Deuteronomy 27 - Iñupiatun Mumiksat Uqalugiksuat

God-im Pitquraŋit Aglaagurut Saatuquyagnun

¹ Tavraasii Moses, piqasiqł̣uni aullarriŋiñik Israel-gum kiŋuvaaŋiññik, uqallautigai iñuich, “Kamagisaġisi iluqaisa piraksriutauruat qaitchatka uvlupak.

² Uvluani ikaaġvivsi Jordan River nunaksriusiavsigñun, Ataniġmiñ God-ivsiññiñ, nappaiyumausi uyaġagruanik saatuquyagnik, aasii qaaluguasii plaster-mik.

³ Aasii aglagvigilugich pitquranik iḷisaurrutimniglu. Nunammaaġiksuamuanikkuvsi uumalaaqtuamun Atanġum, God-iŋata maŋŋuupta unniqsuqłiutaanun ilivsiññun,

⁴ akianiitaniglusi Jordan River, nappaġisigisi uyaġait Mount Ebal-mun, piraksriutiga uvlupak nalaullugu; aasii miŋuliġlugit qatiqtaamik.

⁵ Nappaiḷusiḷu ikipkaiviksravsiññik uyaġagnik savalġutinik savaaguŋaitchuanik.

⁶ Ikipkaiviḷiaqsikii Ataniġmun God-ivsiññun savaaguruksrauruq iḷaŋŋaqtuŋaitchuanik uyaġagnik. Taaptumani aitchuigisirusi ikipkaaksrauruanik.

⁷ Tavraniasii aitchuigisirusi ikipkaaksrauruanik iḷammiuqatauniqsi igliqtillugu niġiqasiġḷugich aitchuutivsi iḷaŋiññik saġimasuuttaġilugu takkuaniinniqsi Atanġum God-ivsi.

⁸ Miŋuliŋaruanun uyaġagnun aglakkisigisi nalunaiġḷugich iluqaisa pitquraŋi God-im.”

⁹ Tavra Moses-gum, Levi-m kiŋuvaaŋisalu aŋaiyyuliqsiqpauruat uqallautigait Israel iñuŋi, “Naalaksiŋa Israel iñugiraasi. Uvlupak uvva iñuliutirusi Ataniġmun God-ivsiŋñun;

¹⁰ kamagisaġniaqsiuŋ aasii pitquraŋiḷḷu munaġilugit qaitchatka uvlupak ilivsiŋñun.”

Uqamaqłuusiaksraŋit Kamakkutaiññiġum

¹¹ Moses-gum aasii uqallautigai Israel-gum kiŋuvaaŋich,

¹² “Ikaaganikkuvsiuŋ Jordan River, ukua kiŋuniiŋit makitagisirut Mount Gerizim-mi God-mun quviasuusiaksritqulugit iñuich: Simeon, Levi, Judah, Issachar, Joseph, Benjamin-lu.

¹³ Ukualiasii kiŋuniiŋit makitkisirut tusaayugaaqsaġlugit tatavsausiaksrat God-miñ Mount Ebal-mi: Reuben, Gad, Asher, Zebulun, Dan, Naphtali.

¹⁴ Levi-m kiŋuvaaŋich uqallakkisirut nipatusiḷutiŋ inna:

¹⁵ “‘God-im tatavsaġliuŋ kiñapayaaq iñuuraqpaliuqtuaq uyaġagmik, qirugmik, naakka savił̣hamik aasii suiḷaurrisikkun aŋaiyyuvigilugu; Atanġum uumigigaa iñuuraqpaktuġniq.’ “Iluqatiŋ aasii iñuit kiuniaġaat ‘Tainnailli aasii!’

¹⁶ “‘God-im tatavsaġliuŋ kiñapayaaq suuŋiḷaġinniktuaq aŋayuqaagmiñik.’ “Iluqatiŋ aasii iñuich kiuniaġaat, ‘Tainnailli aasii!’

¹⁷ “‘God-im tatavsaġliuŋ kiñapayaaq allaŋŋuqtiġiruaq siḷalliġmi nunaŋata killiŋanik.’ “Iluqatiŋ iñuit kiuniaġaat, ‘Tainnailli aasii!’

¹⁸ “‘God-im tatavsaġliuŋ kiñapayaaq ayauŋaruamik killunnamuksaaqtitchiruaq.’ “Iluqatiŋ aasii iñuit kiuniaġaat, ‘Tainnailli aasii!’

¹⁹ “‘God-im tatavsaġliuŋ kiñapayaaq ivayaqtuiruaq iglaamik, aŋayuqaagitchuanik, naakka uigiŋaruanik, pitqurakuaqługu pimaaqtugaksrautikkaluamiŋnik.’ “Iluqatiŋ aasii iñuit kiuniaġaat, ‘Tainnailli aasii!’

²⁰ “‘God-im tatavsaġliuŋ kiñapayaaq qiksiksrautaitchuaq aapamiñik aġnaqtuaqaqłuni aapami nuliaŋisa iḷaŋannik.’ “Iluqatiŋ aasii iñuit kiuruksraġigaat inna, ‘Tainnailli aasii!’

²¹ “‘God-im tatavsaġliuŋ kiñapayaaq atuaqaqtuaq niġrunmik.’ “Iñupayaat kiuruksraġigaat inna, ‘Tainnaili aasii!’

²² “‘God-im tatavsaġliuŋ kiñapayaaq allatuqtuaq aniqanmiñik aġnamik naakkaunnii aniqatiksraġmiñik.’ “Iñupayaat kiuruksraġigaat, ‘Tainnailli aasii!’

²³ “‘God-im tatavsaġliuŋ kiñapayaaq allatuqatiqaqtuaq aakaruamiñik.’ “Iñupayaat kiuruksraġigaat inna, ‘Tainnailli aasii!’

²⁴ “‘God-im tatavsaġliuŋ kiñapayaaq suiḷaukkivḷuni iñuaqtuaq.’ “Iñupayaat kiuruksraġigaat inna, ‘Tainnailli aasii!’

²⁵ “‘God-im tatavsaġliuŋ kiñapayaaq maniññaksaqłuni iñuaqtuaq patchisaiḷaamik.’ “Iñupayaat kiuruksraġigaat inna, ‘Tainnailli aasii!’

²⁶ “‘God-im tatavsaġliuŋ kiñapayaaq kamaksriŋitchuaq God-im pitqurapayaaŋiññik iḷisaurrutiŋiññiglu.’ “Iñupayaat kiuniaġaat, ‘Tainnailli aasii!’