Deuteronomy 21 - Iñupiatun Mumiksat Uqalugiksuat

Suniaqtilaaksraq Iḷitchuġiŋaiñŋaan Iñuaqtuaq

¹ “Iḷaanni iñugmik iñuum tuqunŋaraanik paqisimakpata nunannaktaaksrautivsiŋñi Atanġum God-ivsi piññaktaaġipkaġniakkaŋanii, suli iḷitchuġiŋaitkuvsiuŋ kimun tuqutilaaŋanik.

² Aullarrigikkasii suli isivġiirauruat ullaglugu uuktuġiaġisigaat nalliannun nunaaqqimiŋ qaniłhaaġmagaan.

³ Aasii qaninniqsrauruam nunaaqqiŋaniñ qaukłiuruat immulivigmik nutauruamik piksramaaġisirut savaktitauŋaitchuamik.

⁴ Kuuġuluuram maqiŋaiḷaitchuam siñaanuutigisigaat aulanŋaitchuam kivluġlugu naakka nautchiiviuŋaitchuam, tavraniasii niġluiḷugu quŋusiñġanik.

⁵ Tavruŋa ullautigisimmiut aŋaiyyuliqsiqpait Levi-m kiŋuniiŋiññiñ, atakkiataŋ iḷauruksraurut sivunniiqataulutiŋ atiŋirrutauruatigun piaqłuktaqpata. Atanġum God-ivsi naliġaaġiŋavlugich savautitquvluni suli quyyasiusiallu iḷitchuġipkaquvlugich atini pisigilugu.

⁶ Iluqatiŋ aasii aullarrauruat qaninniqsrauruamun nunaaqqimun iqaġigisigait argatiŋ qulaanuglugich immulivium,

⁷ uqallagutiŋ aasii, ‘Uvagut iñuaqtaġiŋitkikput taamna, suli nalummiugut kimun iñuaqtaġiŋatilaaŋanik.

⁸ Ataniiq, suliqutigiŋaikkich iñuktin Israel-gum kiŋuvaaŋich, annautiŋakkatiin Egypt-miuguruaniñ. Suliqutigiŋaiqsigut suli pasiraupkaġnatigut iñuaqtamun uumuŋa patchisaiḷaamun.’

⁹ Taimmaasii, nalaullugu Atanġum pitqutaa, patchisaiġñiaqtusi iñuaqtamun.

Piḷġusiksraqsi Aġnaq Aŋuyaktuani Tigutaaqtaukpan

¹⁰ “Atanġum akimapkaqpasi aŋuyaktuani aasii tigutaaqsiḷusi akiḷḷivsiŋniñ,

¹¹ tautukkuvich aġnaġiksuamik tuvaaqatiksramaaqtaġnik.

¹² Aggisigisigiñ, kivraqtilluguasii kukiiyaqtillugulu,

¹³ annuġaatqiksillugulu. Aimaaġvigñi ittuksrauruq tatqimi qiñuuqtillugu aŋayuqaamiñik; aasii katitillusik taaptuma aquagun.

¹⁴ Aquvatigun, pigisuŋaiġupku, atanġiqsitkisigiñ. Tuniñiaŋitkiñ naakka aŋalallugu kivgatun siñiqatigianiŋakapku kanŋunaqsiḷiqługu.

Iġñiqqaam Kiŋuvaannaktaaksrautiŋisigun

¹⁵ “Innasugiŋŋuaġlugu una aŋun malġugnik nuliaqaqtuq aasii iġñiḷḷaaruk, aglaan iġñiqqaaqtuaq nuliaŋa piqpagipiaġiŋitkaa.

¹⁶ Aŋutim autaaġumaaqsikpagich suġauttani qitunġamiñun, suġallaktaaġmiñiñ aŋayukłim piksrautaa qaisaksraġigaa, iġñiġiŋiḷḷuġaa unnii nuliannaġiraġmi aŋutim uuma iġñiqqaaġikkanii aitchugaksraġigaa tunŋaruksrautauruanik ilaanun.

¹⁷ Ilaan malġuullugu piññaktaakaamiñ qaitchiruksraġigaa iġñiqqaani, iġñiġiŋiḷḷuġaa unnii nuliannaġiraġmi. Aŋutim uuma puttuqsriŋalluatagaksraġiġaa una iġñiqqaani aitchugaksrautilaaŋa ilaan piññaktaaksrautaiññik tunŋaruanik ilaanun.

Pisigilugu Uqaqsiġiitpan Iġñiġuruaq

¹⁸ “Iḷaanniami iñuk iġñiqaqsimakpan sivuniqtuulguruamik paaqłaŋaugaqtuamiglu, taamna iġñiġuruaq kamaksrisuiñmivḷuni aŋayuqaaġmiñik, tatavsaġuugaluaqtilluni unnii.

¹⁹ Aŋayuqaaŋiksa aataksraġigaak aullarrauruanun nunaaqqimiŋni iñuuviani aasii uqaqsitaaġvikaamuutilugu.

²⁰ Iliŋiksa uqautigisigaich, ‘Iġñiqpuk uvva sivunmuutuqpaktuq suli paaqłaktuaġaatiguk kamagisuiñmigaatiguk; niġivaitchuuruq immaġluktuaqłuniḷu.’

²¹ Tavra aŋutiŋisa nunaaqqim uyaġagnik miḷḷuuġlugu tuqutkisigaat, tavraasii piiġñiaġiksi pigiitchuaq. Israel iñuŋisa tusaaniaġaat qanuq pitilaaŋanik aasii iqsiḷiġutiŋ.

Allakaaġiich Pitqurriutit

²² “Kiña imma iñuk tuqutaumakpan pimaqłuktaunmigun taimmaasii timaa niviŋŋaqtauluni naparuamun,

²³ unnuipkagaksrauŋitchuq unnuapak. Argautiraksrauruq uvlaakuŋaiñŋaan, atakkiataŋ pimaqłuutiqaqtinniaġaa nuna God-im tuquŋaruaq pisigilugu. Iḷuvigaksraġigiksi timaa, salumaiḷiŋitchumagiksi nuna Atanġum, God-ivsi, aitchuutaa ilivsiŋñun.