Deuteronomy 13 - Iñupiatun Mumiksat Uqalugiksuat

¹ “Uqaqtauniruat God-mun naakka siññaktumiktigun kiligusiaqaġniruat aliuġnaqtuanik kamasausiqutiniglu,

² saqunniaġuksiññaqłusi nanġaitquvlusi allanun god-inun aŋaiyyuvigitquvlugich sivuani nanġaŋaisavsigñi. Piñiaġnikkaŋaat unnii nalautkaluaġniqpan uqallausimiktun

³ suqutiginiaġnagich. Atanġum God-ivsi uuktuġaasi tamatkunuuna Ataniġmik nakuaqsriñiapiaġaluaqtilaaqłusi iluqaanik uummativsigñik iluqaaniglu ilitqusivsigñik.

⁴ Maliġuaġisigiksi Ataniq qiksigilugulu; kamagilugi piraksriutiŋillu; nanġaġlugu iḷumutuuġvigilugulu.

⁵ Aglaan tuquttaġumagisi uqaqtiŋi god-iŋisa suli siññaktunik sivunniuqtit paaqłaktaitquriruat Ataniġmik, annaurriuraġniavsiññiñ Egypt-miñ suli tasuġmivlusi kivgaugavsi. Tainnatchit iñuich pigiitchuagurut asiñuutiniataksiññaġaasi Atanġum piraksriutaagun. Tuqutaksraurut, piaġiirrun piiqsuksraukpan akunnavsigñiñ.

⁶ “Aniqatigigaluaġuŋ iġñiġilugu naakka panigilugu naakka tuvaaqan piviuttaġikkaan naakka avilaitqatilluatan nalliŋata suiḷauriḷutiŋ piyumisaaġaluaqpatin allanun god-inun uqallaglutiŋ, ‘Nanġaiyyaqta allanun god-inun,’ ilivsiḷu kiŋuniivsiḷu nanġaŋaisavsigñun.

⁷ Iḷaanniptauq iḷaŋisa nanġaitqusaaġniaġmigaasi god-iŋiññik qanittuat naakka uŋasikkaluaqpata.

⁸ Aglaan maliksugniaġnagich nalliŋit unnii; naalaŋaiġḷugiḷḷu. Nagligiuraġniaġnagich sapunniaġnagiḷḷu.

⁹ Tuqutchumagisi! Miḷuqsaqqaaġumagitin uyaġagnik, aqukkulliasii miḷḷuuqtuimmiḷutiŋ.

¹⁰ Miḷḷuuġumagisi tuquniŋannun aglaan! Asivaqtinniatakkaasiataŋ Ataniġmiñ God-ivsigniñ. Annaurriruamiñ iḷivsigñik Egypt-miñ kivgaunivsigniñ.

¹¹ Tavra iñupayaaŋisa Israel tusaaniaġaat; sivuuġatchaglutiŋ aasii tainna pitqiŋitchumaut pigiitchuamik.

¹² “Iñuuniaġvigiaqsiguvsigi nunaaqqich Atanġum God-ivsi piññaktaaġipkakkaŋii, tusaaniaqtusi

¹³ anniqsuutauŋiḷat iñuich akunnavsigñiñ killunnamuksaaqtitchiñiḷugich nunaaqqiñi nanġaipkaiñiḷugich allanun god-inun ilivsi nanġaivigiŋaitchavsigñun sivuani.

¹⁴ Tusaaguvsiuŋ uqaluk siamittuaq, kaŋiqsiñiapiaġisigiksi; aasii iḷumun inniqpan,

¹⁵ tamatkiġḷugich iñuŋi nunaaqqim savikpagnik tuqutchumagisi, pamiqsaaŋich taputilugich. Suksraunġipiallakkumagiksi nunaaqqiq.

¹⁶ Katillugich aasii suġauttapayaaŋich tavrani iñuuruat nunaaqqimi qaliġiiksillugich nunaaqqim qitqanun. Ikipkaġluguasii nunaaqqiq tamatkiġḷugu aitchuutausaġlugu Ataniġmun God-ivsigñun. Suksraunġipiallagaksrauruq nappatqigñaġumiñaiġḷugu.

¹⁷ Tutquqsiñiaġnasi supayaamik taaptumaŋŋa suksraaqtauganiŋaruamiñ, Atanġum qinnautiqpagmiñiñ mumiguni nagligiliġumagaasi. Ilaan nagligiliġḷusi iñugiaksipkaġniaġaasi atqunaġlusi, unniqsuqłiunmisun maŋŋuuvsigñuñ,

¹⁸ kamaksriguvsi pitqutipayaaŋiñik ilivsigñun qaitchamnik uvlupak, piraksriutaiḷḷu nalautillugich tainna piñiaqtuq.