Deuteronomy 3 - Iñupiatun Mumiksat Uqalugiksuat

Israel-miuguruat Akiiḷigaat Umialik Og

¹ “Tavra suli, igliqtugut salliñaaŋanun tuŋaanun nunaŋata Bashan, Umialguruam Og, aŋuyaktipayaaniḷu qaivḷutiŋ aŋuyagiaġaatigut qaniŋani Edrei-m.

² Atanġum uqallautigaaŋa, ‘Sivuuġaginagu. Tamatkiiñiaġiñ aŋuyaktaiññik nunaaqqiŋiññiglu. Pisaġiuŋ piḷġusiqsun Amor-miut umialgannun Sihon, Heshbon-mi atanniqsuiŋaruaq.’

³ “Tavraasii Atanġum akiiḷipkaŋagaa Umialik Og iñuŋiḷḷu, tuquġaqługich tamatkiqł̣ugich.

⁴ Tavra tamatkiigivut nunaaqqiutaiññik. Piŋasukipiaguruat (60) nunaaqqich tamatkiŋagivut Argob-mi, taaptuma Umialguruam Og, Bashan-mi atanniqsuiviani.

⁵ Taapkua nunaaqqich sapusiŋamagaich katchiqpagnik, pitchiġiiyaqługich sanniġutanik upkuaqpaich, allanik suli katchiiḷaanik nunaaqqiuraqaŋammiñiqsut iñugiaktuanik.

⁶ Suksraunġiŋagivut nunaaqqipayaaŋich tuqułługich aŋutipayaat, aġnapayaat, miqłiqtupayaallu, piḷġusiġiŋaraptiktun nunaaqqipayaaŋiññun Umialik Sihon Heshbon-miuguruam.

⁷ Aasii piññaktaaġivlugich pamiqsaaŋich suli nunaaqqiŋiññiñ suġauttannaktuqłuta.

⁸ “Taimani tavra taapkugnaŋŋa Amor-miugniñ umialguruagniñ nunannaŋarugut qavanitchianiittuanik Jordan River-m, Arnon River-miñ tikiḷġataqługu Mount Hermon.

⁹ (Mount Hermon taisuuraat Sirion-mik Sidon-miut, taisuuraat Senir-mik Amor-miut.)

¹⁰ Tamatkiiŋagikput nunaŋiññik Umialik Og Bashan-miu: nunaaqqich qiŋaraamiittuat, taputivlugik Gilead-lu Bashan-lu, qavuŋanmun tikiḷġataqługik Salecah-lu Edrei-lu.”

¹¹ (Taamnagguuq Umialik Og aqulliġiniġaat iñukpasuich Rephaim-gich. Tuqumman Og, kiguunniŋa uyaġagmik savaŋamagaat, itchaksratun isigagniqtun siḷiktilaaqaqłuni aasii akimiaġutaiḷakavsaktun (14) isigagniqtun taktilaaqaqhuni, taimani uuktuutiŋisitun. Qiñiġnaqtuqsuligguuq Rabbah-mi, nunaŋanni Ammon-gum kiŋuvaaŋisa.)

Maŋŋuuruat Nunannaktaaŋich Qavanitchiani Jordan-gum

¹² “Nunannaktaaġianikkaptigu, qaiñŋagiga nuna kiŋunġuruanun Reuben-mun Gad-mullu qavanitchianiittuaq Aroer-m nunaaqqiata salliñaaŋani Arnon River-m, avvaŋallu qimiġaaŋisa Gilead-gum, taputivlugich nunaaqqiŋich.

¹³ Og-gum atanniqsimavigiŋaraik Gilead-gum iḷakualu iluqaallu Bashan qaiñŋagikka avvaŋannun maŋŋuuŋisa Manassah-m.” (Bashan iluqaan nunagisuuŋaniġaat Rephaim-gich.

¹⁴ Jair, maŋŋuqaqłuniḷi Manasseh-miñ, nunannaktaaġigaa iluqaaqługu Argob, killiŋanuaglaan Geshur-mlu Maacah-mlu. Inmiñun atchiutiŋagaich nunaqqiurat, aasiiñ pagmapak unnii taisuugaich Jair-m nunaaqqiŋiññik.)

¹⁵ “Qaiñŋagigaasiiñ Makir-mun Gilead.

¹⁶ Aglaan qaitkiga kiŋuvaaŋiññun Reuben-gum Gad-guvlu, nunaŋaniñ Gilead-gum Arnon River-muaglaan. Qitqa kuugum avgutigivlugu kiluliñaaŋani, aasii Jabbok River avgutigivlu salliñaaŋani, taamna avgutauvluniptauq Ammon-gum kiŋuvaaŋiññun.

¹⁷ Avgutaa ualiñaaŋani Jordan-gum, Lake Galilee-miñ Dead Sea-muaglaan kiluliñaaŋaniittuam, tikiḷġataqługich qaaniŋich Mount Pisgah-m qavanitchiani ittuaq.

¹⁸ “Tavrani tavra piraksriŋagitka ukuniŋa: ‘Atanġum God-ipta nunaksrirrutigigaa kivaliñaaŋa Jordan-gum. Akkupak aŋuyallaruat aŋutisi ikaaqtuksraurut Jordan-kun sivulliuġlugich iḷatiŋ Israel-gum kiŋuvaaŋich nunannaksaqtualli aŋuyaqasiġiaġlugich nunannagataqtillugich.

¹⁹ Aglaan tuvaaqatisi, miqłiqtusiḷu, pamiqsaagutisiḷu (iḷisimaruŋakii iñugiaktuat pamiqsaasi) uniññiaġisi nunannaktaaġiŋaravsigñun.

²⁰ Ikayuġisigisi Israel-miñ kiŋuvaaqatisi nunannagataqtillugich ualiñaaŋani Jordan, Ataniġmun inillaanigataqtillugiḷḷi, piḷġusimisun ilivsigñun. Inillaanikpata, utiġumiñaqtusi nunannaktaaġiŋaravsigñun.’

²¹ “Tavraasii piraksriġiga Joshua: ‘Qiñiŋaġiñ Atanġum God-ikpich savaaŋa umialiuruagnun Sihon-mullu Og-mullu; tainnasuli piñiaġmiuq umialgutauruanun aŋuyagniakkavsigñun.

²² Iqsiginagich qanukkii Atanġum God-ivsi aŋuyautiniaġaasi.’

Moses Isiquŋisauruq Canaan-mun

²³ “Tavrani tavra katchuŋaiqł̣uŋa aŋaiyyuŋaruŋa,

²⁴ ‘Qutchigniqsrauruatiin Ataniiq, iḷisimaruŋa qiñiqtittaġma aullaqisaaġutiłhiñaŋiññik kamanaqtuat aliuġnaqtuallu savaaġiniaqtatin. Allamik god-aitchuq qiḷagmi nunamiunnii iliktun savallaruamik aliunaqtuanik!

²⁵ Ikaaġlagu manna Jordan River, Ataniiq, tautukkumagiga nunalluataq ikaaġuma, qiñiyunaqtuanik qimiġaalik iġġiḷḷu atiqaqtuat Lebanon-mik.’

²⁶ “Aglaan ilivsi iñuich pisigivlusi uumitchautiŋagaaŋa Atanġum tusaasunġiqł̣uŋaunnii. Aglaan uqallaktuq, ‘Apai tavra! Uqausiġitqigñagu!

²⁷ Qaaŋanugiaġiñ Mount Pisgah-m, qiñiġaagaqsiḷutin aasii sanmun suli kilunmun, kivanmun uanmullu. Qiñiqtualluatapiaġataġlugu, atakkii ikaaġniaŋitkiñ Jordan.

²⁸ Joshua aglaan piraksriqsuġisigiñ. Suaŋŋaktaaġlugu piyummataa, qanukkiataŋ ikaaġutiniaġaich iñuich nunannaktaaġiyyaġlugu tamanna qiñaaġiran.’

²⁹ “Tavraasiiñ natiġnamiittuaŋarugut akiani Bethpeor-m.”