Deuteronomy 22 - Iñupiatun Mumiksat Uqalugiksuat

Allavsaat Pitqurriutauruat

¹ “Tautukkuvich iñuuniaqativsi immuliviannik naakka imnaigutaannik asiñuŋaruamik, qiñiqsiññaġnagu; iñuannuutiyumagiksi.

² Aglaan iñua uŋasikpan naakka kimun pigipiaqtilaaŋanik naluguvich, aggisuutigisigiñ. Aasii iñuata ivaġniqpauŋ, utiqtillugu iñuanun.

³ Tainnasuli piyumautin paqitchiguvich kakaktimik, annuġaamik, naakka supayaamik Israel iñuŋisa tammaikkaŋanik.

⁴ “Tautukkuvsiuŋ iñuuniaqativsi kakaktiŋa naakka immuliviŋa ulġumakpan, suliqutigiŋiññagu; ikayuġlugu aŋun makititqikkisigiksik.

⁵ “Aġnauruat aŋutit annuġaaŋiññik atiniaġnatiŋ, aŋutillu aġnaqtanik anuġaaġniaġnatiŋ; Atanġum iviġaumagiŋitkait arruqpata aġnaqtanik naakka aŋunnaqtanik.

⁶ “Pikiutkuvich tiŋmiaġruum ugluanik napaaqtumi naakka nunami aakaŋata itchuġvigimakpagich manniich naakka pialaat, aakaŋat pisaġinagu.

⁷ Ivaaŋiññik piññakkumiñaġaluaqtutin, aglaan aakaŋat aullaqtittaksraġigiñ, iñuuniqtuyumautin piḷḷuatautiqaġlutillu.

⁸ “Iglutchauraliuġuvich, qiḷaŋata siñaa iglukpich avaluliġisigiñ. Kataktaġuni iñuk tuqukpan patchisauŋitchumautin katagniŋagun.

⁹ “Allakaaġiiñik nautchirriiñiaġnak nautchiaqaġvigñi akunġannun grape-gich; tainna pimaguvich, akulliġiigḷugich nautchirriiguvich nauriatin iluqaisa atugaksraġiŋitkitin.

¹⁰ “Pituutaqatigiigñagik qimukti kakaktilu nunaliqunmun.

¹¹ “Annuġaanik atuġnak piḷiaguruanik avułłigiiksinŋaruagnik imnait mitquŋiñiglu ukił̣haaġiksaaniglu.

¹² “Niviŋaluqutchiġumagiñ qaliġuan sisamanik kaŋigallullaaŋikkun.

Pitqurat Siñiqatigiigñikun

¹³ “Iḷaanniami aŋun nutaġauramik nuliaŋaqqaaġuni, aquvatigun aasii nakuaġiŋaiqsimakpagu.

¹⁴ Sagluuġutigiaqsiḷuguasii, pasivḷugu aŋusiuŋaitchuaguŋiññivḷugu katitinmagnik.

¹⁵ “Tainnaġniqpan, niviaqsiam aŋayuqaaŋiksa auguaqtaŋaruaq tuŋiutaiññi maniraksraġigaak nalupqinaiyautauruaq aŋusiuŋaitchuagunivḷugu, maniuġlugulu pigisigaak nunaaqqim aullarriŋiññun uqaqsitaaqpata.

¹⁶ Aapaŋan uqallautigisigai, ‘Qaiñŋagiga paniga taaptumuŋa aŋunmun tuvaaqasiutitquvlugu, aasiuvva pigisuŋaiġaa.

¹⁷ Asiñik pasigaa, uqaqhuni aŋusiuŋaitchuaguŋiññivḷugu katinŋaiñŋaġmiŋ. Aŋusiuŋaisiḷaaġutauruq auguaqtaŋaruaq ukił̣haaq katititqaaqamik!’

¹⁸ Tavraasii nunaaqqim aullarriŋisa tatavsaġisigaat uiguruaq.

¹⁹ Aasisuli akiḷiipkaġlugu tallimakipiatun (100) maniuranik qatiqtuanik qaiḷḷugich niviaqsiam aapaŋanun, uvvaataŋ uiguruam kanŋusaaġaa Israel iñuŋa aġnaq. Aasiisuli nuliani avitchumiñaiññiaġaa uiŋata iñuuniqtutilaamisun.

²⁰ “Aglaanami pasiuġutaa iḷumun inniqpan nalupqinaiyautiksraitpallu aŋusiuŋaisilaaŋanik,

²¹ annisuutilugu aapaŋan igluanun, miḷuqtuġlugu aŋutit inauqatiiŋisa tuqutkisigaat. Uvvaataŋ kanŋunaqtualiqiruq allatuqłuni katinŋaiñŋaġmi, aapami igluani iñuullaġmi. Tainnaġuvsi piaġiirrutaiġisirusi.

²² “Aŋun aŋuraukpan allatuqatiqaġluni uiḷigaamik, iluqaaktun tuqutaksrauruk. Tainnaġuvsi piaġiirrutaiġisirusi.

²³ “Aŋunsuli aŋuraukpan allatuqatiqaġluni allam aŋutim nuliaksrautaanik.

²⁴ Annisilugik nunaaqqimiñ miḷuqtuġlugik uyaġagnik tuqutkisigisik. Aġnaq tuqutaksrauruq kappiatualaŋił̣ł̣uni tusaariksraqaġaluaŋŋaġmi. Aŋuttauq tuqutaksraummiuq allam nuliaksrautaanik allatuqatiqaqtuaq. Piaġiirrutaiġumausi tainnaġuvsi.

²⁵ “Aglaattauqami, aŋutim niviaqsiaq asivani nunami payarivḷugu atuqpauŋ uiksrautiqaqtuaq. Tavra aŋun kisian tuqutaksrauruq;

²⁶ qanugaksrauŋitchuq aġnaq, qanuq ilaa patchisauŋitchuq tuqurrutiksramiñ. Tainnasiq piḷġusiq atiruaguruq aŋutim piyuaqługu iñuaġmatun.

²⁷ Aŋutim payarivḷugu atuŋagaa uiksrautilik asivani nunaraami, uiġualagaluaqtillugu, sumikunii ikayuqtiksraiñmiuq.

²⁸ “Iḷaanniptauqami aŋun aŋuraukpan payariaġivḷugu atuqpan uiksrautaiḷaamik.

²⁹ Aŋun akiḷiiruksrauruq aapaŋanun malġukipiaq qulitun (50) maniuranik qatiqtuanik, nuliaġmiḷuguasii, payarivḷugukii atuqtaġigaa. Nuliaġisaġataġisigaa iñuuniqtutilaamisun.

³⁰ “Aŋutim kanŋunaqsiḷiġñiaŋitkaa aapani allatuqatiqaġluni nuliaŋisa ilaŋannik.