Deuteronomy 20 - Iñupiatun Mumiksat Uqalugiksuat

Piraksriqsuutit Aŋuyagnikun

¹ “Aŋuyaksaaqsiguvsi akiḷḷivsiŋñik aasii tautuglugich aksraliktuuranik tuttuqpirautiŋiññik suli aŋuyaktaukkałhaaqpagmivḷutiŋ, iqsiñiaġnasi. Atanġum God-ivsi annaurriŋaruam ilivsiŋñik Egypt-miuniñ, nayuġniaġaasi.

² Aŋuyaksaŋaunnasi aŋaiyyuliqsiqpak sarvaġluni uqallautigisigai aŋuyaktit,

³ ‘Aŋutauruasii Israel-mi, naalagitchi! Uvlupak uvva aŋuyagniaqtusi. Iqsiginagich akiḷḷisi naakkaqaa qanuqsausiiġñiaġnasi suli tatamaallagnasi pisigilugich.

⁴ Atanġum God-ivsi aŋuyaqasiġñiaġaasi, aasii akimaniaqtusi.’

⁵ “Qaukłiich aŋuyaktuanun uqallaurrigisirut aŋuyakkumaruanun, ‘Immaimña nalliqsi igluqpiqqammiqpa, ilaaguaŋaitchamiñik suli God-mun? Tainnaŋaitkumi airuksrauruq. Tainnaŋaitkumisuli tuqutaumagumi aŋuyaktuani, ilaaguagaksrautikkaluaŋa igluŋa allam ilaaguaqtaġiniaġaa.

⁶ Iñuqaqpa akunnavsiŋñi nautchirriiqqammiqsuamik aglaan siiġñaŋiññik uuktuaŋaiḷḷuni? Tainnaitpan aiḷi. Uvvakii tainnaitpan allam iñuum tuqutaukpan wine-tuuraaġvigigisigai.

⁷ Akunnavsiŋñi suli katitchumaaqtuaqaqpa? Tainnaitpan aiḷi. Uvvakii, tuqutauliqpan aŋuyaktuani, allam nuliaksrautaa nuliaġniaġaa.’

⁸ “Aŋalatchirauruat uqallaurrimmiyumaut, ‘Iḷaksi aŋuyagiaqsausiiqsuaqaqpa akunnavsiññi? Tainnaittuaqaqpan? Aiḷi. Aiŋitkaluaġumi iqsisaata nikasuliqsitpiaġai aŋuyaktauqatini sapiqsraliqsillugich.’

⁹ Aŋalatchirauruat uqaurrianikpata aŋuyaktinun, qaukłiksraqturraqsigisirut qavsiullaaruanun.

¹⁰ “Tavra aŋuyaksaġumaaqsiguvsiuŋ nunaaqqiq, aŋuyaguŋaiġaluaqtilaagaksraġigisi.

¹¹ Aŋmautikpasi upkuaqpagmiŋnik qaiḷḷutiŋ, tamatkiġḷugich savaktigiliutigisigisi siġġaġnaqtuanik.

¹² Aglaan iñuŋi nunaaqqim qaitchuŋitpata, aŋuyagumalutiŋ, aŋuyaktivsi avatchumagaat nunaaqqiq.

¹³ Taimmaasi, Atanġum God-ivsi akimapkaqpasi, aŋutipayaurat tamatkiġḷugich savikpagnik tuqutchumagisi.

¹⁴ Aglaan ami, piññaktaaġiyumiñaġisi aġnat, miqłiqtut, pamiqsaat, supayaallu atuġumiñakkasii suġauttaŋi akiḷḷiivsi, Atanġupkii qaisaniŋagai ilivsiŋñun.

¹⁵ Tainna nalautkisigisi iniqpaich uŋasikpata inillagviksrautivsiŋniñ.

¹⁶ “Aglaan akiiḷiguvsigiŋ iniqpaich nunaksriusiavsigñi Ataniġmiñ, tamatkiġḷugich tuqutchumagisi aniqtiġipayauraqtuaq.

¹⁷ Suksraunġipiallakkisigisi tamatkigḷugi ukua iñuit: Hit-miut, Amor-miut, Canaan-miut, Periz-miut, Hiv-miut, Jebus-miullu, Atanġum pitqutaa nalaullugu.

¹⁸ Tuqutchumagisi, piḷuksipkaŋitchumagaasi paaqłaglugu Ataniq iḷisautilusi piaġiitchuanik piḷġusipałługmiŋnik nanġaikamiŋ god-imiŋnun.

¹⁹ “Avanŋaguvsiuŋ nunaaqqiq sivisuruami, kivluiñasi napaaqtuŋiññik. Niqigiyumagisi siiġñiaŋit napaaqtut; napaaqtuŋitkii akiḷḷiqsruŋitkisi.

²⁰ Kivluġumiñaġisi allat napaaqtut niġiñaqtuagitchuat taaluksriuġutigilugich nunaqpagmik pisaġilġataqlugu.