Deuteronomy 24 - Iñupiatun Mumiksat Uqalugiksuat

Avinniq Katititqigñiġlu

¹ “Aŋun tuvaaqasiġumi aġnamik aasii aquvatigun iviġaumagiŋaiġḷugu iḷitchuġivluni irrusiŋanik naġġunaqtuamik, aasii avirrutinik makpiġarriuġutivlugu, qaił̣ł̣ugich aġnamun, aasii aniłługu,

² aasii allamik aŋunmik uiñitqigłuni,

³ tainnasuli uiñitqiutaan pigisuŋaiḷgitkaa, avirrutinik aasii makpiġarriulgitkaa qaił̣ł̣ugich aasii aġnamiñun, aimaaġvigmiñiinŋaiqsiḷgitkaasuli. Naakkaqaa uiñitqiutaa tuqukpan.

⁴ Nalliagugaluaqpan, uiqqaaŋata nuliatqiksaksraġiŋitkaa; isummatigiruksraġigaa salumaiḷiŋaruaġilugu. Katitqikkaluaġumiuŋ, paaqłagniaġaa Ataniq. Tainnaqtuksrauŋitchutin nunannaktaaġni Atanġum God-ikpich qaisaŋani.

Allakaaġiich Pitqurat

⁵ “Aŋun nuliaqqammiqpan, aŋuyaktinun iḷḷatiniaŋitchuq naakkaunnii savakumiñaitchuq kavamamun ukiupaiġḷugu; ukiuq naallugu aimmavigmiñi nuliatchaurani quviasuktinniaġisigaa.

⁶ “Attaqsipkaiguvich iñugmun sumik, palauvaksriuġutaa tigummiñagu utiqtitchipkaisiksraġilugu. Iñuuniutiksratualua tavra piiġisigiñ.

⁷ “Taluqsralliaġilugu aullaurriguvich iñuuniaqatignik kivgaġisuglugu naakka tuniaksramaaġulugu, tuqutaksraurutin. Nunaaqqiġikkaan piaġiirrutaiġumauq.

⁸ “Nagliksaaġutiqaġuvich paquġnaqtuamik uviñigiirrunmik, uqaluŋich Levi-m kiŋuvaaŋich aŋaiyyuliqsauruat nalaupiaġlugich kamagiraksraġigitin; maliġilugich piraksriutitka.

⁹ Itqaġlugu qanuq Atanġum God-ivsi qanuq aŋalanŋatilaaŋa Miriam Egypt-miŋŋaqtullavsi.

¹⁰ “Attaqsipkaiguvich kisupayaamun, isiġutin igluanun tigusiyyaġniaġnak annuġaaŋanik akiḷiqsiaġipkaġlugu;

¹¹ utaqqiuraaġisigiñ siḷataani igluata inmiñik qaitchaqtuaqsiaġilugu.

¹² Iḷiappaukpan, tigummisinagu unnuaqtutilaaŋatun;

¹³ utiqtillaagisigiñ annuġaaŋa anaqatuaġaġikpan, uunnaagutigiyumagaa siñiksaġumi. Quyaliñiaġiñ, aasii Atanġum God-ikpich iviġaummatigilutin.

¹⁴ “Ivayaqtuiñiaġnak piiḷḷiuġluqtuaniñ savaktiksraġuvich, Israel-gugaluaqpata naakka allaniñ nunaniñŋaqtaugaluaqpata akunnavsiññiḷu iñuuniaqtuagugaluaqpata.

¹⁵ Uvlutuaġaġikpan siqiñġum nipiŋaiññiŋani akiḷiḷḷaalugich uvlumi akiññaktaaksraŋatitun; inuġiluqługu akiññaktaaksraqtik. Akiḷiḷaitkupkich qirrugniaqtut Ataniġmun pisigilutin, pasiraulutin aasii piḷuusiqirualiḷutin.

¹⁶ “Aŋayuqaaguruat tuqutauniaŋitchut miqłiqtumiŋ pimaqłuutaat pisigilugi, suli miqłiqtut tuqutauniaŋitchut aŋayuqaaġmiŋ pimaqłuutaatigun; iñuich iliŋisa kisian pimaqłuunmikkun tuqutauruksraurut.

¹⁷ “Aŋalamaqługniaġnagich allaniñ nunaniñŋaqtauruat aŋayuqaaġiŋaruat; suli uiḷgaŋaruam annuġaaŋanik tigummiraksraqtaaqaġniaġnak sumik attaqsiñiŋagun iñuum.

¹⁸ Itqagilugu kivgauŋatilaaġnik Egypt-miunun Ataniġmun God-ignun annautilġataqtillutin; tainnamik taaptumiŋa piraksriġikpiñ.

¹⁹ “Katiqsriguvsi palauvaksranik iḷakutavsiññik utiqsiñiaġnasi, iḷakutasi pukuaksraġigait allamiñ nunaninŋaqtauruat, aŋayuqaagiqsat, uiḷgaŋaruallu, Atanġum God-ivsi piḷḷuataġusiqsuġumagaasii supayaaġuvsi.

²⁰ Suli olives-nik pukukkuvsi iḷakutasi utiġnagich; piksraŋich allamiñ nunaninŋaqtauruat, aŋayuqaagiqsat, uiḷgaŋaruallu.

²¹ Grapes-nik katiqsriguvsi siiġñaqaġviŋniñ, utiġutin pukuvsaaġiaġniaġnak, iḷakut piginiaġaich allamiñ nunaninŋaqtauruat, aŋayuqaagiqsat, uiḷgaŋaruallu.

²² Itqaumalusi kivgauŋatilaavsiññik Egypt-miunun; tainnamik taaptumiŋa piraksriġivsi.