Deuteronomy 26 - Iñupiatun Mumiksat Uqalugiksuat

Kivluiñikun Aitchuutit

¹ “Inillaanikkuvsi nunaksriusiavsiññun Ataniq God-ivsigñiñ,

² atausiullaalusi ilaaguaqsiyumausi nauriaqqaavsiŋniñ aguummagnun aasii ilaaguaqtasi kaluġlugich aŋaiyyuvigmun.

³ Ullautigisirusi aŋaiyyuliqsiqpauruamun aasii uqallautilugu, ‘Nalupqisuŋirrutiga salapqiġiga Ataniġmun God-mun nunamuktilaamnik ilaan unniqsuqłiutigiŋaraanun maŋŋuuptignun uvaptiŋnun nunannaktaaġiniaġnivlugu.’”

⁴ “Aŋaiyyuliqsiqpaum akuqtuġisigaa aguummak iliŋniñ aasii inillaglugu ikipkaivigmun Ataniġmun God-iptignun.

⁵ Tavraasii, Atanġum sivuġaani uqaġisirutin inna: ‘Maŋŋuġiraġa Aram-miu kukiḷuktuaŋaruq, aasii iḷauraani iñuuniaġiaġutiŋagai Egypt-mun. Iñugiakiñŋagaluaqtut taavuŋaġamiŋ, aglaan aquvatigun iñugiaksivaił̣ł̣utiŋ suaŋasiŋarut nunaqpaguqłutiŋ.

⁶ Egypt-miut aŋalamaqłuŋagaatigut payarivḷuta kivgaupkasugrukłuta.

⁷ Tavraasii nipaalaŋarugut ikayuquvluta Ataniġmun, God-iŋannun maŋŋuupta. Tusaagaatigut suli qiñiġaa nagliksautikput.

⁸ Suaŋŋatiqpaŋmigun annautiŋagaatigut Egypt-miñ. Savakłuni aliuġnaqtuanik, tatamaanaqtuaniglu nalautitchivḷuni.

⁹ Igliġutigaatigut mauŋa nunalluatamun naurirruġiksuamun.

¹⁰ Aasii paŋmapak qaġġirriruŋa Ataniġmun sivulliiŋiññik kivluaqqaaġma ilaata qaisaŋiññik uvamnun.’ “Iḷiḷuguasii aguummak Atanġum sivuġaanun nanġaġluguasii Ataniqsi.

¹¹ Saġimasuutigilugich nakuuniqtat kivluavsiññiñ Atanġum God-im qaisaŋich ilignullu iḷagnullu; Levi-m kiŋuvaaŋiḷḷu iglaallu iñuuniaqtuat nunaaqqivsiŋñi niqinaqiqatigilugich.

¹² “Ukiut piŋasuŋŋuġuutipayaaŋiññi aitchuiyumautin qulikuuġutiŋnik nauriapayaaġniñ sivuniqaġlugich Levi-m kiŋuvaaŋiññun, iglaanun, aŋayuqaaġitchuanun, uiḷgaŋaruanullu, nunaaqqiḷḷaapayaavsiŋñi niqaiḷḷiuġumiñaiġḷugit. Tainnaannikkuvsi,

¹³ uqallakkumautin Ataniġmun ‘Qulikuuġutitka iḷakuitchut iglumni; qaisaniŋagitka Levi-m kiŋuvaaŋiññun, iglaanun, aŋayuqaagitchuanun, uiḷgaŋaruanullu piraksriutiktun. Kamagigitka puiguŋaitkitkalu piraksriutigiratin qulikuuġnikun.

¹⁴ Niġġivigiŋaitkitka qiñuuġnimni; naakkaunnii annisuutiŋaitkitka iglumniñ salumaiḷḷiqinimni; aitchuivigiŋaitkitkalu tuquŋaruanun. Kamagigikpin, Ataniiq; piraksriutigipayaaqtakkun qulikuuġutinun.

¹⁵ Anmun qiñiqsigut salumaruamiñ qiḷagmiñ quviasuusiġḷugiḷḷu iñuktin Israel-gum kiŋuvaaŋich; piḷḷuataqtillugulu uumalaaqtuaq nuna qaisan uvaptiŋnun, unniqsuqłiisigiran maŋŋuuptignun nalautinniaġnivḷugu.’

Atanġum Ilaata Iñuŋit

¹⁶ “Uvlupak Atanġum God-ivsi kamaksritqupiaġataġaasi pitqurapayaaġmiñik; kamaksrisallagniaġitchiasii iluqaaġusi uummativsiŋniñ.

¹⁷ Uvlupak nalupqinaiġiñ Ataniġinivḷugu God, unniqsuqłiivḷutin kamaginiaġnivḷugich iluqaisa pitquraŋi suli iluqaisa piraksriutiŋi.

¹⁸ Uvlupak Atanġum akuqtuġaasi iñumaaqłusi unniqsuqłiunmisun; tavraasii piraksriġaasi kamaksritquvlusi pitqurapayaaġmiñik.

¹⁹ Ilaan kamanaqsipkałhaaġniaġaasi nunaqpaupayaaqtuaniñ ilaata savaaġmiñiñ, ilivsiḷiasii nanġausiaqaqtinniaġiksi qutchiksiḷiġlugulu atqa. Ilivsi pimaaġusi iñuginiaġaasi, unniqsuqłiunmisun.”