuŋagaa; qaġġirriŋaruq naŋirrutiqpanik aŋuyagniġnik, savaaġivlugich aliuġnaqtuat suli tatamaanaqtuat.

³⁵ Atanġum maniuġvigiŋagaasi tainnaittuamik, nalunaipiaqsaqługu ilivsiŋñun kisimi God-autilaaġmiñik, allamik god-aitchuq.

³⁶ Tusaapkaŋagaa iġñani qiḷagmiñ piraksriqsuġukłusi; maani nunami qiñiqtinŋagaasi aliuġnatuamik igniġmiñik, uqautimmivḷusi igniġmiñ.

³⁷ Atakkii piqpagivlugit maŋŋuusi, ilaan naliġaaġiŋagaasi, taimmaasii suaŋŋatiqpagmigun inmiñik aullautivlusi Egypt-miñ.

³⁸ Sivumuktullavsi, qimaaratchiŋaruq iñuŋiññik nunaqpaich ilivsigniñ kamanałhaaqtuanik suaŋŋatiqałhaaqtuaniglu, igliġutivlusi nunaksritchukłusi nunaŋannik, pagmapak suli nunagikkavsigñik.

³⁹ Itqaumasigiŋ uvlupak puiguiñiaġnasi Ataniq God-autilaaŋanik qiḷaŋmi nunamiḷu. Allamik God-aitchuq.

⁴⁰ Kamaksriḷusi pitqurriutiŋiññik ilivsigñun qaitchamnik uvlupak, suna iluaġluni itchumauq ilivsigñun kiŋuniivsigñullu. Ataramik iñuuvigiyumagiksi nuna Atanġum God-ivsi qaisaŋa pigiyumiñaġlugu taimuŋa.”

Nunat Annaksaġviksrat Qavanitchiani Jordan-gum

⁴¹ Tavra Moses ilaaguaqsiŋaruq piŋasunik iniqpagnik qavanitchianiittuanik Jordan-gum.

⁴² Iñuk qimagviksraqaquvlugu navianaitchuamun iḷaanni piyaqquutikkun iñuaġniġumi pisaaġigaluaġnagu akiḷḷiġiŋisani. Qimagvigitquvlugu taapkua nalliat iniqpait aasii tuqutauŋiḷḷuni.

⁴³ Kiŋunġuruanun Reuben-mun iniqpak Bezer, nunagluktuam qiŋarraaŋaniittuaq; Gad-mun kiŋunġurualli Ramoth-mun, nunaŋanni Gilead; Mannasseh-vli kiŋuniiŋiññun Golan-mun, nunaŋani Bashan-gum.

Moses-gum Uqautigigai God-im Pitquraŋich

⁴⁴ Moses-gum qaitkai God-im pitquraŋich iḷisaurrutaiḷḷu kiŋuvaaŋiññun Israel.

^45-46 Annisianiŋavlugit Egypt-miñ natiġnaaŋa tikiñŋavlugu qavanitchianiittuaq Jordan-gum, akiani Bethpeor-m, tavrani qaitchigai pitquranik. Tamaani nunagiŋagaluakkaŋani Sihon, umialiŋat Amor-miut, atanniqsuiŋaruaq Heshbon-mi. Moses-gum iñuniḷu taipkua akiiḷiŋakkaŋii iglaullaġmiŋ Egypt-miñ.

⁴⁷ Nunannaktaaġiŋagaik nunagiŋagaluakkaŋik Umialgum Og-guvlu Umialgum Sihon-guvlu. Taapkuak umialguruak Amor-miunun, qavanitchiani Jordan-gum iñuuniaqtuak.

⁴⁸ Tamanna nuna nunaaqqianiñaglaan Aroer-m, killiŋata Arnon River-m, qavuŋanmun tikilġataqługu Mount Sirion, amikii Mount Hermon.

⁴⁹ Taputivlugu iluqaan qavanitchianiittuaq Jordan River-m tikiḷġataqługu Dead Sea qavuŋanmun suli tikił̣ł̣ugu sisuuŋaaġniŋa Mount Pisgah-m.