Deuteronomy 18 - Iñupiatun Mumiksat Uqalugiksuat

Autaaġusiaŋat Aŋaiyyuliqsiqpaich

¹ “Aŋaiyyuliqsiqpauvlutigli kiŋunġuruat Levi-miñ, nunannaktaaqaġniaŋitchut nunannaktaŋiññiñ Israel iñuŋisa; aglaan, iñuuniutiqaġniaqtut aitchuutiŋiññik iñuich suli ikipkautauruanik Ataniġmun.

² Nunannaktaaqaġniaŋitchut iḷavsiksun kiŋunġuruatitun; piññaktaalluataŋat tavra nuimaruaguruaq aŋaiyyuliqsiqpauvlutiŋ Ataniġmun, ilaan unniqsuqłiutaatun.

³ “Pamiqsaat naakka imnaich ikipkautaukpata, aŋaiyyuliqsiqpaich aitchuġisigisi ukuniŋa: kiasik, agliġuq, aqiaġumiglu.

⁴ Aitchuusiaqaġisirut sivulliŋiññiñ palauvaksrat, wine, olive uqsruq, suli imnait mitquŋiñik.

⁵ Atanġumkii naliġaaġiŋagaich kiŋuniġiipayaaqtuaniñ Levi-miñ maŋŋuqaqtuat, savautitquvluni aŋaiyyuliqsiqpautquvlugi iñiġlugu.

⁶ “Levi-m kiŋuvaaŋa sumiḷḷiqaa nunaŋiññiñ Israel-mi piyummatiqaqtuaq ullautiyumiñaqtuq taaptumuŋa atautchimun nanġaiviannun Atanġum.

⁷ Aasii aŋaiyyuliqsiqpauyyaġluni savaurriḷuni Ataniġmun God-imignun, allatittuttauq tavraniittuatun aŋaiyyuliqsiqpauruatitun.

⁸ Niqiqaqtilaaŋatiktuttauq akuqtuiḷuni niqinik aŋaiyyuliqsiqpaich allat aitchuusiaġiraŋisun, piññaŋagaluallaġmi iḷami tuyuġiraŋiññik.

Sivuuġasaaġutit Allakaanik Piḷġusiñik

⁹ “Tikitkuvsi Atanġum God-ivsi nunaksrirrutaanun, maliksugnagich allat nunaaqqich iñuqqaaŋisa piḷġusipałłuŋiññun.

¹⁰ Aitchuutiginagich miqłiqtusi ikipkautigilugich ikipkaivivsiññi; naakkaqaa iñusi aŋatkulanatiŋ, suli kaŋiqsiñiatagnatiŋ nausaaġutinik,

¹¹ naakka aanġuaqtuġnatiŋ, suli kaŋiqsiuġviginasigi ilitqusiŋich tuquŋaruat.

¹² Atanġum God-ivsi tainnatchiḷiqiruat naġġugigaich, tainnamik tavra nunat piiqsitaġaich apqutivsiŋniñ igliqtuallavsi.

¹³ Iḷumutuupiaġataġlusi Ataniġmun.”

Unniqsuqłiusiaq God-im Uqaqtaanik Tiliriñiaġnivḷuni

¹⁴ Moses uqallaktuq, “Nunannaktaaksrautivsiŋñi iñuiḷḷi kamaksrisuurut nalautchuġaqtinun qiñaavlutiglu nausaaġutinun. Uvvaaglaan Atanġum God-ivsi tainnatchiñik ilivsi savaaqaquŋitkaasi.

¹⁵ Aglaan, tiliriñiaqtuq ilivsiŋñun God-im uqaqtaanik uvaptun ittuamik akunnavsiŋniñ, aasii kamagiraksraġigiksi.

¹⁶ “Taimani katinnavsi Mount Sinai-mi iŋiulaŋagiksi tusaġnaġisuŋił̣ł̣ugu nipaa Atanġum God-ivsi, tautuvsaaġuŋił̣ł̣ugulu ikualaqpaktuaq; sivuuġavlusi tuqupiaġniaġnasugalusi tainnatqikpan.

¹⁷ Tavraasii Atanġum uqallautivluŋa, ‘Tavraami apiqsriaŋat iluaġmiuq.

¹⁸ Uvaŋa tiliriñiaqtuŋa God-im uqaqtaanik iliktun ittuamik akunġanniñ iñuŋisa; uqaluksriñiaġiga, uqautiniaġaich iñuich piraksriutipayauramnik.

¹⁹ Uqaġniaqtuq atipkun, uvaŋa tatavsaġniaġiga kiñapayaaq kamaksrisuŋitchuaq ilaanik.

²⁰ Aglaattauq God-im uqaqtaa uqaqpan kiliktuunmik atipkun tiliŋitkaluaqtilluni, aasiiptauq uqaqti God-mun uqaqsimakpan allat god-it atqagun tuquruksrauruq.’

²¹ “Isummatigiguvsiuŋ, qanuġuta iḷisimaniaqpisigu uqaqtim kiliktuutaa qaigaluapiaġmagaan Ataniġmiñ.

²² Iḷitchuġiniaqtusi, atakkii Ataniq uqallakpan suna piñiaġniḷugu, tasama nalaunniaqtuq. Aglaan nalaunŋitpan, iḷitchuġiniaqtusi uqaqti sagluvluni uqaqtautilaaŋanik Ataniġmun. Tainnasiq sivuuġaginiaġnagu.