Deuteronomy 30 - Iñupiatun Mumiksat Uqalugiksuat

Israel-gum Kiŋuvaaŋisa Utiġviginiaġaat Ataniqtiŋ

¹ “Paŋmapak uvva naliġallasirusi piḷḷuataunmik naakka piaġiirrunmik. Aasii apqusaaġanikkuvsigiŋ piaġiirutit tatavsautiŋit, iñuuniallavsi allani nunani Atanġum God-ivsi siamitkanikpasi, itqaumaniaġiksi aquvatigun naliġallañiqsi.

² Aglaattauq miqłiqtusiḷu utiġvigiguvsiuŋ Ataniq iḷumupiaġataq, kamaksriḷusiḷu piraksriutipayaaŋiññik qaitchamnik uvlupak ilivsiññun;

³ tainnaġuvsi Atanġum God-ivsi nagligiliġñiaġaasi. Ilaata aasii utiqtinniaġaasi nunaniñ siamirvigiŋagaluaqtavsigñiñ. Utiġuvsi aasii piḷḷuatausiusiaqaqtitkaqsiḷgiḷḷusi.

⁴ Nunam uŋasigñiqtaŋiññun siamitauŋagaluaġniġuvsi, Atanġum God-ivsi atautchimuktitqigñiaġaasi utiqtillusi nunavsigñun sivuani,

⁵ nunannaktaaġivsaaqtillugu aasii iñuuniaġvigiŋakkaŋaat kiŋuniivsi, ilaata piḷḷuatausivsaałhaaġmiḷusi iñugiaksił̣haaġlusiḷu maŋŋuuvsigñiñ unnii.

⁶ Atanġum God-ivsi kiŋuvaasiḷu kamaksriḷḷasipkaġniaġaasi, nakuaġiyumiñaqsiḷuni iḷumupiaġataq, taimmaasii iñuusaġataġvigiaqsiḷugu nuna.

⁷ Ilaan pimaqłuutipayaat tunŋapkaġniaġai akiḷḷivsiññun, uumigirivsiññun nagliksaaqtinŋammasi.

⁸ Kamagirraqsitqigñiaġiksi ilaa suli maliġirraqsitqigḷugich piraksriutipayaaŋi qaitchatka ilivsiññun uvlupak.

⁹ Atanġum piḷḷuataqtinniaġaasi supayaatigun miqłiqtuukkaqsiḷusi, pamiqsaagutaukkaqsiḷusi, nautchiaqaġvisiḷu iḷaŋaniñ nauriqpaglutiŋ. Ilaan quviallatigilusi piḷḷuataqtinniaġaasi maŋŋuuvsiksun quviallatigivlugich piḷḷuataqtinnamigi.

¹⁰ Ilivsi aglaan kamagiraksraġipiaġiksi ilaa, maliġilugich pitqurapayauraŋit agliusimaruat makpiġaaŋiññi iḷisaurrutaisa. Qiviaġvigiruksraġigiksi nalupqinaiġḷugu.

¹¹ “Piraksriutitka uvlupak tainnatun siġġaġnaqtigiŋitchut ayuġnaŋitchullu.

¹² Qiḷaŋmiutauŋitchut. Apiqsriraksraitchusi, ‘Kia papkua aiñiaqpagit atqautiyyaġlugit tusaalugit kamagiyumagivut?’

¹³ Taġium akianiinŋiñmiut. Apiqsriraksraiñmiusi. ‘Kia apkua aiñiaqpagit taġium akianiñ qaġġisuutiyyaġlugit, tusaalugit kamagiyumagivut?’

¹⁴ Naumi, uvva nayuġisi. Iḷisimagisi suli taiguallagisi, aasii kamagisigiŋ.

¹⁵ “Uvlupak uvva naliġaaksritkivsi nakuuruamik naakka pigiitchuamik, iñuggunmik naakka tuqqunmik.

¹⁶ Kamagiguvsigiŋ piraksriutai Atanġum God-ivsi qaitchaġma ilivsigñun uvlupak, nakuaġiguvsiuŋ kamagisaġiksi, maliġilugit pitqurapayaaŋi, piḷḷuataġniaqtusi nunaqpaguġmiḷusi. Atanġum God-ivsi piḷḷuatausiġñiaġaasi nunannagiaġuvsi.

¹⁷ Aglaan kamaksriŋitkuvsi naalaġnisuŋaiġḷusiḷu, asiñuurraulusi nanġaigaqsiguvsi allanik god-inik,

¹⁸ suksraunġiqsauniaqtusi. Kilikkivsi uvani akkupak. Iñuuvigivipasaġniaŋitkiksi nunannaktaaġiraqsi akianiittuaq Jordan-gum.

¹⁹ Akkupak aglaan uvva naliġaaksritkivsi iñuggunmik naakka tuqqunmik, God-miñ piḷḷuataunmik naakka piaġiirrunmik, akkupak ququaġikka qiḷaglu nunalu iḷisimarigisaqługik naliġaavsigñun. Iñuggun piksraqtaaġisiuŋ.

²⁰ Nakuaġisiuŋ Ataniq God-iksi, kamagilugu iḷumutuuġvigilugulu, iñuusaġataġumausi kiŋuniisiḷu nunannaktaaġiniaġniraani unniqsuqłiutigivlugu maŋŋuuvsiññun, Abraham-mun, Isaac-mun, Jacob-mullu.”