Deuteronomy 15 - Iñupiatun Mumiksat Uqalugiksuat

Ukiut Tallimat Malġuŋat

¹ “Naattaġikpata tallimat malġuk ukiut piiqsuksraġigisi akiiḷaŋich akiiḷaqaqtuat.

² Uvva inna pigisirusi. Akiiḷaqtitchiruam suliqutigiŋaiġñiaġaa akiiḷaŋa siḷalliġmi; utiqtitchipkaiñialaniaŋitchuq iñugmiñiñ; uvvaataŋ Atanġum ilaata akiiḷaiġviksraq nalunaiġaniŋagaa.

³ Akiḷiipkaiyumiñaġaluaqtutin allaniñ nunaniŋaqtauruaniñ, aglaan akiḷiipkaiñiatagnak iḷagniñ iñuŋaniñ Israel akiiḷaqtuqpatin.

⁴ “Atanġum God-ivsi quviasuusiqsimaaġniaġaasi nunannaktaavsigniñ. Nalliqsiunnii akunnivsiññi piiḷḷiuġniaŋitchuq,

⁵ kamagiguvsiuŋ Ataniq God-iksi qaunagilugulu supayaaq pitqurriutiga ilivsiññun uvlupak.

⁶ Atanġum piḷḷuataqtinniaġaasi, unniqsuqłiunmisun. Attaqsipkaiñiaqtusi manigñik iñugiaktuanun nunanun, aglaan ilivsi attaqsiñiaŋitchusiunnii; aŋalatchiñiaqtusi iñugiaktuanik nunauruanik aglaan allaniñ nunaniñ aŋalatchiġñiaŋitchusi.

⁷ “Nunaksrirrutaiññi Atanġum God-ivsi piiḷḷiuqtuaqaqpan iñuŋiññi Israel, sigñalusi ikayuġuŋiññiaġnagich.

⁸ Aglaan, anniqsraiġusi attaqsipkaġisigisi qanutupayauraq piqaqtuksraukpata.

⁹ Attaqsipkaŋiññasigik, qallisiññaġniḷugu ukiuq akiiḷanik puiguiñiksraun. Isummiġñasi pigiitchuamik attaqsipkaiyumaŋiḷḷutin, Ataniġmignun iŋiulaviaqtut ilipkun, aasii pasikkusiaqaġlutin.

¹⁰ Aitchuiyummatiqaġlusi iḷaŋaniñ sigñataiḷḷusi, Atanġum piḷḷuataqtinniaġaatin supayaaġuvich.

¹¹ Iḷiappauruaqaŋaiġumiñaitchuq nunami. Tainnamik piraksriġivsi sigñataitquvlusiḷu piiḷḷiuqtuanun Israel-gum kiŋuvaaŋiññun nunavsiññi.

Aŋalatchisiksraqsi Kivgavsigñun

¹² “Kivgauruat aġnat naakka aŋutit Hebrew-guruat inmignik tunitqikpata kivgaġitqulutiŋ, atanġiqsitkisigisi savautianikpasi itchaksrani ukiuni. Tallimat malġuanni ukiut aniḷutiŋ aasii qiḷiqsimmataiġutiŋ.

¹³ Atanġiqsitkuvsigi anipkaġnagich susautiksraiḷḷugich.

¹⁴ Aitchulluataaksraġigisi inuŋaiġḷugi Ataniġmiñ quyyasiavsigniñ imnaiñik, palauvaksranik, wine-niglu.

¹⁵ Itqaumalugu kivgauŋanivsigñik Egypt-mi aasii Atanġum God-ivsi annaktiłłusi; tainnamik taaptumiŋa piraksriġivsi.

¹⁶ “Kivgaqpich unitchuŋisimakpatin; nakuaġivlutin iḷatillu nayuutigumi iluaġiłhaaqługu.

¹⁷ Aasii paaŋanuutiyumagiksi igluvsi aasii tavrani siutaa putulugu; tavra kivgaġiniaġiksi iñuunniqtutilaaŋatun. Taamna piḷġusiq atiruq aġnanullu.

¹⁸ Isumaqłuutiginagu kivgaġikkaan atanġiqsinniaġupku; uvvaataŋ, savautiŋagaatin itchaksrani ukiuni avvaŋaniñ akiññaktaaŋisa savaktim akiił̣haaqlugi. Nalautitchumagiñ taamna, aasii Atanġum God-ivsi piḷḷuataqtinniaġaasi supayaaġuvsi.

Aŋayukłiŋich Pamiqsaavsigniñ Imnaivsigñiḷḷu

¹⁹ “Aŋayukłiŋich aŋusallut pamiqsaavsiŋniñ imnaiñiḷḷu aitchuutigiyumagisi Ataniġmun God-ivsigñun; savaktinniaġnagich naakka saliñagich imnaich mitquŋich.

²⁰ Ukiutuaġaġikpan iḷatillu nanmiñiq niġiyaġumagisi katiqsrasi Atanġum takkuani nanġaiyyaġvikaami.

²¹ Qilluutaqaqpata aglaan niġrutit, tusialluuvlutiŋ naakka ayauŋavlutiŋ allaniglu iluirrutiqaqtuat, ikipkaisiginiaġnagich Ataniġmun God-ivsigñun.

²² Niġiyumiñaġaluaġisi tainnaittuat aimaaġvivsigñi. Iluqavsi, salumaruam salumaitkaluaqtuavlu niġiyumiñaġaich, niġiruatuttauq tuttumik naakka antelope-mik.

²³ Aglaan auŋa niġiñasiuŋ, maqipkaġisigiksi imiġmik maqipkairuatun nunamun.