Deuteronomy 23 - Iñupiatun Mumiksat Uqalugiksuat

Anitauniq Atanġum Iñuŋiññiñ

¹ “Aŋutim igruuk siqumitaukpagnik naakka quġġivia kipirauruaq iḷauyumiñaitchuq Atanġum iñuŋiññun.

² “Kiñapayaaq aapaiḷḷiaq kiŋunġuruallu aapaiḷamun, quliŋanuaglaan unnii kiŋuniiŋisa, iḷauyumiñaitchuq Atanġum iñuŋiññun.

³ “Ammon-miut naakka Moab-miut iḷauyumiñaitchut kiŋuniiŋiḷḷu quliŋanuaglaan unnii iñuŋiññun Atanġum.

⁴ Ikayuġuŋiñŋammasi niqikun imikullu pigruqavsi nunaŋaniñ Egypt-gum, iliŋisalu akiḷiqł̣ugu Balaam Peor-m iġñiŋa, nunaaqianiñ Pethor-m Mesopotamia-miittuam, uqallamaqłuutitquŋammasi.

⁵ Aglaan Atanġum God-ivsi naalaġniŋaitkaa Balaam; aasii piḷḷuatausiusiaksravsigñun mumiksinŋagaa pimaqłuutiksrakkaluaqsi, qanukkii Atanġum God-ivsi nakuaġivlusi.

⁶ Nunaqpauguraġniaġuvsi, ikayuaksraġiŋitkisi nunaqpauruat taapkua, naakka sivunmuutiksraŋannik ikayuġniaġnagich.

⁷ “Suuŋilaġinagich Edom-miut; nanmiñiq iḷagigisi. Suuŋiḷaġinagich Egypt-miut; iñuuniaġvigiŋagiksi nunaŋat allanin nunaninŋaqtauvlusi.

⁸ Tutaaluuŋiññiñ aglaan iḷauyumiñaġniaqtut Atanġum iñuŋiññun.

Aŋuyaktit Nullaummiviat Salumapkagaksrauruq

⁹ “Aŋuyaktit nullaummivikaaŋaniitkuvsi aŋuyagmata, piraġausiq nalaullugu salumaitchuaniñ piisimaaqtuksraurusi.

¹⁰ Aŋun una siñillaġmi maqimagumi nalikkaaŋmiñiñ tuŋiunmiñun, asivaġisiruq siḷataanun nullaummivium tavraniitkaqsiḷuniasii.

¹¹ Anaqaksraagaqsikpan aasii, ivvaqtuġuni, siqiñiq nipikpan aasii utiġuni.

¹² “Maquyyaġviqaqtuksrauruq nullaummivium siḷataani.

¹³ Qiruatchiamik tigumiaqaqtuksraurusi, taimmaasii nivautilugu nunamun anan aasii saulugu.

¹⁴ Nullaummivikaaq unni piraġausiq nalaullugu salumapkagaksraġigiksi, qanukkii Ataniq God-iksi pisuġalaruq akunnavsiññi aasii munaġiniaġaasi akimmatiqaqtillusiḷu aŋuyakkuvsi. Sumik iviġaumanaitchuamik savaaqaġniaġnasi Ataniġmun God-ivsiññun tunutquŋitkuvsi.

Allakaaġiich Pitqurat

¹⁵ “Kivgat annaksaġvigikpatin kivgauvigmigniñ, utiqtinniaġnagich.

¹⁶ Iñuuniaġumiñaqtuq nallianni nunaaqqivsi, suli aŋalamaqłuktaġniaġnagi.

¹⁷ “Atausiq unnii Israel-gum kiŋuvaaŋa, aġnaugaluaġumi aŋutaugaluaġumi, aŋaiyyuvigmi akiitchuġuġniaġnani.

¹⁸ Aasiisuli akiitchuuruat maniññaktaaŋich aġnauruat naakka aŋutit igluanuktuksrauŋitchut Atanġum God-ivsi unniqsuqłiutauŋaluqtuqunnii. Atanġum naġġugipiaġataġuugaich akiitchut.

¹⁹ “Attaqsipkaiguvich maniŋñik naakka niqinik naakka supayaanik Israel-guruanun naggusiġñiaġnagich.

²⁰ Naggusiġumiñaġaluaġitin allaniñ nunaninŋaqtaukpata, aglaan Israel-guruanunŋiḷaaq. Kamaksriguvich taaptumiŋa piraksriunmik, Atanġum God-ikpich piḷḷuataqtinniaġaatin supayaatigun nunannaktaaġiniakkaġnii.

²¹ “Unniqsuqłiiguvich Ataniġmun God-ignun, nalautinniaġniŋa piñatchiaġutiginagu; Atanġum puiguġumiñaitkaa unniqsuqłiutin, piḷuusiqiniaqtutin taŋŋiŋitkupku.

²² Piḷuusiqutauŋitchuq unniqsuqłiiŋiññiq Ataniġmun,

²³ aglaan unniqsuqłiivigigupku nalautitaksraġigiñ.

²⁴ “Pisukatallaqpit pisuaġviagun iñuum siiġñaqaġviata, grapes-tuġuiqsuaġumiñaqtutin, aglaan puuqsiñiaġnak tigumiaksraġnik.

²⁵ Pisuaġuvich apqugaatchiaŋisigun iñuum palauvaksraqaġviata, argaŋnik nutchugaiḷutin niġiyumiñaqtutin aglaan kivriḷutin piksraġniaġnak.