Deuteronomy 14 - Iñupiatun Mumiksat Uqalugiksuat

Qivġuniġmi Pilġusiġitquŋisat

¹ “Iñugigaasi Atanġum God-ivsi. Qivġuguvsiasii tuquruaqaġlusi, kiḷḷiaġnasi ilivsigñik naakkaunnii nutchavsi sivuġaagun kivraġnasi, allat piḷġusiŋisun.

² Iñugigaasi Atanġum God-ivsi; naliġaaġiŋagaasi iñugisukłusi akunġanniñ iñupayaat iñuuruat nunapayaami.

Salumaruallu Salumaitchuallu Niġrutit

³ “Niġiñasi supayaamik Atanġum salumarualiuŋaisaanik.

⁴ Marra niġiyumiñakkasii niġrutit: pamiqsaat, imnaich, nagrulgiḷḷu,

⁵ allakaaġiit tuttut, pamiqsaaguŋitchuat imnaiḷḷu nagrulgiḷḷu, antelope-giḷḷu—

⁶ niġrutillu kukiqaqpata aviŋaruagnik niqimigniglu tamutqiguuruanik.

⁷ Aglaan niġiñiaŋitchusi niġrutinik kukiqaŋisuaqpata aviŋaruagnik niqimigniglu tamutqiguulutik. Niġiruksraġiŋitkisi pikukturuat, ukalliich naakka rock badger-t. Salumaitchuaġiniaġisi; niqimignik tamutqiguuruat aglaan kukiqaŋitchuat aviŋaruagnik.

⁸ Niġiñasigik tuttuqłuich. Salumaitchuaġiniaġisi; kukiqaġaluaqtut aviŋaruagnik, aglaan tamutqiḷaitchut niqimignik. Tamatkua niġrutit niġiñasigik naakkaunnii aksigḷugich tuquŋaruat timiŋich.

⁹ “Niġiyumiñaġisi immami niġrutipayaat aŋuutiqaqpatalu kavisiqaqpatalu,

¹⁰ aglaan immamiutapayaaq aŋuutiqaŋitpallu kavisiitpallu niġiraksraġiŋitkiksi; salumaitchuaġisaġiksi.

¹¹ “Nigiyumiñaġisi salumaruat tiŋmiat.

^12-18 Aglaan ukuniŋa niġiñasi: tigmiaqpagnik, ukpigñik, qiḷġiñik, kirgavigñik; buzzard-nik, vulture-nik, tulukkanik; ostrich-nik; nauyyanik, stork-nik, heron-nik, pelican-nik, iŋitqaġnik; hoopoe-nik, bat-niglu.

¹⁹ “Isaġuqapayaaqtuat qupilġut salumaitchut; niġiñasigi.

²⁰ Niġiyumiñaġaluaġisi salumaruagukpata qupilġut.

²¹ “Niġiñagich niġrutit ilimiktuiññaq tuquŋappata. Allaninŋaqtauruanun nunaniñ iñuuruanun akunnavsiññi niġipkaġumiñaġaluaġisi, naakkaqaa tuniḷugich allanun allaninŋaqtauruanun nunaniñ. Aglaan uvva ilivsi salumaruagurusi iñugigaasi Atanġum God-ivsi. “Iganiaġnagu imnaiyaaq naakka nagrulik aakaŋata immuanun.

Qulikuniġum Pitquraŋa

²² “Ilaaguaqsisitchi quliŋannik nauriapayaavsi ukiutuaqpan.

²³ Atautchimuutilugich aasii Atanġum God-ivsi nanġaiyyaġvigitqukkaŋanun; tavraniasii takkuani niġiḷugich qulikuuġutisi palauvaksraniñ, wine-niñ, olive uqsruaniñ, aniqqaaqtuaŋiññiḷḷu pamiqsaagutivsi suli imñaiḷḷu. Tainna piyumausi Ataniq God-iksi qiksigillasiyumagiksi ataramik.

²⁴ Uŋasikpaisimakpan aŋaiyyuyyaġviksrautiksi aimmavivsigniñ tigumiaġniaġuvsigi qulikuuġutisi Atanġum piḷḷuataqtinmasi, inna pigisirusi:

²⁵ Tuniyumagisi piññaktaapayaasi maniññaktaasi aasii quliŋat tigumiaġlugu anaiyuyyaġviksrautivsigñun.

²⁶ Tauqsiutigilugich pisuktaġnun makkunuŋa niqipianun, imnaiñun, wine-nun, allanun imilianun—tavraniasii iḷatillu, takkuani Atanġum God-ivsi niġigisirusi quviasuglusi.

²⁷ “Minitqataġnagich Levi-m kiŋuvaaŋich iñuuniaqatisi nunaaqqivsigñi; atakkii kiŋuvaannaktaagitchut nunanik inmikkun pimaakkamignik.

²⁸ Piŋasut ukiut isukłitchaġikpata qulikuuġutisi nauriavsigniñ katitkisigisi nunaaqqivsigñun.

²⁹ Niqiksraŋich Levi-m kiŋuvaaŋisa pimaakkamignikkii nunaitchut, makkunuŋalu allaniñ nunaninŋaqtauruat, aŋayuqaagiŋaruat, uiḷgaŋaruanullu iñuuniaqatauruanun nunaaqqivsigñi. Qaiḷutiŋ piksraqtullaagisirut isumamiktun. Tainnaġuvsi, Atanġum God-ivsi piḷḷuataqtinniaġaasi supayaaġnivsigñi.