Deuteronomy 33 - Iñupiatun Mumiksat Uqalugiksuat

Moses-gum Quviasuusiaksritkai Kiŋuniiŋi Israel

¹ Uvvaukua quviasuusiat Moses-gum qaitchaŋi, iñuata God-im, uqallautigiŋaraŋi Israel-gum kiŋuvaaŋiññun tuquŋaiñŋaġmi:

² Atanġum atqaqiŋagai Mount Sinai-miñ; nuiḷġataqtuatun qulaagun Edom-gum siqiññaaġvigivlugich iñuni Mount Paran-miñ. 10,000-tun iñugiaktigiruat isaġulgit piqasiqł̣ugu, ikualaruamik igniġmik taliqpigmiñi tigumiaqłuni.

³ Atanġum nakuaġigai iñuni, qaunagigait ilaan pimaakkanii. Tainnamik puttugut isigaŋiñun kamagivlugiḷḷu pitqutiŋi.

⁴ Kamagigikput Pitquraq Moses-gum qaitchaŋa uvaptignun, Nunaptinni pimaktupiallaktaqput pitquraq.

⁵ Tavraasii Ataniq umialliutiŋaruq iñuŋmiñun Israel-gum kiŋuvaaŋiññun, kiŋuniġiiguruat aullarriŋiḷḷu atautchimugmata.

⁶ Moses uqallaktuq kiŋuniiŋikkun Reuben-gum: “Reuben-kiŋuvaaŋittuq nuŋutauŋiḷḷit, iñukitkaluallaġmiŋ.”

⁷ Maŋŋuqaqtuakun Judah-mik uqallaktuq: “Ataniiq, tusaayumagitin ikayuqtaiḷiqikpata; Atautchimuqataullasivsaaġlugiḷḷu kiŋuvaaqatiŋiññun Judah-m aniqatiŋi aŋutit. Aŋuyautilugich, Ataniiq, ikayuġlugich akilliŋiññiñ.”

⁸ Maŋŋuqaqtuakun Levi-mik uqallaktuq: “Ilvich, Ataniiq, nalunaiġuŋ pisuutin uyaġaktigun atiqaqtuak Urim-miglu Thummim-miglu, Iḷumutuuqtuatigun Levi-m kiŋuvaaŋisigun; Uuktuqtaupkaŋagitin Maasah-mi iḷumutuuqtilaaŋiññik kaŋiqsisigivlugich imaŋiññi Meribah-m.

⁹ Iñugił̣haaŋagaatin aŋayuqaamigniñ, aniqatiimigniñ, qitunġamigniñ unnii. Kamagiŋagaich pitqutitin suli iḷumuuqłutiŋ sivunniutigiŋaramignik ilignun.

¹⁰ Iḷisautiniaġaich iñutin kamaksritqulugich pitqurriutignik; aitchuiḷutiglu ikipkautinik ikipkaivigiraġnun.

¹¹ Ataniiq, kiŋuniġiich ikayukkit suaŋasitqulugich; Iviġaummatigikkit suraġaqpata. Ququtaqsruġmiḷḷaisa akiḷḷiiŋich; Makitatqikkumiñaiġḷugich.”

¹² Maŋŋuqaqtuakun Benjamin-mik uqallaktuq: “Tavra taapkua kiŋunġuruat Atanġum nakuaġivlugich piyaqquqsaiḷisuuraŋi; qaunagiraġigai uvluqtutilaaŋatun, itqasiġaġigai.”

¹³ Maŋŋuqaqtuakun Joseph-mik uqallaktuq: “Atanġumtuq quviasuktilligit nunaŋat sialuktitaaġlugu suli imaiyuiḷḷuni nunam ataaniñ.

¹⁴ Nunaŋattuq naulluataqtitaaġliuŋ siqiññaraaġvigilugich siiġñiaŋi, Puvalaaqtuanik siiġñaġiŋñiqsraŋiññik nautchiiñiġum.

¹⁵ Taimaŋŋa qaŋa qimiġaaŋit siḷivinŋalit siiġñaġigñiqsranik.

¹⁶ Nunaŋattuq siḷivinŋali nakuuruanik, Piḷḷuataqtitauluni nakuuniŋagun Atanġum, Uqaŋaruam ikualaruamiñ uqpikł̣ugniñ. Taapkua quviasuusiat tullit kiŋuniiŋiñun Joseph, qaukłiuŋavluni aniqanmiñiñ.

¹⁷ Joseph suaŋŋatiqaqtigiruq suaŋŋataatun aŋusallum qimuktim. Nagruuk pamiqsaaguŋaitchuatun. Nagruuk arriqaqtuk Manasseh-m aŋuyaktisalaŋisun 1,000-tun suli Ephraim 10,000-tun aŋuyaktiŋisun. Nagruŋmigaqługit nunaqpait uŋuġrugiraġigaich isuanunaglaan nunam.”

¹⁸ Maŋŋuqaqtuatigun Zebulun-miglu Issachar-miglu uqallaqtuq: “Zebulun-gum kiŋuvaaŋi pilluataġlit simmiqsuutiraġigumiŋ taġiukun; Issachar-m kiŋuvaaŋi umialgutiŋit naulit iñuuniaġvigmiŋni.

¹⁹ Aiyugaaqłiiraqtut aaniġmiunik iġġimun aasii aitchuiqatigivlugit iluaqtuanik aitchuutinik God-mun. Umialgutiqaqtut taġiumiñ suli taġium siñaaniñ.”

²⁰ Maŋŋuqaqtuakun Gad-mik uqallaktuq: “Nanġaqtauli God, nunaqaqtitchiruaq iliŋiññun aŋiruamik. Gad nikpaġaqtuq laiyaaluktun taliiġñiksiññauvluni naakka amiiġñiksiññauvluni niaquaniñ niġrutim.

²¹ Nunagigñiqsramik nunaksraŋarut, qaukłium piññaktaaksraŋiññik nunannaŋarut. Kamaksrirut Atanġum piraksriutaiññik pitquraŋiññiglu qaukłiŋit Israel-gum kiŋuvaaŋich atautchimugmata.”

²² Maŋŋuqaqtuakun Dan-mik uqallaktuq: “Dan ittuq laiyaatun; Maksriktuatun Bashan tuŋaaniñ.”

²³ Maŋŋuqaqtuakun Naphtali-mik uqallaktuq: “Naphtali-tkut piḷḷuataqtitaurut Atanġum iviġaumagivlugich; Nunaqaqtut tikiḷġataqługu ualiñaaŋa Lake Galilee-m.”

²⁴ Maŋŋuqaqtuakun Asher-mik uqallaktuq: “Asher piḷḷuatausiusiaqałhamaaqtuq kiŋunġuruapayaaniñ. Piviuttaġiłhamaaġlirruktuq aniqataisa. Nunaŋalu olives napaaqtuŋiññik iḷaŋaniiġḷuni.

²⁵ Nunaaqqiutaiḷḷu payaŋaiġutchiŋalutiŋ upkuaqpagnik savigruanik. Navianniuġnaiḷḷuniḷu iñuuniaġvigiraŋat.”

²⁶ Israel-mun kiŋuvaaguruasii, god-aitchuq God-ivsiktun ittuamik, saliaġuraaqtuatun kamanaqłuni siḷakun, nuviyatigun ikayuġiaġaġigaasi kamanaqqutimigun.

²⁷ God-im iñiqługu nayuqłusi piyaqquqsaił̣igaasi; iñiqługu talliŋmiñik akkiqsimaaġaasi. Uŋugrugiugaqługich akiḷḷisi sivunmuktuŋŋavsi, uqautimmivḷusi suksraapiaquvlugich tamatkiġḷugich.

²⁸ Tainnamik Jacob-gum kiŋuniŋi anayanniuŋitchut. Suli nunaŋat palauvaksraiḷḷiuġnaiḷḷuni suli wine-qaġmiut iḷaŋaniiqługu, Uġġuksraam imaqtiqsimaaqługu nunaŋat.

²⁹ Israel-gum kiŋuvaaŋich, qanutun quviasuktigivisi! Ilivsitun ittuamik piitchuq, nunaqpak annautikkaŋatun Atanġata. Atanġum inmiñik akkiaġautauruam savikpauvluniḷu ilivsiññun, sapunniaġukłusi akimmatisimaaġlusiḷu. Akiḷḷisi nagligitqugisigaluaqtut, tunmalugisiññaġniaġisi.