Deuteronomy 29 - Iñupiatun Mumiksat Uqalugiksuat

Atanġum Sivunniuġutaa Israel-mun Nunaŋani Moab

¹ Uvva maliġuagaksrat sivunniuġunmiittuat Atanġum piraksriġmauŋ Moses uqautitquvlugich Israel-gum kiŋuvaaŋich nunami Moab-mi; iḷḷatauŋarut Atanġum sivunniuġutiqqaaŋiññun taimani Mount Sinai-miillaġmiŋ.

² Moses-gum atautchimuktitqaaqługich Israel-gum kiŋuvaaŋich uqallautiŋagai, “Qiñiŋagiksi ilivsigñik Ataniġmun qanuq suraġaŋatilaaŋa Egypt-gum umialiŋanun, qaukłiŋiññun iluqaiññun, suli nunaŋannun.

³ Qiñiŋagisi naŋirrutiqpait, aliuġnaqtuat, suli kamatchagnapiaġataqtuat Atanġum savaaŋi.

⁴ Aglaan uvva uvlupagmuaglaan puttuqsripkaŋaitkaasi nalautchaaŋaravsiññik.

⁵ Malġukipiani (40) ukiuni igliġutimmasi Atanġum nunagluktuakun, annuġaasi aluġutisiḷu nuŋulisuiḷaat.

⁶ Punniksraitkaluallavsi suli wine-tuŋitkaluallavsi allaniglu imiŋasiñaqtuanik Atanġum susuksiupkaŋaitkaasi iḷisautisukkaluaqłusi ilivsigñun God-igitilaamiñik.

⁷ Tikiññapta mauŋa inimun, Umialgum Sihon, Heshbon-mi Umialgumlu Og, Bashan-mi aŋuyagiaŋagaatigut aglaan akiisinŋagivut.

⁸ Aasii nunaiqaptigik autaaŋagikput kiŋuniiŋiñun Reuben, Gad-gum, suli avvaŋiññun kiŋuniiŋisa Manasseh-m.

⁹ Iḷumutuuġlusi maliġuaqsigiŋ sivunniuġutauruat uumani unniqsuqłiunmi, piḷḷuataġumausi suraġapayaaġuvsi.

¹⁰ “Uvlupak uvva makitarusi sivuġaani Atanġum God-ivsi, iluqavsi kiŋuniġiit, aullarrisiḷu, qaukłisiḷu, aŋutisiḷu,

¹¹ aġnasiḷu, miqłiqtusiḷu, allaniḷḷu nunaniŋŋaqtauruat iñuuqatisi qirriuqtigirasi imiqtaqtigirasiḷu.

¹² Makitarusi uvlupak sivunniuqatigisukługu Ataniq God-iksi suli nalautitchukługich nalautaksriutai ilivsigñun.

¹³ Atanġum tuniqsiḷaavsaaġumagaa ilivsiŋñun iñugitilaavsigñik suli ilivsiŋñun God-autilaani, unniqsuqłiutiŋmisun ilivsiŋñun maŋŋuuvsiŋñullu, Abraham-mun, Isaac-mun, Jacob-mullu.

¹⁴ Kisivsitualuk sivunniuqatigiŋiñmigaasi Atanġum nalautaksraligaamik.

¹⁵ Sivunniuqatigiłhiñaŋitkaasi uvlupak uvani nayuutiruasii, tapurraummiut kiŋuniksravut aniŋaiḷḷuqtut unnii.

¹⁶ “Iḷisimarusi qanuqitilaaŋanik iñuuniaqapta Egypt-mi suli qanuqitilaaŋanik iglauvigiruni allat nunaqpaŋich.

¹⁷ Nalautchaaŋagisi qaayuġnaqtuat iñuuraqpaŋit savaaguruat qiruŋniñ, uyaġagniñ, savił̣haniñ qatiqtuaniñ, suli kaviqsuaniḷḷu manigniñ.

¹⁸ Qaunakłaapiaġumausi nalliqsi aŋun, aġnaq, nanmiñiqsi, naakka kiŋunġupayaaġumi makitaqatauruaq uvani uvlupak mumigñiaġnani Ataniġmiñ God-iptigniñ nanġaisugluni allat nunat godiŋiññik. Maŋŋuŋatun arriqaġniaqtuq tuqunalgum tivluktuam nausaqsaġniŋatun.

¹⁹ Qaunagiruksraurusi uvva nalliqsi unnii tusaagaluaŋŋaġmi uvlupak nalautaksraupiaqtuanik isumagumi suniaŋiññiḷuni, sivunmuuluni paaqłaigumi. Taaptuma suksraunġiġumiñaġaasi tamatqiġusi, nakuuruallu pigiitchuallu atilugich.

²⁰ Atanġum suliqutigiŋaiġumiñaitkaa tainnasiq iñuk. Aglaan, Atanġum qinnautipiaġataġniaġaa taamna iñuk, taimmaasii iluirrutiqpait aglausimaruat ukunani makpiġaani tunniaqtut iñugmun suksraunġiġataqtillugu.

²¹ Atanġum iḷitchivigipkaġniaġaa Israel-gum kiŋuniipayaaŋiññun suksraunġiġḷugu tainnasiq iñuk, nalautillugich aglausimaruat tatavsautiksrat piaġiirrutiksrat sivunniutauŋaruat ukunani makpiġaani Atanġum iḷisaurrutiŋiññi.

²² “Kiŋuniiġiyumaakkavsii allaniḷḷu nunaniŋŋaqtauruat qiñiġniaġaich pimaqłuusiasi nagliksautisiḷu Atanġum nalautittaŋich ilivsiññun.

²³ Nunaraaqsi nauriḷḷaiġñiaqtuq uunaqtuam uyaġaum matulugu sulfur-mik, taġiumiglu; nautchiiviginaġniaŋitchuq, ivigruat unnii nauniaŋitchut. Nunaksi arriḷiñaġniaqtuq Sodom-lu Gomorrah-vlu iniqpaŋisisun, suli Admah-tun Zeboiim-tullu, Atanġum suksraunġiŋaraŋisun qinnapiaġataġniġmiñi.

²⁴ Nunapayaat apiqsrigisirut, ‘Summan ammaapkua Atanġum tainnaqtitpauŋ nunaŋat? Qanuqłuni immaimña tainnatun qinnautiqaqtigiva?’

²⁵ Kiggutauniaqtuaq uvva, ‘Tavra Atanġum iñuŋisa sivunniuġutigiŋaraqtiŋ ilaanun maliġuaŋił̣ł̣ugu inmiŋnik tainnautigigaat, God-iŋat maŋŋuuġmiŋ annisuurriuraġniaqtiŋ Egypt-miñ.

²⁶ Savaurrivḷutiŋ allanik god-inik sivuani aŋaiyyuvigiŋaitchaġmiŋnik, god-inik Atanġum aŋaiyyuvigitquŋitchaŋiññik.

²⁷ Tainnamik Atanġum qinnautivlugich iñuni nalautchipkaġai suksraunġiutipayauranik aglausimaruanik ukunani makpiġaani.

²⁸ Atanġum qinnalipiallakłuni nusuŋagai nunannaktaaŋiññiñ, nuutillagruaŋagai allat nunaŋannun pagmapak nayuqtaŋannun.’

²⁹ “Atanġum God-ipta nalunaqtitkai uvaptignun iḷaŋich iḷisimarami; salapqiqsuaqługu aglaan pitqurriutini. Uvagut kiŋuniivullu kamagiraksraġigivut pitqurriutiŋi ataramik taimuŋa aglaan.