Deuteronomy 17 - Iñupiatun Mumiksat Uqalugiksuat

Aitchuutit Qilluutiqaqtuat

¹ “Aitchuiñasi Ataniġmun God-ivsigñun pamiqsaavsiññiñ naakka imnaivsiññiñ qilluutaqaqpata; Atanġum uumigigaa taamna.

² “Iḷaanniasii tusaamaguvsi nunaaqivsigñi imma nallisi aġnat aŋutikkaluat piḷuusiqimakpata navgiḷutiŋ Atanġum sivunniuġutiliaŋanik,

³ nanġairraqsiñiḷugi naakka purvigiḷugiḷḷu allat god-it, siqiñiq, tatqiq, uvluġiat, paaqłagruiññaqługu God-im piraksriutaa.

⁴ Tusaamaguvsi tainnatchiñik, iḷumun ipiaġmagaagaksraġigiksi. Tainnasiq nalausimakpan Israel-mi,

⁵ nunaaqqivsi kasimavianuutilugich upkuaqpaŋani iniqpaum tuqutaksraġigisi uyaġagnik miḷḷuuġlugich.

⁶ Aglaan ami, iḷisimariqaqtuksraurut malġugnik naakka malġuk qaaŋiġḷugik tuqutaksrauniaqsimakpan; atausił̣hiñaukpan iḷisimari tuqutaksrauŋitchut.

⁷ Iḷisimarauruat miḷuqsaqqaaġisirut, iḷḷatilutigliasii tamaaniittuat iñuich; tainnaġuvsi piaġiirrutauruaq piiġisiruq.

⁸ “Iḷaanniasii isivġiaksrat siġġaġnaġniaġmiut isivġiirinun unnii isivġiġñiaqpatigik, makuakii marra suġauttaŋisa iñuich sivunniġñiaġniŋatigun naakka iñuum timiŋa anniqsaukpan naakka kaŋiqsiñiaġniŋa sugnamun iñuk iñuaqpan pisaaġigaluaġnagu iñuaqsaaġipiaġniġmiḷḷu. Tainnasiq nalautitpan, ullautigisirusi atausiiññamun nanġaiviksrautivsigñun naliġaaŋanun Atanġum God-ivsi,

⁹ taimmaasii isivġiaksrautiksi maniḷugu Levi-m kiŋuvaaŋiññun aŋaiyyuliqsiqpauruanun isivġiirimullu taamna nalautinman, atautchimuglutiŋ sivunniġisigaat.

¹⁰ Tavra sivunniqpata, kamagiruksraġigisi sivunniutiŋatigun.

¹¹ Akuqtuaġiyumagisi sivunniutaatigun piraksriqsuutaiḷḷu maliġuapiaġataġlugich.

¹² Kiñapayaaq kamaksriŋitchuaq nalliannik isivġiirinik naakka aŋaiyyuliqsiqpagmik aŋalatchiuraġniaqtuanik tuqutaksrauruq; tainnaġuvsi piaġiirrun piiġñiaqtuq Israel-guruaniñ.

¹³ Iñupayaat tusaaruat nalautittuamik sivuuġatchagniaqtut, tainna paaqłakkumaŋaiġḷutiglu.

Maliġuagaksriat Umialikkun

¹⁴ “Nunannaanigataġuvsi Atanġum God-ivsi qaisaġiniaqtaŋanik ilivsigñun inillaaniglusiḷu, umialiqaġumaalliġḷusiḷu allatitun nunaaqqisitun avativsigni ittuatun.

¹⁵ Nalupqinaigiyumagiksi umialiksraqtaaqsi Ataniġmun God-mun naliġaaġitilaaŋanik. Nanmiñiq iḷagiruksraġiġiksi, allaniñ nunaninŋaqtauruaq umialliutiruksraġiŋitkiksi.

¹⁶ Umialliutiruaq ilivsiŋñun tuttuqpaukkaqtuksrauŋiñmiuq aŋuyaunnanik, suli tuttuqpaksramiñik Egypt-miuniñ tauqsiqtuksrauŋiñmiuq, uqallausiatun Atanġum utiqurauŋił̣ł̣usi taamuŋa.

¹⁷ Umialliutiruaq nuliagukkaqtuksrauŋitchuq; iḷaanni asivaqtitpiaġaat Ataniġmiñ; umiallaŋniaqtuksrauŋiñmiuq maniukkaqsiḷuni qatiqtuaniglu kaviqsuaniglu.

¹⁸ Umialliutigumi aglaktuksrauruq piksramiñik God-im pitquraŋiññik tutquqsimakkaŋiññiñ Levi-m kiŋuvaaŋich aŋaiyyuliqsiqpauruat.

¹⁹ Tigusiññaaġiraksraġigaich taiguaqtuaġlugich iñuuniqtutilaaġmisun, qutchiksuaġillasiyumagaa Ataniq iḷumutuuġvigilugiḷḷu piraksriutaupayaaqtuat.

²⁰ Taapkua isumapkaġniaŋitkaa nakuułhaaġnasugaluni Israel-guruaniñ suli kamaksriŋiñŋuraaġugniaŋitchuq Atanġum piraksriutipayaaŋiññik sutigulliqaa. Umialguyumauq kiŋuniiŋiḷḷu atanniqsimannikkumaut sivisuruami.