Deuteronomy 34 - Iñupiatun Mumiksat Uqalugiksuat

Moses Tuquruq

¹ Tavra Moses-gum igliġvigivlugu qaiqsuaŋa nunaŋata Moab mayuqsaŋagaa Mount Nebo, aasii iglauvluni mayuŋagaa Mount Pisgah-mun taavanitchianiittuaq Jericho-m. Tavraniasii Atanġum qiñiqtinŋagaa iluqaanik nunamik, Gilead-miñ Dan-muaglaan,

² iluqaallu nunaŋa Naphtali-m; nunaŋigḷu Ephraim-gum Manasseh-vlu; nunaŋalu Judah-m avuŋanmun tikiḷġataqługu Mediterranean Sea;

³ paanitchianiittuaġlu iḷaŋata nunaŋa Judah-m; qaiġñiŋalu aullaqivigivlugu Zoar-miñ Jericho-muaglaan, taisuuraŋat inaanik palm napaaqtut.

⁴ Tavraasii Atanġum uqallautivlugu Moses, “Tamarra nuna unniqsuqłiutigiŋaraġa Abraham-mun, Isaac-mun, Jacob-mullu qaiññiaġnivḷugu kiŋuniiŋiññun. Tautuktitkaluaġiga ilignun, ullaktinniaŋitkiga aglaan.”

⁵ Tavraasii Moses, Atanġum kipaluŋa, tuquruq nunaŋani Moab, Atanġum uqallautini nalautiłługu.

⁶ Atanġum argautiŋagaa natiġnaŋanun Moab-gum, akianun samma nunaaqqiata Bethpeor-m aglaan uvlupaŋmun nalugaat sumipiaġataq argautiŋatilaaŋanik.

⁷ Moses tuqukami ukiuqtutilaaqaŋaruq tallimakipiaq iñuiññaqtun (120); suaŋŋaaġiŋŋaġmi suli takpikł̣uniḷu.

⁸ Israel-gum kiŋuvaaŋich qiñuŋagaat iñuiññaq qulini (30) uvluni qaiqsuaŋiññi Moab-gum.

⁹ Joshua iġñiŋa Nun-gum isumattutiqpaqaŋaruq; uvvakii Moses-gum inillaŋavlugu simmautigisaqługu. Israel-gum kiŋuvaaŋich kamaksriŋarut Joshua-mik Atanġuvlu piraksriutait maliġivlugich qaisaġiŋaraŋich Moses-kun.

¹⁰ Moses-tun ittuamik uqaqtiqaŋaitchut Israel-gum kiŋuvaaŋich; Atanġum uqaqatigisuuraŋa kiiñaŋanun.

¹¹ Allamik uqaqtauruamik kamasausiqitigiruamik aliuġnaqtualiqiruamiglu piqaŋaitchuq Atanġum pipkakkaŋiññiik Moses-mun paaqłaktautinik umialgannun Egypt, qaukłiŋiññun, suli nunaŋa tapurraupkaqługu iluqaan.

¹² Uqaqtauruamik piqaŋaitchuq savaaqaŋatigiruamik kamasausiqutinik tatamaanaqtigiruaniglu Moses-gum savaaġiŋaraŋisun takkuqsraaqługich iluqaisa Israel-gum kiŋuvaaŋich.