Deuteronomy 2 - Iñupiatun Mumiksat Uqalugiksuat

Ukiut Nunagluktuami

¹ “Tavraasii nunagluktuamugiaqtugut utinmun, tuŋaanun Red Sea-m Atanġum piraksriutaatun, aasii kukiḷugvigisugruksiññaqługu nunagluktuaq qaniŋani iġġim atiqaqtuam Seir-mik.

² “Kiisaimmaa Atanġum uqallautivaaŋa

³ ‘Sivisuruamiuvva kukiḷuŋarusi nunagluktuami salliñaaŋanuksaġnaqsirusiuvva.’

⁴ Uqautiŋagaaŋa ukuniŋa piraksriqsuunmiñik ilivsigñun. ‘Uvva iglaugaqsirusi, iḷavsi kiŋuvaaguruat Esau-mun, nunaŋatigun. Iqsiginiaġaasi.

⁵ Aŋuyanmun piyumisaaġnasigich qanukkii nunaksriññiaŋitkivsi tutiviksramikunnii. Qaisaniŋagiga nunagluktuaq qaniŋani iġġim atiqaqtuam Seir-mik Esau-m kiŋuvaaŋiññun.

⁶ Tauqsiġvigiyumiñaġisi niqiksravsigñik imiksravsigñiglu.’

⁷ “Itqaumagilugu ikayuusiaqsi Ataniġmiñ God-ivsiññiñ suraġausipayaavsigun. Qaunagiŋagaasi kukiḷugvigisugrukavsiuŋ nunagluktuami. Nayuŋagaasi malġukipiani (40) ukiuni, suiḷḷiuqtinŋaitkaasi.

⁸ “Tavraasiiñ iglauŋarugut saniġatqułługich iḷavut Sier-miittuat, apqun Arabah unił̣ł̣ugu apqutaak Elath-guvlu Eziongeber-vlu Dead Sea-mun. Nunagluktuam apqutaaguaŋarugut Moab-mun.

⁹ Atanġum uqallautigaaŋa, ‘Isumaalluksaaġnagich Moab-miut, kiŋuvaaguruat Lot-mun, aŋuyanmun piyumisaaġnasigich. Nunaksriñŋagitka Ar-mik, aitchuġniaŋitkivsi nunaŋanniñ.’”

¹⁰ (Iñuuniaŋagaluaqtuarguuq iñukpasuich Ar-mi taiguusiqaqłutiŋ Emim-nik, aktilaaqatigivlugich iñukpasuich Anakim-nik taiguusiqaqtuat.

¹¹ Arriqatikkaluaŋich taisuummiñiġaich suli Rephaim-nik; aglaan Moab-miut taiguġuuniġait Emim-nik.

¹² Hor-miurguuq iñuuvigisuuŋagaluaġmiraat Edom, aglaan kiŋuvaaŋisa Esau-m aninŋagaich, suksraunġiqł̣ugiḷḷu nunaqpauruat, aasii inillagvigivlugu iliŋisa, Israel-gum kiŋuvaaŋisun anitchimmatun akiḷḷiimignik nunamiñ Atanġum aitchuutaaniñ.)

¹³ “Ikaaŋagikput Zered River Atanġum piraksriutaa nalaułługu.

¹⁴ Taamna tavra piŋaruq iñuiññaq akimiaq piŋasut (38) ukiut qaaŋianigmata uniññaptiguqaŋa Kadesh Barnea. Tavraniasiiñ iluqaġmiŋ aŋuyallaruat tuquŋaniqsut nalautitchaqługu ilaata Atanġum unniqsuqłiisaa.

¹⁵ Atanġum akiḷḷiqsruqsimaaŋagaich iluqaisa tuqulġataqtiłługich.

¹⁶ “Tuquanigmata,

¹⁷ Atanġum uqallautigaaŋa,

¹⁸ ‘Uvlupak uvva nalautchaaġniaġiksi nunaŋat Moab-miut Ar-kuaġlusi.

¹⁹ Qaninaaġniaġisi nunaŋat Ammon-gum kiŋuvaaŋisa. Isumaalluksaaġnagich, aŋuyanmun piyumisaaġnasigich, atakkii aitchuġniaŋitkivsi nunaŋanniñ qanukkii qaitkaniŋagiga kiŋuvaaŋiññun Lot-gum.’”

²⁰ (Tamanna nunagiŋagaluaġmiraŋarguuq Rephaim-gich; Ammon-miut taisuuŋaniġaich Zamzummim-nik.

²¹ Aktilaaqaqłutiŋ Anakim-titun. Iñugiakłutiŋ, suaŋaruaguvlutiglu kiŋuniġiich. Atanġum aglaan suksraunġiŋagaich, tavraasii Ammon-miunun nunannaktaaġipkaqługu.

²² Tainnaptauq suli Atanġum Edom-miut pipkaŋammiñiġait, kiŋuvaagurualli Esau-miñ, iñuuniaqtuat Edom qimiġaŋiññi. Suksraunġiŋagaich Hor-miut, aasii Edom-miut nunannaktaaġivlugu, pagmanuaglaan.

²³ Siñaa Mediterranean Taġiuŋata qikiqtaġmiutaurualli Crete-miñ inillagvigiŋagaat. Tuquttaŋagaich Avvim-guruat, iñuqqaaŋi tavraniittuat, nunaŋat aasii piññaktaaġivlugu kiluanunaglaan Gaza-mun.)

²⁴ “Qaaŋianikkaptigu nunaŋa Moab-miut, Atanġum uqallautigaatigut, ‘Ki ikaaġiaqsiuŋ Arnon River. Suaŋŋasiġivsi akiiḷiḷḷasivḷugu Sihon, Amor-miuguruaq, umialiŋa Heshbon-gum nunatuummaan. Ki, aŋuyagiaqsiuŋ nunnaksautigillaan.

²⁵ Uvlupagmiñ-aglaan iñupayaat sumiḷiqaa ittuat iqsigiliġñiaġaasi. Kiñapayaaq uulillagniaqtuq atiqsi tusaasiññaġlugu.’

Israel-gum Kiŋuvaaŋiññun Akiisitkaat Umialik Sihon

²⁶ “Tavra tiliriŋaruŋa kiliktuiriñik nunagluktuamiñ Kedemoth-miñ, umialigmun Sihon-mun, Heshbon-miittuamun, innaquvlugu:

²⁷ ‘Qaaŋiqsaaqtitchigut nunavsigun. Apqusaaqsiññaġlugu iglauviginiaġikput piaqłuktautaiḷaamik, apqun unitqataġniaŋitkikput.

²⁸ Akiḷiiñiaqtugut niġigupta imiġuptalu. Apqusaaġvigisiññaġukkikput uvva nunaksi,

²⁹ ikaaganigataġlugu Jordan River Atanġum God-ipta nunaksrirrutaanun-aglaan. Kiŋuvaaŋisauvva Esau-m, iñuuniaqtuat Edom-mi, Moab-miullu inuuniaqtualli Ar-mi, iglaupkaŋammigaatigut nunamiktigun.’

³⁰ “Tavraaglaan Sihon umialgum apqusaaquŋiñŋagaatigut nunamigun. Atanġum God-ivsi uqayunaiqsiłługu paaqłaŋasipkaqługulu, uvaptignun akiisitquvlugu nunaiġḷugulu, aasii pagmamuaglaan nunagigikput.

³¹ “Tavraasii Atanġum uqallautigaaŋa, ‘Tautuguŋ, Umialik Sihon nunatuummaġmi qanuqsaġviiqsuq; nunaiġuŋ inillagvigiluguasii.’

³² Tavraasii Sihon aŋuyaktipayaaniḷu aŋuyagiaġaatigut nunaaqqim Jahaz qaniŋani,

³³ Tavra Atanġum God-ipta qaipiallaŋagaa, tuqunŋagikput, iġñiŋiḷḷu, aŋuyaktipayaaŋiḷḷu.

³⁴ Akiiḷisiññaŋitkivut maqutchigivut nunaaqqipayaaŋiññik, tuqułługit aŋutit, aġnat, miqłiqtuŋiḷḷu. Unitchiŋaitchugut iñuuruamik.

³⁵ Piññaktaaġiŋagivut aglaan pamiqsaat, supayaallu atuġnaġumiñaqtuat.

³⁶ Tavra Atanġum God-ipta pisaġipkaŋagaich nunaaqqich Aroer-miñ aglaan, killiŋaniñ Arnon Valley-m, Gilead-muaglaan. Payagiŋaitkivut killiġutiqaqtuat-unnii.

³⁷ Aglaan Ammon-gum kiŋuvaaŋich nunaŋanniqsiuŋaitchugut suli Jabbok River-m siñaani naakkaunnii qimiqqaniittuat nunaaqqich allallu Atanġum God-ipta ullaquŋitchaŋich.