Deuteronomy 25 - Iñupiatun Mumiksat Uqalugiksuat

¹ “Innasugiŋŋuaġlugu una Israel-gum kiŋuvaaŋik uqaqsitaaġvigmuktuk sumik imma atiŋirrutiqaqłutik, patchisaiḷḷuni igḷua aasii igḷua killukuaŋaluni.

² Patchisiqaqtuaq ipiġaqtuaksraukpan isivġiirauruam palluqtillugu ipiġaqtuqtitkisigaa. Qavsiñik ipiġaqtuusiaksraŋa itkisiruq killukkuaġutaagun.

³ Ipiġaqtuusiaqaqtuksrauruq malġukipiaq (40) sipitkaluaġnagu; sippiqpatigik taapkua kanŋusaaġutauruq ilaanun.

⁴ “Sigguġutituġniaġnagu qimukti tunmaqtuaq amiġaiyaiguvsi palauvaksranik.

Piraksriusiaq Tuqukpan Aŋun Aniqatauruaq

⁵ “Malġuuk aŋutik aniqatigiik iñuuniaqatigiikpagnik atautchimi aasii igḷua tuquvluni iġñiqaġaluaġani, uiḷgaqtuaq uiñigniaġnani iḷaŋiḷaaŋanik; tuquruam aniqataata nuliagaksraġigaa aniqanmi tuvaaqataa.

⁶ Iġñiqqaaguruaq aŋalanniaġaak tuquŋaruam aŋutim iġñigiruatun, qitunġaġiiguruat atiŋat kipirauŋitchumauq iñuŋiññiñ Israel.

⁷ Aglaan tuquruam aniqataata nuliaġuŋitpauŋ, aullarriñukkisiruq uiḷgaqtuaq aasii uqallaguni, ‘Uigma aniqataata piraksrautikkaluani nalautitchuŋitkaa; aniqanni kiŋuvaaliyumaŋitkaa akunġanni iñuŋisa Israel.’

⁸ Nunaaqqim aullarriŋisa ququaġlugu uqautigisigaat. Sivunmuuluni tuvaaqasiutisuŋitpauŋsuli,

⁹ uiḷgaġniġum ullakkisigaa takkuanni aullarriŋisa nunaaqqim, aluġutaiqsillugu igḷuanik aasii tivvuaġviqilugu kiiñaŋagun uqallaguni, ‘Taamna nalautitchuuruq aŋunmun aniqanmiñun kiŋuvaaksritchiyumaŋitchuamun.’

¹⁰ Iḷaŋiyguuq nanmiñiq nalunaiññiaqtut inna Israel-gum kiŋuvaaŋiññi ‘tavra aŋutim iḷaŋich aluġutaiqsitauŋaruat.’

Allat Pitqurat

¹¹ “Aŋutik piyuutikpaŋnik qinnautilutik aġnaata ikayuġnialalugu aŋurriŋ, tavraasii tiguviñaqpagik qinnaqataata igruuŋik,

¹² nagligiuraŋaiġḷugu argaigaksrauruq aġnaq.

^13-14 “Pitqiksiġaġniaġnasi uqumaisilaaġutivsigun naakka uuktuutivsigun.

¹⁵ Saglutaġniaġnasi uqumaisilaaġuvsiuŋ suna naakka uuktuġuvsiuŋ, iñuuniqtulutin iñuuyumautin Atanġum God-ivsi nunaksrirrutaani.

¹⁶ Atanġum naġġugipiaġatagaich iñuich saglutaġautiqaġuuruat.

Piraksriun Tuqutquvlugit Amalek-miut

¹⁷ “Itqaumalugu qanuq Amalek-miunun aŋalanŋatilaaqsi Egypt-miŋŋaqtuqtillusi.

¹⁸ Qiksiksrautaił̣ł̣utiŋ God-mik, aŋuyaksaŋagaasi kiŋuvsiŋniñ piḷaipiallagmiusiḷu minġuliqpaił̣ł̣usi tuquġaivḷutiŋ aasii iḷavsiññik uniktinŋasiŋaruanik.

¹⁹ Tainnamik, nunannaktitanikpasi Atanġum God-ivsi akiḷḷiivsiññiḷḷu annaktitanikpasi avativsiññiittuaniñ, Amalek-miupayaurat tuqutaksraġigisi tamatkiġḷugich, kimun unnii itqaumayumiñaiġḷugich. Puiguġnasi!